(I mɑɑ mɛɛrio Bɑndun Gɑri I, 16:23-33)
96
1 I Yinni Gusunɔ wom kpɔɔ kuo.
Bɛɛ hɑnduniɑgibu, i nùn womu kuo.
2 I Yinni Gusunɔ womu kuo.
I nùn bɛɛrɛ wɛ̃ɛyɔ.
I win fɑɑbɑn lɑbɑɑri kpɑro tɔ̃ɔ bɑɑtere.
3 I bwesenu win yiikon fɑɑgi kuo.
Kpɑ i win mɑɑmɑɑkin gɑri gere.
4 Domi wi, Yinni Gusunɔ u kpɑ̃.
Wiyɑ bɑ koo bɛɛrɛ wɛ̃. U bũnu kpuro dɑm kere.
5 Domi nu sɑ̃ɑwɑ kɑm dirum.
Wiyɑ u wɔllu tɑkɑ kuɑ.
6 Yɑm bururɑm kɑ yiiko bɑkɑ yɑ rɑ n nùn wɑ̃ɑsi.
Dɑm kɑ girimɑ yɑ wɑ̃ɑ win sɑ̃ɑ yerɔ.
7 Bwesenu kpuro, i nɑ i Yinni Gusunɔ bɛɛrɛ wɛ̃.
I nɑ i win dɑm kɑ win yiikon gɑri kpɑrɑ.
8 I Yinni Gusunɔn yĩsiru bɛɛrɛ wɛ̃ɛyɔ.
I duo win sɑ̃ɑ yerɔ kɑ kɛ̃nu.
9 I nɑ i nùn kpunɑ kɑ bɛɛn sɑ̃ɑ yɑ̃nu.
Bɛɛ hɑnduniɑgibu kpuro, i diirio.
10 I bwesenu kpuro sɔ̃ɔwɔ i nɛɛ, Yinni Gusunɔ u bɑndu di.
U tem swĩi mu dɑm mɔ, mu ǹ mɑɑ yĩirimɔ.
U rɑ tɔmbu siriwɑ dee dee.
11 Wɔllu tu nukuru doro. Tem mu yɛ̃ɛrio.
Nim wɔ̃ku kɑ ye yɑ wɑ̃ɑ ge sɔɔ kpuro yu kukirio.
12-13 Gberu kpɑɑnɛ yu nukuru doro kɑ ye yɑ wɑ̃ɑ ye sɔɔ kpuro.
Dɑ̃nu nu tɑki koowo Yinni Gusunɔn wuswɑɑɔ, domi u wee.
U wee u hɑnduniɑ siri, kpɑ u yen tɔmbu siriɑ dee dee.