Kirɔ sɑkɑrɑrun sɔ̃
5
1 Nɛn bii, ɑ nɛn gɑri bwisigii kɑ lɑɑkɑrigii swɑɑ dɑkio ɑ nɔ. 2 Sɑɑ ye sɔɔrɑ, kɑɑ giɑ nge mɛ kɑɑ kɑ sĩ dee dee. Wunɛn gɑri koo sɔ̃ɔsi mɑ ɑ yɛ̃ru mɔ. 3 Domi kurɔ tɑnɔn gɑri yi rɑ n dowɑ nge tim kpɑ yi n kokumɔ nge gum yɑrum. 4 Adɑmɑ ɑmɛn biru, yi rɑ sosiewɑ nge gbiri kondu, kpɑ yi tɔnu mɛɛrɑ ko nge tɑkobi ye bɑ dɛ̃ɛrɑ biru kɑ wuswɑɑɔ. 5 Gɔɔwɑ win kookoosu rɑ mɑ, kpɑ su kɑ nùn dɑ sere siki wɔruɔ. 6 U ku rɑ swɑɑ mwɛ ye yɑ koo nùn wɑ̃ɑru wɛ̃. U rɑ n torewɑ u kun kɑ bɑɑru. 7 Tɛ̃, nɛn bii, ɑ mɑn swɑɑ dɑkio. A ku nɛn gɑri ɑtɑfiiru ko. 8 A de ɑ kɑ kurɔ win bweserun swɑɑ tondɑ. A ku dɑ win dii kɔnnɔwɔ ɑ sere nɛɛ, kɑɑ du win dirɔ. 9 Kpɑ ɑ ku rɑ tii goo nɔmu bɛriɑ, kpɑ wɔnwɔndu sɑrirugii u nun go. 10 Sɑɑ ye, kpɑ tɔn tukobu bu wunɛn ɑrumɑni gurɑ, kpɑ bu wunɛn sɔmburun ɑre di. 11 Sɑnɑm mɛ wunɛn dɑm mu kpɑ, ɑ gɔɔ turuku sɑ̃ɑ, kpɑ ɑ n wuri mɔ̀ nge gbeeku yɑɑ. 12 Sɑɑ ye sɔɔ, kpɑ ɑ nɛɛ, mbɑn sɔ̃nɑ ɑ bwisi kɛ̃ru ɑtɑfiiru kuɑ, ɑ ǹ yi mɛm nɔɔwɛ. 13 A ǹ wunɛn bwisi kɛ̃ɔbun gere wure, ɑ ben gɑri ɑtɑfiiru kuɑ. 14 Tɛ̃, wee, ɑ sekuru wɔrim dɔɔ tɔmbu kpuron wuswɑɑɔ.
A wunɛn kurɔ kĩɔ
15 Wunɛn kurɔ u sɑ̃ɑwɑ nge bwiɑ yèn nim mu dɛɛre. A ye tɔnɑn nim nɔruo. 16 A ku de yen nim mu n kokumɔ swɛɛ sɔɔ kɑ wuun bɑtumɑbɑ sɔɔ. 17 A de mu n wɑ̃ɑ wunɛ turon sɔ̃. A ku de gɑbu bu kɑ nun mu bɔnu ko. 18 A de nuku dobu bu n wɑ̃ɑ wunɛ kɑ wunɛn kurɔ gbiikoon wɑ̃ɑsinɑɑ sɔɔ. 19 U sɑ̃ɑwɑ kurɔ burɔ nge nɛm tɑɑkɔ. A de win wɑsi yi n dɑ nun nuku dobu wɛ̃, kpɑ win kĩru tɑ n nun nɛni bɑɑdommɑ. 20 Nɛn bii, mbɑn sɔ̃nɑ kɑɑ n goon kurɔn binɛ mɔ. Mbɑn sɔ̃nɑ kɑɑ n nuku dobu kɑsu goon kurɔn mi. 21 A de ɑ n yɛ̃ mɑ Yinni Gusunɔ u tɔnu bɑɑwuren dɑɑ mɛɛrɑ, u bɑɑwuren sɑnu sɑnusu wɑɑmɔ. 22 Tɔn kɔ̃so u rɑ wɔriwɑ win torɑru sɔɔ, kpɑ nu nùn mwɑ nge yinɑ. 23 U koo kɑm kowɑ domi u kpɑnɑ u tii nɛnɛ. Win wiirɑ kookoosu su koo nùn go.