92
1 Womu ge bɑ kuɑ tɔ̃ɔ wɛ̃rɑrugirun sɔ̃. Ge wee.
2 Yɑ rɑ n do bɑ n nun tɔmɑmɔ Yinni Gusunɔ,
kpɑ bɑ n wunɛn yĩsiru bɛɛrɛ wɛ̃ɛmɔ, wunɛ Wɔrukoo,
3 bɑ n wunɛn durom gɑri kpɑrɑmɔ bururu,
kpɑ bɑ n wunɛn bɔrɔkinirun gɑri kpɑrɑmɔ wɔ̃kuru
4 kɑ mɔrɔku kɑ gɔ̃ɔgeru.
5 Yinni Gusunɔ, ye ɑ kuɑ yɑ mɑn nuku dobu wɛ̃.
Mɑ nɑ ye kpuro siɑrɑmɔ kɑ womusu.
6 Yinni Gusunɔ, wunɛn sɔmɑ ye ɑ kuɑ yɑ kpɑ̃.
Wunɛn bwisikunu nu duku.
7 Gɑri bɔkɔ gɑ ǹ kpɛ̃ gu nu tubu,
mɛyɑ nu ǹ mɑɑ kpɛ̃ nu nùn yeeri.
8 Geemɑ, tɔn kɔ̃sobu bɑ seemɔ nge yɑkɑsu,
mɑ nuku kɔ̃surugibu bɑ kpɑrɑmɔ nge dɑ̃ɑ.
Kɑ mɛ, sɔ̃ɔ teeru bɑ koo bu kpeerɑsiɑ sere kɑ bɑɑdommɑɔ.
9 Adɑmɑ wunɛ Yinni Gusunɔ, wunɑ ɑ kpuro kere sere kɑ bɑɑdommɑɔ.
10 Wunɛn yibɛrɛbɑ kpuro bɑ koo kɑm ko.
Be bɑ kɔ̃sɑ mɔ̀ kpuro bɑ koo yɑrinɑ.
11 A mɑn gbeeku kɛtɛn dɑm kɑ̃,
mɑ ɑ mɑn domɑru kuɑ ɑ mɑn gum yɑrum tɑ̃re.
12 Tɛ̃, nɑ wɑɑmɔ nɛn yibɛrɛbɑ bɑ wɔrukumɔ.
Nɑ nɔɔmɔ bɑ kuuki mɔ̀.
13 Gemgibu bɑ koo kpɛ̃ɑ nge kpɑkpɑ bɑ̃ɑ.
Bɑ koo se nge Libɑnin dɑ̃ɑ ye bɑ mɔ̀ sɛduru.
14 Bɑ ko n sɑ̃ɑwɑ nge dɑ̃ɑ te bɑ girɑ tɑ kpɑrɑmɔ
Gusunɔ bɛsɛn Yinnin sɑ̃ɑ yerɔ.
15 Bɑɑ tɑ̀ n tɔkɔ kuɑ, tɑ ko n binu mɑrumɔwɑ,
kpɑ tɑ n bɔrɔm mɔ tɑ n wurusu sɔɔwɑ.
16 Yeyɑ yɑ koo sɔ̃ɔsi mɑ Yinni Gusunɔ u sɑ̃ɑwɑ gemgii.
U mɑɑ sɑ̃ɑwɑ nɛn kpee bɑɑ mi nɑ rɑ kuke.
Wi sɔɔ, durum gɑɑ sɑri.