(I mɑɑ mɛɛrio Bɑndun Gɑri I, 16:8-22)
105
1 I Yinni Gusunɔ siɑro. I win yĩsiru sokuo.
I win geɑ ye u kuɑ kpɑro.
2 I nùn womu kuo.
I win sɔm mɑɑmɑɑkiginu kpɑro.
3 I nuki doro wi, Yinni Gusunɔn yĩsi dɛɛrɑrun sɔ̃.
Be bɑ nùn kɑsu bu nukuru doro.
4 I Yinni Gusunɔn dɑm kɑsuo.
I kɑsuo i n kɑ nùn wɑ̃ɑ.
5-6 Bɛɛ Aburɑhɑmu Gusunɔn sɔm kowon bweseru,
bɛɛ Yɑkɔbun bweseru, bɛɛ be u gɔsɑ,
i win sɔm mɑɑmɑɑkigii ni yɑɑyo.
I siribu yɑɑyo bi u bɛɛ kuɑ.
7 Wiyɑ Gusunɔ bɛsɛn Yinni wi u koo hɑnduniɑ kpuro siriɑ.
8 U ku rɑ win ɑrukɑwɑni ye u kɑ tɔmbu bɔkuɑ duɑri sere kɑ bɑɑdommɑɔ.
U rɑ n ye yɑɑyewɑ sere kɑ ben bibun bibun wɑɑtiɔ.
9 Arukɑwɑni yerɑ u kɑ Aburɑhɑmu kɑ Isɑki bɔkuɑ.
10 U kɑ Yɑkɔbu wi bɑ mɔ̀ Isireli ɑrukɑwɑni ye bɔkuɑ
ye yɑ ko n wɑ̃ɑ sere kɑ bɑɑdommɑɔ.
11 U nɛɛ, kon nun Kɑnɑnin tem wɛ̃.
Mɛyɑ mu ko n sɑ̃ɑ wunɛn tubi wunɛ kɑ wunɛn bibun bweseru.
12 Sɑɑ ye sɔɔ, bɑ ǹ dɑbi. Bɑ sɑ̃ɑwɑ sɔbu mi.
13 Bɑ rɑ n bɔsuwɑ tem kɑ tem sɔɔ.
Bɑ̀ n dɑ bwese tenin mi, bu wurɑ teɔnɔn mi.
14 Adɑmɑ Gusunɔ kun dere bweseru gɑru tu bu dɑm dɔre.
U sinɑmbu sɛɛyɑsiɑwɑ ben sɔ̃.
15 U nɛɛ, i ku be nɑ gɔsɑ bɑbɑ.
I ku be, nɛn sɔmɔbu kɔ̃sɑ kuɑ.
16 U derɑ gɔ̃ɔrɑ nɑ tem mɛ sɔɔ.
Mɑ bɑ dĩɑnu biɑ bu di.
17 Mɑ u derɑ goo gbiɑ u dɑ tem mi ben sɔ̃.
Wiyɑ Yosɛfu wi bɑ dɔrɑ nge yoo.
18 Bɑ kɑ nùn yɔni bɔkuɑ nɑɑsɔ.
Mɑ bɑ nùn sisun gɑndɑru dokeɑ wĩirɔ.
19 Bɑ win lɑɑkɑri mɛɛrɑ
sere yu kɑ koorɑ ye u rɑɑ geruɑ.
20 Sɑɑ ye sɔɔrɑ sinɑ boko u woodɑ wɛ̃
u nɛɛ, bu nùn yɑrɑmɑ.
Mɑ u derɑ bɑ nùn kusiɑ.
21 Mɑ u nùn kuɑ win yɛnu kɑ win ye u mɔ kpuron wirugii,
22 kpɑ u wɑ u kɑ win sinɑ ɑsɑkpɔbu kpɑrɑ nge mɛ u kĩ.
Kpɑ u sinɑ bokon bwisi kɛ̃ɔbu bwisi kɛ̃.
