111
1 I Yinni Gusunɔ siɑro.
Kon Yinni Gusunɔ siɑrɑ kɑ nɛn gɔ̃ru kpuro.
Kon nùn siɑrɑ tɔn dɛɛrobun suunu sɔɔ.
2 Yinni Gusunɔn nɔmɑn sɔmɑ yɑ kpɑ̃.
Mɑ be bɑ ye kĩ bɑ kɑsu bu ye giɑ.
3 Ye u kuɑ yɑ rɑ n girimɑ kɑ bɛɛrɛ mɔwɑ.
Win gem mu rɑ n wɑ̃ɑwɑ sere kɑ bɑɑdommɑɔ.
4 U rɑ de su win sɔm mɑɑmɑɑkiginu yɑɑyɑ.
Yinni Gusunɔ u sɑ̃ɑwɑ duromgii kɑ wɔnwɔndugii.
5 U rɑ be bɑ nùn nɑsie dĩɑnu wɛ̃,
kpɑ u win ɑrukɑwɑni yɑɑyɑ.
6 U win tɔmbu win sɔm mɑɑmɑɑkiginun dɑm sɔ̃ɔsi
ni u kɑ bu tɔn tukobun tem wɛ̃.
7 Win sɔm mɑɑmɑɑkigii ni, nu sɑ̃ɑwɑ gem mɑm mɑm.
Win woodɑbɑ bɑ mɑɑ nɑɑnɛ mɔ.
8 Yɑ ko n sirerewɑ sere kɑ bɑɑdommɑɔ,
domi bɑ ye kuɑwɑ gem sɔɔ mɑm mɑm.
9 U derɑ bɑ win tɔmbu yɑkiɑ.
Mɑ u kɑ bu ɑrukɑwɑni bɔkuɑ sere kɑ bɑɑdommɑɔ.
Win yĩsiru tɑ dɛɛre, tɑ mɑɑ nɑnum mɔ.
10 À n kĩ ɑ ko bwisigii, ɑ de ɑ ginɑ Gusunɔ nɑsiɑ.
Be bɑ bwisi mɔ, beyɑ bɑ rɑ yirɑ ye swĩi.
Win bɛɛrɛ yɑ ko n wɑ̃ɑwɑ sere kɑ bɑɑdommɑɔ.