143
1 Womu ge Dɑfidi u kuɑ. Ge wee.
Yinni Gusunɔ, ɑ nɛn kɑnɑru nɔɔwɔ.
Kpɑ ɑ nɛn bikiɑbu swɑɑ dɑki.
A mɑn wisio wunɛn bɔrɔkiniru kɑ wunɛn gem sɔɔ.
2 A ku nɛ, wunɛn sɔm kowo siri,
domi goo sɑri wi u koo gem wɑ wunɛn mi.
3 Nɛn yibɛrɛ u mɑn nɑɑ swĩi.
U nɛn wɑ̃ɑru tem tɑɑre.
U derɑ nɑ wɑ̃ɑ yɑm wɔ̃kurɔ nge be bɑ gu n tɛ.
4 Yen sɔ̃nɑ nɛn hunde yɑ dɑm dwiiyɑ,
mɑ nɑ nuki sɑnkire too.
5 Nɑ gɑsɔn wɑ̃ɑru yɑɑye.
Nɑ wunɛn sɔmɑ kpuro lɑsɑbu mɔ̀,
mɑ nɑ wunɛn nɔmɑn sɔmburu bwisikumɔ.
6 Wunɑ nɑ nɔmɑ tĩi.
Nɛn gɔ̃ru gɑ wunɛn bɛkɛ bɑrɔ
nge mɛ tem gbebɑ rɑ n nim kĩ.
7 Yinni Gusunɔ, nɑ mwiɑ kpɑnɑ.
A mɑn wisio kpɑɑkɑ.
A ku mɑn biru kisi kpɑ n ku ko nge be bɑ wɑ̃ɑ gɔriɔ.
8 A mɑn wunɛn tɔn geeru sɔ̃ɔsio bururu kɑ yokɑ,
wunɑ nɑ nɑɑnɛ sɑ̃ɑ.
A mɑn swɑɑ sɔ̃ɔsio ye kon swĩi,
wunɑ nɑ nɛn hunde nɔmu sɔndiɑ.
9 Yinni Gusunɔ, ɑ mɑn wɔro sɑɑ nɛn yibɛrɛbɑn nɔmɑn di,
wunɛn miyɑ nɑ kuku yeru kɑsu.
10 Wunɑ sɑ̃ɑ nɛn Yinni.
A mɑn sɔ̃ɔsio mɛ ko nɑ n dɑ wunɛn kĩru ko.
A de wunɛn Hunde geo wi, u mɑn kpɑrɑ swɑɑ ye yɑ nɔɔ nɛ sɔɔ.
11 Yinni Gusunɔ, ɑ mɑn wɔro nge mɛ ɑ nɔɔ mwɛɛru kuɑ.
A nɛn hunde wunɔ wɑhɑlɑn di wunɛn gem sɔ̃.
12 A nɛn yibɛrɛbɑ kɑm koosio,
kpɑ ɑ nɛn wɛrɔbu kpuro kpeerɑsiɑ yèn sɔ̃ ɑ mɑn kĩ.
Nɑ sɑ̃ɑwɑ wunɛn sɔm kowo.