141
1 Womu ge Dɑfidi u kuɑ. Ge wee.
Yinni Gusunɔ, nɑ nun soku, ɑ nɑ fuuku nɛn mi.
A nɛn nɔɔ swɑɑ dɑkio nɑ̀ n nun sokumɔ.
2 A de nɛn kɑnɑru tu nun girɑri nge turɑre nubu durorugiɑn wiisu.
Kpɑ nɔmɑ ye nɑ yiiye yɑ n sɑ̃ɑ nge kɛ̃ru
te bɑ rɑ kɑ nun nɑɑwɛ wunɛn sɑ̃ɑ yerɔ yokɑ.
3 Yinni Gusunɔ, ɑ nɛn nɔɔ bɔkuo.
A nɛn nɔɔ sɑrusu kɔ̃suo.
4 A ku de nɛn gɔ̃ru gu dɑ kɔ̃sɑ giɑ.
A ku de n kom kɔ̃sum ko kɑ be bɑ gem sɑriru swĩi.
A ku de n kɑ bu tɔ̃ɔ bɑkɑ dim di.
5 Gemgii ù n mɑn so, kĩrɑ u mɑn sɔ̃ɔsi.
Ù n mɑn gerusi, u mɑn gum tɑ̃rewɑ nɛn wirɔ.
Nɑ ǹ ye yinɑmɔ.
Adɑmɑ nɑ ǹ nɛn kɑnɑru mɑrimɔ tɔn kɔ̃sobun sɔ̃.
6 Gusunɔ, ɑ ben siri kowobu sureo kpenu sɔɔ,
kpɑ bu nɛn gɑri swɑɑ dɑki,
domi yi sɑ̃ɑwɑ gɑri dori.
7 Nge mɛ bɑ̀ n kɔrɔ mɔ̀ tem mu rɑ nɔɔ bɑɑre,
nge mɛyɑ gɔribun wɑ̃ɑ yerɑ koo nɔɔ bɑɑrɑ
tu ben kukunu mwɛ ni nu yɑrinɛ.
8 Yinni Gusunɔ, wunɑ nɑ mɛɛrɑ.
Wunɛn miyɑ nɑ kukuɑ.
A ku nɛn wɑ̃ɑru doke kɑri sɔɔ.
9 A mɑn gbɑro tɔn kɔ̃sobun yinɑ ye bɑ mɑn bɛrien di.
A mɑn gbɑro ben tɑɑ ye bɑ mɑn bɛrien di.
10 A de tɔn kɔ̃so be, bu wɔri ben yinɑ sɔɔ,
kpɑ nɛ, n kisirɑ min di.