144
1 Womu ge Dɑfidi u kuɑ. Ge wee.
Yinni Gusunɔ, nɑ nun siɑrɑ
wunɛ wi ɑ sɑ̃ɑ nge nɛn kpee bɑɑ.
Wunɑ ɑ rɑ mɑn tɑbu sɔ̃ɔsi.
2 Wunɑ ɑ rɑ mɑn durom kue kpɑ ɑ mɑn kɔ̃su.
Wunɑ ɑ sɑ̃ɑ nɛn kuku yee dɑmgiru kɑ nɛn fɑɑbɑ kowo.
Wunɑ ɑ sɑ̃ɑ nɛn tɛrɛru te tɑ rɑ mɑn gɑnɛ.
Wunɑ ɑ rɑ de bwesenu nu n mɑn wiru kpĩiyɛ.
3 Yinni Gusunɔ, wɑrɑ rɑ n tɔnu ɑ n sere kɑ win bwisikunu mɔ̀.
Wɑrɑ rɑ n tɔnu ɑ n sere kɑ win weeweenu mɔ̀.
4 Tɔnu u sɑ̃ɑwɑ nge woo.
Win wɑ̃ɑrun tɔ̃nu nu sɑ̃ɑwɑ nge sɑɑru te tɑ rɑ doonɛ.
5 Yinni Gusunɔ, ɑ de wɔllu tu tem dɛbɛ dɛbɛ ko kpɑ ɑ sɑrɑmɑ.
A guunu bɑbo kpɑ dɔ̃ɔ u yɑri ni sɔɔn di.
6 A de guru mɑɑkinu nu sɔ̃ɔsirɑ, kpɑ ɑ nɛn yibɛrɛbɑ yɑrinɑsiɑ.
A bu sɛ̃ɛnu tweeyo kpɑ ɑ de bu yɑrinɑ.
7 A wunɛn nɔmu dɛmiɑmɑ wɔllun di.
A mɑn wɔro kpɑ ɑ mɑn fɑɑbɑ ko
nim bɑkɑm kɑ tɔn tukobun min di
8 be bɑ rɑ n gɑri kɑm yɑrɑmɔ ben nɔsun di,
kpɑ bɑ n ben nɔm geu yiiye
bu kɑ nɔɔ mwɛɛ weesuginu ko.
9 Yinni Gusunɔ, kon nun wom kpɔɔ kuɑ.
Kon nun womu kuɑ kɑ mɔrɔku sɛrum wɔkuruguu,
10 wunɛ wi ɑ rɑ sinɑmbu fɑɑbɑ ko,
kpɑ ɑ nɛ, Dɑfidi wunɛn sɔm kowo yɑrɑ tɑkobi gɔɔgiɑn di.
11 Yinni Gusunɔ, ɑ mɑn wɔro,
kpɑ ɑ mɑn fɑɑbɑ ko tɔn tukobun nɔmɑn di,
be bɑ rɑ n gɑri kɑm yɑrɑmɔ ben nɔsun di,
kpɑ bɑ n ben nɔm geu yiiye
bu kɑ nɔɔ mwɛɛ weesuginu ko.
12 A de bɛsɛn bii ɑluwɑɑsibɑ bu ko nge dɑ̃ɑ
ni nu kpiɑ dee dee nin piiburun di,
kpɑ bɛsɛn bii wɔndiɑbɑ bu mɑɑ ko kurɔ burɑbu
nge gbere be bɑ dɑ̃kɑ bɑ sɑ̃ɑ sinɑ kpɑɑrun burɑru.
13 A de bɛsɛn birɑnu nu dĩɑ bwese bwesekɑ yibu,
kpɑ bɛsɛn yɑɑ sɑbenu nu dɑbiɑ nu ko subɑ nɔrɔm nɔrɔm
kɑ nɔrɔm nɔrɔm subɑ wɔku wɔkubu bɛsɛn gberu kpɑɑnɛɔ.
14 A de bɛsɛn kɛtɛbɑ bu kuurɑ.
A ku de goo u sun wɔri kpɑ u sun yoru mwɛɛri u kɑ doonɑ.
A ku mɑɑ de nuku sɑnkirɑnun wuri yi nɔɔrɑ bɛsɛn swɛɛ sɔɔ.
15 Doo nɔɔrugirɑ bwese te tɑ sɑ̃ɑ nge mɛ.
Doo nɔɔrugirɑ bwese te tɑ Gusunɔ mɔ Yinni.