Gusunɔn geren mɛm nɔɔbu
sɔɔrɑ bwisi wɑ̃ɑ
3
1 Nɛn bii, ɑ ku nɛn sɔ̃ɔsinu duɑri. A nɛn woodɑbɑ nɛnuɔ. 2 Yerɑ yɑ koo de wunɛn wɑ̃ɑru tu dɛnyɑ, kpɑ ɑ n wɑ̃ɑ bɔri yɛndu sɔɔ. 3 A de ɑ geɑ ko kpɑ ɑ n sɑ̃ɑ nɑɑnɛgii. A ye kpuro sebuo wĩirɔ nge wurɑn sɑbɑ, kpɑ ɑ de yɑ n wɑ̃ɑ wunɛn gɔ̃ruɔ. 4 Sɑɑ ye sɔɔrɑ kɑɑ n bɛɛrɛ mɔ Gusunɔ kɑ tɔmbun wuswɑɑɔ. 5 A Gusunɔ wunɛn Yinni nɑɑnɛ koowo kɑ gɔ̃ru tiɑ ɑ kun tɑ̃sɑ wunɛn tiin yɛ̃ru sɔɔ. 6 A de ɑ n win bwisikunu mɔ wunɛn kookoosu kpuro sɔɔ, kpɑ u wunɛn swɑɑ sɔmɛ. 7 A ku tii mɛɛri bwisigii. A Yinni Gusunɔ nɑsio kpɑ ɑ kɔ̃sɑ suuri. 8 Yerɑ yɑ koo ko wunɛn wɑsin bwɑ̃ɑ dobu kɑ wunɛn kukunun dɑm. 9 Ye ɑ mɔ kpuro sɔɔ, ɑ gbiiyo ɑ Yinni Gusunɔ win bɔnu wɛ̃. Nge mɛyɑ kɑɑ kɑ nùn bɛɛrɛ wɛ̃. 10 Sɑnɑm mɛyɑ wunɛn birɑnu nu koo dĩɑnu yibu kpɑ wunɛn tɑm mu n kpɑ̃ sere ɑ ɑyeru biɑ mi kɑɑ doke. 11 Wunɛ nɛn bii durɔbu, ɑ ku Yinni Gusunɔn gerusibu gɑrisi tɑɑrɛ. A ku mɑɑ win sɛɛyɑsiɑbu mɛɛri nge torɑru. 12 Domi wi u kĩ, wiyɑ u rɑ sɛɛyɑsie, nge mɛ tundo wi u win bii kĩ kɑ gem, u rɑ ko.
Bwisi kɑ doo nɔɔru
13 Doo nɔɔrugiiwɑ wi u bwisi dɔbɑ, mɑ u yɛ̃ru kɑsu u wɑ. 14 Domi bwisi yi ɑre mɔ n sii geesu kɑ wurɑgii kere. 15 Yin bɛɛrɛ yɑ kpɑ̃ yɑ burɑ yɑ̃nu kpuro kere. Ye bɑ rɑ kɑsu kpuro sɔɔ, gɑ̃ɑnu sɑri ni kɑɑ kɑ yi weesinɑ. 16 Bwisi yin nɔm geuɔ, hunde dɑkɑɑwɑ yɑ wɑ̃ɑ mi. Yin nɔm dwɑrɔ mɑɑ, ɑrumɑni kɑ bɛɛrɛwɑ yɑ wɑ̃ɑ mi. 17 Bwisi yi koo nun ɑlɑfiɑ wɛ̃, kpɑ ɑ n bɔri yɛndu mɔ wunɛn wɑ̃ɑrun swɛɛ kpuro sɔɔ. 18 Be bɑ yi mwɑ, yi bu wɑ̃ɑru wɛ̃ɛmɔ. Doo nɔɔrugibɑ be bɑ yi nɛni kem kem. 19 Bwisiyɑ Yinni Gusunɔ u kɑ hɑnduniɑ tɑkɑ kuɑ. Win yɛ̃rɑ u kɑ wɔllu kuɑ. 20 Win bwisi yin sɑɑbuwɑ nim mu kɑ kurɑmɔ tem di, mɑ guru winu nu demɔ gurɑ nɛmɔ.
Yinni Gusunɔwɑ
u bwisigii kɔ̃su
21 Nɛn bii, ɑ bwisi kɑ lɑɑkɑri nɛnuɔ, ɑ ku de yen gɑɑ yu nun kisirɑri. 22 Yɑ koo nun wɑ̃ɑ geeru kɑ bɛɛrɛ wɛ̃. 23 Kɑɑ kpĩ ɑ sĩ kɑ toro sindu, ɑ ǹ sokurɑmɔ. 24 À n kpunɑ wɔ̃kuru, bɛrum kun nun mɔ̀. Kɑɑ dweeyɑwɑ kɑ bɔri yɛndu. 25 A ǹ kɑɑ n mɑɑ kɑ gɑ̃ɑnu nɑnde ni nu koo nun deemɑ subɑru, ǹ kun mɛ tɔn kɔ̃so wi u koo nun wɔrimɑ. 26 Domi Yinni Gusunɔ u koo nun kɔ̃su. U koo nun gbɑrɑ yɛ̃ri kpuron di.
A wunɛn tɔnusi kĩɔ
27 Wi n weenɛ ɑ geɑ kuɑ, ɑ̀ n yen dɑm mɔ, ɑ ye koowo. 28 Wunɛn beruse ù n nun gɑ̃ɑnu kɑnɑ ni kɑɑ kpĩ ɑ nùn kɛ̃ mii mii, ɑ ku nɛɛ, u doo sere siɑ. 29 A ku wi u nun nɑɑnɛ sɑ̃ɑ kɔ̃sɑ bwisikusi. 30 A ku kɑ goo sɑnnɑ kɑm u kun nun kɔ̃sɑ kue. 31 A ku tɔn kɔ̃sobun dɑɑ kĩɑ, ɑ ku mɑɑ ben yirɑ swĩi. 32 Domi Yinni Gusunɔ u tɔn kɔ̃sobu tusɑ, ɑdɑmɑ u rɑ gemgibu ko win bɔrɔbɑ. 33 U rɑ tɔn kɔ̃sobun yɛnusu bɔ̃rusiwɑ, kpɑ u gemgibugisu domɑru kuɑ. 34 Be bɑ rɑ nùn yɑɑkoru ko, beyɑ u rɑ mɑɑ yɑɑkoru ko. Adɑmɑ be bɑ tii kɑwe, beyɑ u rɑ durom kue. 35 Bwisigibu bɑ koo bɛɛrɛ wɑ, kpɑ gɑri bɑkɑsu su sekuru wɑ.