Bwisi yi rɑ kɔ̃sɑ gbɑrewɑ
2
1 Nɛn bii, ɑ nɛn sɔ̃ɔsiru wuro,
kpɑ ɑ nɛn woodɑ nɛnɛ wunɛn gɔ̃ruɔ.
2 A bwisin sɔ̃ɔsiru swɑɑ dɑkio.
A kookɑri koowo yu kɑ nun yeeri.
3 A bwisi kɑsuo,
kpɑ ɑ lɑɑkɑri nɑɑ girɑ.
4 A ye kpuro kɑsuo nge sii geesu,
ǹ kun mɛ nge ɑrumɑni ye yɑ beruɑ.
5 À n kuɑ mɛ, kɑɑ tubu
nge mɛ kɑɑ kɑ Gusunɔ nɑsiɑ,
kpɑ ɑ nùn giɑ.
6 Yinni Gusunɔwɑ u rɑ tɔnu bwisi wɛ̃.
Wiyɑ u rɑ mɑɑ nùn yɛ̃ru kɑ lɑɑkɑri wɛ̃.
7 U rɑ tɑɑrɛ sɑrirugibu nɑsɑrɑ wɛ̃,
kpɑ u n be bɑ gem swĩi kɔ̃su nge tɛrɛru.
8 U rɑ be bɑ ku rɑ ben berusebu kɔ̃sɑ kue kɔ̃su,
kpɑ u wigii be bɑ nùn mɛm nɔɔwɛ kpɑrɑ.
9 Nɛn bii, ɑ̀ n nɛn gɑri wurɑ, kɑɑ gem tubu.
Kɑɑ n yɛ̃ ye yɑ sɑ̃ɑ dee dee.
Ye kpurowɑ yɑ koo de ɑ n geɑ mɔ̀.
10 Kɑɑ n bwisi mɔ, kpɑ yɛ̃ru tu nun nuku dobu wɛ̃.
11 Bwisi kɑ lɑɑkɑri yɑ koo nun kɔ̃su,
12 kpɑ yu kɑ nun gbɑrɑ swɑɑ kɔ̃sɑn di,
kpɑ yu nun yɑrɑ gɑri kɔ̃sigiin nɔmɑn di,
13 kɑ sere mɑɑ be bɑ swɑɑ geɑ derin min di,
bɑ swɑɑ kɔ̃sɑ swĩi.
14 Kɔ̃sɑn kobu bu rɑ bu nuku dobu wɛ̃,
kpɑ bɑ n yɛ̃ɛrimɔ torɑnun sɔ̃.
15 Ben swɛɛ kɑ ben sɑnu sɑnusu ku rɑ n dɛɛre.
16 Nge mɛyɑ yi koo mɑɑ de ɑ kurɔ tuko dukɑ suuri
wi u nun kɔkirimɔ kɑ gɑri dori.
17 Wi, wi u win durɔ gbiikoo yinɑ,
u ɑrukɑwɑni duɑri ye u kɑ nùn bɔkuɑ Gusunɔn wuswɑɑɔ.
18 Mɑ win yɛnu gɑ gɔɔ dɔɔ,
win swɛɛ yi kɑ nùn dɔɔ gɔribun wɑ̃ɑ yerɔ.
19 Tɔn durɔ wi u dɑ win mi, u ku rɑ wurɑmɛ.
U ku rɑ mɑɑ wɑ̃ɑrun swɑɑ wɑ.
20 Ǹ n mɛn nɑ, ɑ gemgibun swɑɑ swĩiyɔ.
A ben dɑɑ sɑɑrio.
21 Domi gemgibu kɑ tɑɑrɛ sɑrirugibu
bɑ ko n wɑ̃ɑ n kɑ tɛ tem mɛ sɔɔ.
22 Adɑmɑ tɔn kɔ̃sobu kɑ mɛm nɔɔ sɑribɑrɑ
bɑ koo wunɑ min di.