Bwisin ɑrufɑɑni
4
1 Bɛɛ bibu, i swɑɑ dɑkio kirɔ ye bɛɛn tundo u bɛɛ mɔ̀. I swɑɑ tem kpĩiyɔ kpɑ i wɑ i bwisi ko. 2 Domi bwisi geeyɑ nɑ bɛɛ kɛ̃mɔ. Yen sɔ̃, i ku nɛn sɔ̃ɔsinu yinɑ. 3 Sɑnɑm mɛ nɛn tii nɑ sɑ̃ɑ bii, nɑ wɑ̃ɑ nɛn tundon bɔkuɔ, mɑ nɑ sɑ̃ɑ nɛn mɛron bii teereru, 4 nɛn tundo u mɑn keu kuɑ u nɛɛ, n win gɑri nɛnuɔ. N win woodɑbɑ mɛm nɔɔwɔ, kpɑ n wɑ nɑ n wɑ̃ɑ. 5 N bwisi kɑ lɑɑkɑri nɛnuɔ, n ku win gere duɑri, 6 n ku bwisi yɔ̃su, yi koo mɑn somi. N yi kĩɔ, yi koo mɑn kɔ̃su. 7 Gɑ̃ɑ ni kon nɑɑ girɑ sɔɔ, bwisiyɑ yi kpuro kere. Ǹ n mɛn nɑ, n yi kɑsuo kɑ ye nɑ mɔ kpuro. 8 N bwisi kĩɔ, yi koo de n ko tɔn boko. N yi tii bɔkɑsio, nge kurɔ kĩnɑsi, yi koo de n bɛɛrɛ wɑ. 9 Yi ko n sɑ̃ɑwɑ nge sinɑ furɔ nɛn wirɔ.
A ku tɔn kɔ̃sobun dɑɑ sɑɑri
10 Nɛn bii, ɑ swɑɑ dɑkio ɑ nɔ ye nɑ nun sɔ̃ɔmɔ. À n ye wurɑ, wunɛn wɑ̃ɑru tɑ koo dɑkɑɑ dɑ. 11 Nɑ nun sɔ̃ɔsimɔwɑ nge mɛ kɑɑ kɑ bwisi dendi. Nɑ nun sɔ̃ɔsimɔwɑ nge mɛ kɑɑ kɑ gem swĩi. 12 Sɑɑ ye sɔɔ, kɑɑ sĩwɑ ɑ kun sokure. À n dukɑ mɔ̀, gɑ̃ɑnu kun mɑɑ nun gɑnumɔ wunɛn swɑɑ sɔɔ. 13 Sɔ̃ɔsi te bɑ nun kuɑ mi, ɑ ku tu yɔ̃su. A tu nɛnuɔ kem kem, domi terɑ tɑ sɑ̃ɑ wunɛn wɑ̃ɑrun nuuru. 14 A ku tɔn kɔ̃sobun dɑɑ sɑɑri. A ku mɑɑ ben yirɑ swĩi. 15 A ye derio, ɑ ku ye swĩi. A ye dukɑ suurio n tomɑ. 16 Domi bɑ̀ kun kɔ̃sɑ kue, bɑ ku rɑ dweeye. Bɑ̀ kun goo torɑri, bɑ ku rɑ dom wɑ. 17 Kɔ̃sɑn kobɑ bu rɑ n sɑ̃ɑ nge ben dĩɑnu kɑ ben tɑm. 18 Gemgibun kookoosu su rɑ n sɑ̃ɑwɑ nge bururun sɔ̃ɔ yɑnɑ ye yɑ rɑ n dɛɛrɑmɔ sere sɔ̃ɔ u kɑ ye mɑm mɑm. 19 Adɑmɑ tɔn kɔ̃sobun kookoosu su sɑ̃ɑwɑ nge yɑm wɔ̃kuru. Bɑ ǹ yɛ̃ yèn sɔ̃ bɑ sokurɑmɔ.
A de wunɛn kookoosu su n wɑ̃
20 Nɛn bii, ɑ nɛn gɑri nɔɔwɔ. A swɑɑ tem kpĩiyɔ ɑ nɔ bwisi yi kon nun kɛ̃. 21 A ku yi ɑtɑfiiru ko. A yi nɛnuɔ wunɛn gɔ̃run sɔɔwɔ. 22 Domi wi u yi mwɑ, yi koo nùn wɑ̃ɑru kɑ bwɑ̃ɑ dobu wɛ̃. 23 A de ɑ n tii sɛ kɑ bwisiku ni ɑ mɔ̀ wunɛn tii tii sɔɔ, domi niyɑ nu kpuro kere, niyɑ nu wunɛn wɑ̃ɑru kpɑre. 24 A ku de weesu kɑ gɑri kɑnkɑm yen gɑɑ yu yɑri wunɛn nɔɔn di. 25 A de ɑ n mɛɛrɑ ye ɑ nɑɑ gire. A ku wuswɑɑ sĩiyɑ. 26 A de ɑ n yɛ̃ swɑɑ ye kɑɑ kpe, kpɑ ɑ n yɛ̃ mɑ yɑ sɑ̃ɑwɑ swɑɑ geɑ. 27 A ku yen gɑm gɛrɑ. A torɑru dukɑ suurio.