94
1 Yinni Gusunɔ, wunɛ wi ɑ rɑ tɔnu mɔru kɔsie,
ɑ wunɛn yiiko sɔ̃ɔsio.
2 Wunɛ hɑnduniɑn siri kowo, ɑ seewo.
A be bɑ tii sue ben kɔ̃sɑ kɔsieyo.
3 Sere sɑɑ yerɑ̀ kɑɑ n derɑ tɔn kɔ̃sobu bɑ n wɑ̃ɑ.
Sere sɑɑ yerɑ̀ kɑɑ n derɑ bɑ n nuku dobu mɔ.
4 Wee be bɑ rɑ n tɔmbu kɔ̃sɑ kuɑmmɛ bɑ gɑri sɑɑrimɔ kɑ tii suɑbu.
5 Yinni Gusunɔ, bɑ wunɛn tɔmbu dɑm dɔremɔ
be, be bɑ sɑ̃ɑ wunɛn ɑrumɑni.
6 Bɑ gɔminibu kɑ sɔbu goomɔ.
Mɑ bɑ gobekubɑ sɛ̃remɔ bɑ goomɔ.
7 Bɑ mɔ̀, Yinni Gusunɔ kun sun mɛɛrɑ.
Gusunɔ Yɑkɔbun Yinni wi, kun bɛsɛn lɑɑkɑri mɔ̀.
8 Bɛɛ gɑri bɑkɑsu, i n tii sɛ.
Sere sɑɑ yerɑ̀ i ko i bwisi ko.
9 Gusunɔ wi u tɔnu swɑsu girɑ, wiyɑ kun kpɛ̃ u gɑri nɔ?
Wi, wi u tɔnu nɔni girɑ, wiyɑ kun kpɛ̃ u yɑm wɑ?
10 Wi, wi u rɑ bwesenu sɛɛyɑsie, wiyɑ kun tɔnu sɛɛyɑsiɑmɔ?
Wi, wi u rɑ tɔnu yɛ̃ru wɛ̃, wiyɑ kun bwisi mɔ?
11 Yinni Gusunɔ u tɔmbun bwisikunu yɛ̃.
U yɛ̃ mɑ nu sɑ̃ɑwɑ kɑm dirum.
12 Yinni Gusunɔ, doo nɔɔrugiiwɑ wi ɑ sɛɛyɑsiɑmɔ.
Doo nɔɔrugiiwɑ wi ɑ seeyɑ kɑ wunɛn woodɑ.
13 Wɑhɑlɑn sɑɑ sɔɔ, u ko n wɑ̃ɑwɑ bɔri yɛndu sɔɔ
sere bu kɑ tɔn kɔ̃so suurɑ gbeɑ.
14 Yinni Gusunɔ kun win tɔmbu derimɔ.
U ǹ bu biru kisimɔ, be, be bɑ sɑ̃ɑ win ɑrumɑni.
15 Domi gemgiiwɑ u koo siribu di.
Bèn gɔ̃ru gɑ dɛɛre kpɑ bu siri bi wurɑ.
16 Wɑrɑ u koo mɑn sɑnnɑ tɔn kɔ̃sobun mi.
Wɑrɑ u koo kɑ mɑn yinɑ kɔ̃sɑn kowo ben nɔmɑn di.
17 Yinni Gusunɔ ù kun dɑɑ mɑn somi,
nɑ n dɑɑ wɑ̃ɑ gɔribun wɑ̃ɑ yerɔ.
18 Yinni Gusunɔ, nɑ̀ n bɑ̃ɑrimɔ,
wunɛn duromɑ mu rɑ de nɑ n tɑ̃sɑ.
19 Bwisiku dɑbinu nù n wɑ̃ɑ nɛn gɔ̃ruɔ,
ɑ rɑ mɑn nukuru yɛmiɑsie.
Kpɑ nɑ n nuku dobu mɔ.
20 Yinni Gusunɔ, mbɑ n bɛɛ mɔɔsinɛ wunɛ kɑ siri kowo tɔn gowo
be bɑ rɑ n wunɛn woodɑbɑ gɛmɑ bɑ n tɔmbu dɑm dɔremɔ,
21 kpɑ bɑ n nɔɔ tiɑ mɔ̀ bu kɑ gemgibu wɔri.
Kpɑ bɑ n tɑɑrɛ sɑrirugibu tɑɑrɛ wɛ̃ɛmɔ.
22 Adɑmɑ Yinni Gusunɔ, wunɑ ɑ sɑ̃ɑ nɛn gbɑ̃rɑ dɑmgiru.
A sɑ̃ɑwɑ nɛn kpee bɑɑ yèn mi nɑ rɑ kuke.
23 Kɑɑ de ben torɑnu nu wɔri ben wiru wɔllɔ.
Kɑɑ de ben tiin nuku kɔ̃suru tu bu mɑrisiɑ.
Gusunɔ nɛn Yinni, kɑɑ bu nɔɔ mɑrisiɑ.