MƆNNU
1
1 Dɑfidin bii, Sɑlomɔɔ, wi u sɑ̃ɑ Isirelibɑn sunɔ, win mɔnnɑ.
Mɔnnun ɑrufɑɑni
2 Mɔn ni sɔɔrɑ tɔnu koo bwisi kɑ yɛ̃ru wɑ kpɑ gɑri yi yi tubum sɛ̃ yi nùn yeeri. 3 Nu koo nùn bwisi gee sɔ̃ɔsi kpɑ u ko ye n sɑ̃ɑ dee dee weesu kɑ tɑki sɑriru sɔɔ. 4 Nu koo lɑɑkɑri sɑrirugii ko lɑɑkɑrigii, kpɑ nu ɑluwɑɑsi yɛ̃ru kɑ bwisi kɛ̃. 5 Niyɑ nu koo mɑɑ bwisigiin bwisi sosi, kpɑ nu yɛ̃rugii kpɑrɑ 6 u kɑ mɔnnun tubusiɑnu kɑ bwisigibun gɑri tubu.
7 À n kĩ ɑ n bwisi mɔ, ɑ de ɑ ginɑ Gusunɔ nɑsiɑ. Domi wi u rɑ bwisi kɑ sɛɛyɑsiɑbu ɑtɑfiiru ko, u sɑ̃ɑwɑ gɑri bɔkɔ.
Bɑ ɑluwɑɑsibɑ bwisi kɛ̃mɔ
8 Wunɛ, nɛn bii durɔbu, ɑ wunɛn bɑɑbɑn sɔ̃ɔsiru nɔɔwɔ, kpɑ ɑ ku rɑ wunɛn mɛron gere yinɑ. 9 Yɑ koo de wunɛn dɑɑ yu wɛ̃rɑ nge mɛ furɔ burɔ kɑ wurɑ rɑ wɑsi burɑru kue. 10 Wunɛ, nɛn bii durɔbu, tɔn kɔ̃sobu bɑ̀ n nun kɔkirimɔ, ɑ ku rɑ wurɑ. 11 Bɑ̀ n geruɑ bɑ nɛɛ, ɑ nɑ ɑ kɑ bu dɑ i tɔmbu sɑmbɑ ko i bu sɛ̃suku bɑɑ bɑ̀ kun gɑ̃ɑnu kue, 12 i bu go yɑnde nge mɛ gɔribun wɑ̃ɑ yeru tɑ rɑ tɔnu mwɛ wɑsiru. I bu mwɑ nge wɔru bɔkɔ ge gɑ tɔnu sɑmbɑ kuɑ u wɔri. 13 I ko ɑrumɑni bwese bwesekɑ wɑ i dɑm diimɑ i yibiɑ bɛɛn diɑɔ. 14 A nɑ ɑ kɑ bu mɛnnɑ, kpɑ i bɛɛn mɔru kpuro doke bɔɔ teeru sɔɔ. 15 Wunɛ, nɛn bii durɔbu, ɑ ku kɑ tɔn ben bweseru swĩinɑ. A ku ben yirɑ du. 16 Ben nɑɑsu sɑ̃u bu kɑ kɔ̃sɑ ko. Bɑ mɑɑ sɛnde bu kɑ tɔnun yɛm yɑri. 17 Gunɔ ge ɑ yinɑ bɛriɑmmɛ, gɑ̀ n nun mɛɛrɑ, kɑmɑ ɑ bɛrimɔ. 18 Adɑmɑ tɔn be, bɑ tii yinɑ bɛriɑmmɛ, bɑ koo mɑɑ mwɑɑrɑ ye sɔɔ. 19 Nge mɛyɑ n sɑ̃ɑ kɑ bɑɑwure wi u dukiɑn kĩru mɔ. Be bɑ tii ye wɛ̃, berɑ yɑ rɑ go.
A ku bwisi kɛ̃ru yinɑ
20 Bwisi yi gbɑ̃rɑmɔ tɔɔwɔ, yi nɔɔgiru sue wuun bɑtumɑ sɔɔ. 21 Yi gbɑ̃rɑmɔ swɑɑ kɛɛnɑnɔ yi yin gɑri kpɑrɑmɔ mi wirugibɑ rɑ mɛnnɛ, 22 yi mɔ̀, bɛɛ lɑɑkɑri sɑribɑ, sere dommɑ i kĩ i n wɑ̃ɑ bwisi sɑriru sɔɔ. Bɛɛ yɑɑko kowobu, sere dommɑ i ko n nuku dobu mɔ̀ bɛɛn yɑɑko kobu sɔɔ, kpɑ bɛɛ gɑri bɑkɑsu i n yɛ̃ru tusɑ. 23 I gɔsirɑmɑ i nɛn gerusibu nɔ. Kon bɛɛ nɛn hunde wɛ̃, kpɑ n kɑ bɛɛ nɛn yɛ̃ru bɔnu ko. 24 Wee, nɑ bɛɛ sokɑ, i ǹ wure. Nɑ bɛɛ nɔmɑ gɑ̃ri, goo kun nɛ. 25 I nɛn bwisi kɛ̃ru kpuro yinɑ, i ǹ mɑɑ nɛn gerusibu kĩ. 26-27 Yen sɔ̃nɑ, bɛɛn wɑhɑlɑ sɔɔ, sɑnɑm mɛ bɛrum bɛɛ mwɑ nge guru woo bɔkɔ, mɑ wɑhɑlɑ yɑ seewɑ nge woo gunɑ yɑ kɑ nuku sɑnkirɑnu kɑ tɔ̃yɑ nɑ, nɛn tii kon bɛɛ yɛ̃ɛ kpɑ n bɛɛ yɑɑkoru ko. 28 Sɑnɑm mɛyɑ i ko mɑn soku, ɑdɑmɑ nɑ ǹ bɛɛ wurɑrimɔ. I ko mɑn kɑsu, i ǹ mɑɑ mɑn wɑsi. 29 Domi i yɛ̃ru tusɑ, i ǹ kĩ i Yinni Gusunɔ nɑsiɑ. 30 I ǹ nɛn bwisi kɛ̃ru wure, mɑ i nɛn gerusibu ɑtɑfiiru kuɑ. 31 Yen sɔ̃, i ko bɛɛn himbɑ kɑ bɛɛn kookoosun ɑre di i debu. 32 Lɑɑkɑri sɑribɑn bwisi kɛ̃ɛ yinɑbu koo de bu gbi. Gɑri bɑkɑsun biti sɑrirɑ derɑ bɑ kɑm mɔ̀. 33 Adɑmɑ wi u nɛn gɑri swɑɑ dɑki, win bwɛ̃rɑ ko n kpĩ. U ǹ ko n mɑɑ wurure kɔ̃sɑ gɑɑn bɛrum sɔ̃.