23 Sɑɑ yerɑ Yɑkɔbu kɑ wigibu bɑ nɑ bɑ sinɑ Egibitiɔ Kɑmun bweserun temɔ.
24 Mɑ Gusunɔ u derɑ bɑ mɑrurɑ too.
Bɑ dɑm kuɑ bɑ ben yibɛrɛbɑ Egibitigibu kerɑ.
25 Mɑ u yibɛrɛ ben gɔ̃ru gɔsiɑ.
Bɑ wi, Gusunɔn tɔn be tusɑ.
Mɑ bɑ bu nɔni sɔ̃ɔwɑ be, be bɑ sɑ̃ɑ win sɔm kowobu mi.
26 Mɑ u Mɔwisi kɑ Aroni gɔsɑ bɑ kuɑ win sɔm kowobu,
mɑ u bu gɔrɑ.
27 Mɑ bɑ mɑɑmɑɑki kuɑ kɑ win dɑm tɔn ben suunu sɔɔ Kɑmun tem mi.
28 U derɑ yɑm wɔ̃ku sinumgiru tɑ nɑ.
Kɑ mɛ, Egibitigii be, bɑ ǹ wi, Gusunɔn gere wure.
29 U ben nim gɔsiɑ yɛm mɑ swɛ̃ɛ kpuro yi gu.
30 U mɑɑ derɑ surenu nu yibɑ ben tem sɔɔ
sere kɑ sinɑ bokon kpin yerɔ.
31 U derɑ gbɑbu swɛ̃ɛ kɑ gɑɑnikunu nu nɑ ben tem kpuro sɔɔ.
32 Mɑ u derɑ guru kpenu kɑ dɔ̃ɔ nɑ tem mɛ sɔɔ.
33 Mɑ yɑ ben dɑ̃ɑ gbɑɑnu kɑ dɑ̃ɑ ni nu tie ben tem mɛ sɔɔ kpuro kɑm koosiɑ.
34 Yen biru, u derɑ twee yi nɑ dɑbi dɑbinu.
35 Mɑ yi tem min yɑkɑsu kɑ mɛn gbeɑn dĩɑnu kpuro di.
36 U mɑɑ Egibitigibun bii gbiikobu go,
be, be bɑ mɑrɑ ben ɑluwɑɑsiru sɔɔ.
37 Mɑ u win tɔmbu yɑrɑ Egibitin di
bɑ wurɑ kɑ sii geesu wɑ bɑ sɔɔwɑ.
Ben goo kun mɑɑ sɑnum kpɑnɛ swɑɑ sɔɔ.
38 Sɑɑ ye sɔɔrɑ Egibitigibun nukurɑ dorɑ
yèn sɔ̃ Isirelibɑ bɑ doonɑ.
Domi bɑ rɑɑ ben bɛrum mɔ too.
39 Mɑ Gusunɔ u Isirelibɑ guru wii wuronu wukiri,
mɑ u bu yɑm bururɑsie wɔ̃kuru bu kɑ yɑm wɑ.
40 Ye bɑ turɑ gbɑburɔ,
yerɑ bɑ Yinni Gusunɔ nɔɔgiru sue bɑ dĩɑnu kɑnɑ,
mɑ u bu kusunu wɛ̃.
Mɛyɑ u derɑ pɛ̃ɛ yɑ nɑ wɔllun di bɑ di bɑ debɑ.
41 U kperu wukiɑ mɑ nim mu kurɑmɑ mu tɛriɑ nge dɑɑru tem dirɑɔ.
42 Domi u win nɔɔ mwɛɛ dɛɛrɑ te yɑɑye te u win sɔm kowo Aburɑhɑmu kuɑ.
43 U win tɔn be u gɔsɑ yɑrɑ kɑ nuku dobu.
Mɑ bɑ nuku dobun kuuki mɔ̀.
44 Mɑ u bu bwesenu gɑnun tem wɛ̃.
Mɑ bɑ bwese nin gberun ɑre tubi di,
45 bu wɑ bu kɑ wi, Gusunɔn woodɑbɑ mɛm nɔɔwɑ.
Ǹ n mɛn nɑ, i Yinni Gusunɔ siɑro!