103
1 Womu ge Dɑfidi u kuɑ. U nɛɛ,
kon Yinni Gusunɔ siɑrɑ.
Kon win yĩsi dɛɛrɑru tɔmɑ kɑ nɛn gɔ̃ru kpuro.
2 Kon Yinni Gusunɔ siɑrɑ.
Win ye u kuɑ, nɑ ǹ duɑrimɔ, bɑɑ yen tiɑ.
3 U rɑ mɑn nɛn torɑnu kpuro suuru kue.
U rɑ nɛn bɑrɑnu kpuro kpeesie.
4 U rɑ mɑn yɑre sɑɑ siki wɔrun di.
U rɑ mɑn durom kɑ wɔnwɔndu kue.
5 U rɑ nɛn wɑ̃ɑru doo nɔɔru yibie.
Kpɑ u mɑn ko nge ɑluwɑɑsi nɛn tɔkɔru sɔɔ,
nɑ n dɑm mɔ nge gunɔ bɑkeru te tɑ yɔ̃ɔwɑ.
6 Yinni Gusunɔ u rɑ siriwɑ gem sɔɔ.
U rɑ be bɑ dɑm dɔremɔ wɔre.
7 U Mɔwisi win woodɑbɑ sɔ̃ɔsi.
Mɑ u Isirelibɑ win sɔm mɑɑmɑɑkiginu sɔ̃ɔsi.
8 Yinni Gusunɔ u wɔnwɔndu mɔ.
U rɑ mɑɑ tɔnu durom kue.
Win durom mu kpɑ̃.
Win mɔru ku rɑ se fuuku.
9 U ku rɑ tɔmbu gerusi kiri kiri.
U ku rɑ mɑɑ mɔru ko n kɑ tɛ.
10 U ku rɑ sun sɛɛyɑsie nge mɛ bɛsɛn torɑrɑ nɛ.
U ku rɑ sun bɛsɛn torɑnu kɔsie.
11-12 Adɑmɑ nge mɛ sɔ̃ɔ yɑri yeru tɑ kɑ sɔ̃ɔ duu yeru tondinɛ,
nge mɛyɑ u rɑ mɑɑ bɛsɛn torɑnu tondɑsie.
Nge mɛ wɔllɑ kɑ tem tomɑ,
nge mɛyɑ win durom mu kpɑ̃ɑru nɛ be bɑ nùn nɑsien mi.
13 Nge mɛ tundo u rɑ n win bibun wɔnwɔndu mɔ,
nge mɛyɑ Yinni u be bɑ nùn nɑsien wɔnwɔndu mɔ.
14 Domi u yɛ̃ ye bɑ kɑ sun tɑkɑ kuɑ.
U ǹ duɑri mɑ yɑnimɑ bɑ kɑ sun mɔmɑ.
15 Tɔnun wɑ̃ɑrun tɔ̃nu nu ku rɑ tɛ.
Nu sɑ̃ɑwɑ nge yɑkɑsu.
U rɑ sewɑ nge dɑ̃ɑ wɛ̃su.
16 Woo gɑ̀ n su swee kpɑ su doonɑ.
Bɑɑ sin yĩreru ɑ ǹ mɑɑ wɑsi.
17-18 Adɑmɑ Yinni Gusunɔn durom mu rɑ n wɑ̃ɑwɑ sere kɑ bɑɑdommɑɔ
be bɑ nùn nɑsien mi, mɑ bɑ win ɑrukɑwɑni nɛni,
mɑ bɑ win woodɑbɑ mɛm nɔɔwɑmmɛ.
Mɛyɑ mɑɑ win gem mu rɑ n kɑ bu wɑ̃ɑ sere kɑ ben bibun bibɔ.
19 Yinni Gusunɔ u win sinɑ gɔnɑ tɛriɑ wɔllɔ.
Mɑ u bɑndu dii gɑ̃ɑnu kpuron wɔllɔ.
20 Bɛɛ Yinni Gusunɔn gɔrɑdobɑ, bɛɛ be i dɑm mɔ
i rɑ win gɑri mɛm nɔɔwɛ, i nùn siɑro.
21 Bɛɛ win tɑbu kowobu kpuro,
bɛɛ be i nùn sɑ̃ɑmɔ,
i win kĩru mɔ̀,
i nùn siɑro.
22 Bɛɛ win tɑkɑ koorɑ, i nùn siɑro mi u bɑndu dii kpuro.
Yinni Gusunɔ, kon nun siɑrɑ.