140
1 Womu ge Dɑfidi u wom kowobun wirugii kuɑ. Ge wee.
2 Yinni Gusunɔ, ɑ mɑn wɔro tɔn kɔ̃sobun nɔmɑn di.
A mɑn gbɑro gbɑnɑgibun nɔmɑn di.
3 Domi kɔ̃sɑ bɑ rɑ n bwisikumɔ ben gɔ̃ruɔ.
Kpɑ bɑ n sɔɔru kpeere bɑɑdommɑ bu kɑ tɑbu ko.
4 Bɑ rɑ ben yɑrɑ derewɑ nge wɑɑ.
Kpɑ ben nɔɔ gɑ n dɛ̃ɛ mɔ nge surɔkɔru.
5 Yinni Gusunɔ, ɑ mɑn tɔn kɔ̃so gbɑro.
A mɑn gbɑnɑgibu giro be bɑ kɑsu bu mɑn surɑ.
6 Wee tii suobu bɑ mɑn yinɑ bɛriɑmmɛ.
Bɑ mɑn tɑɑ yinuɑmmɛ swɑɑ sɔɔ.
Mɑ bɑ mɑn yɔɔru bwɛ̃ɛyɛ.
7 Adɑmɑ nɑ nɛɛ, Gusunɔ, wunɑ ɑ sɑ̃ɑ nɛn Yinni.
A swɑɑ tem kpĩiyɔ ɑ nɛn kɑnɑru nɔ.
8 Yinni Gusunɔ, ɑ sɑ̃ɑwɑ gbɑ̃rɑru tèn mi nɑ rɑ kuke n kɑ fɑɑbɑ wɑ.
A rɑ nɛn wiru bere tɑbun sɑɑ sɔɔ.
9 A ku de tɔn kɔ̃son kĩru tu koorɑ.
A ku de ye u niɑ sɑ̃ɑ yu koorɑ, kpɑ u ku rɑɑ tii suɑ.
10 Be bɑ mɑn kooro buremɔ
ɑ de ben torɑnu nu wɔri ben wiru wɔllɔ.
11 A bu dɔ̃ɔ wisio kpɑ ɑ de bu wɔri wɔru bɔkɔ sɔɔ
gèn min di bɑ ǹ mɑɑ kpɛ̃ bu yɑri.
12 Wi u weesu mɔ̀ u ǹ tɑ̃simɔ tem mɛ sɔɔ.
Kɔ̃sɑ yɑ ko n mɑɑ gbɑnɑgii swĩiwɑ sere u kɑ kɑm ko.
13 Nɑ yɛ̃ mɑ Yinni Gusunɔ u rɑ wɔnwɔndo siriewɑ dee dee.
Kpɑ u mɑɑ sɑ̃ɑro nùn win gem wɛ̃.
14 Geemɑ, gemgibu bɑ koo nun tɔmɑ kpɑ bɑ n wɑ̃ɑ wunɛn wuswɑɑɔ.