91
1 Wunɛ wi Wɔrukoo u kɔ̃su,
ɑ wɛ̃rewɑ Dɑm kpurogiin tɔbuɔ.
2 Kon Yinni Gusunɔ sɔ̃ mɑ wiyɑ nɛn kuku yeru kɑ nɛn kɑ̀rì.
Wiyɑ nɛn Yinni wi nɑ nɑɑnɛ sɑ̃ɑ.
3 Domi wiyɑ u nun wɔrɑmɔ sɑɑ tɑɑn di.
Wiyɑ mɑɑ nun wɔrɑmɔ sɑɑ kɛ̃si kɛ̃si gɔɔ kɑ win wɑhɑlɑn di.
4 U koo nun win sɑnsu wukiri.
Kɑɑ kuku yeru wɑ win kɑsɑn sɔɔwɔ.
Win bɔrɔkinirɑ sɑ̃ɑwɑ nge tɛrɛru kɑ tɑrɑkpe.
5 Wɔ̃kurun kɑri ǹ kun mɛ sɛ̃u ge gɑ wee sɔ̃ɔ sɔɔ,
yen gɑɑ kun nun bɛrum mɔ̀.
6 Kɛ̃si kɛ̃si gɔɔ wi u bɔsu wɔ̃kuru,
ǹ kun mɛ bɑrɑ te tɑ tɔmbu goomɔ sɔ̃ɔ sɔɔ gbɑ̃ɑrɑ,
yen gɑɑ kun nun bɛrum mɔ̀.
7 Bɑɑ bɑrɑ ni, nù n tɔmbu nɔrɔbu (1.000) go wunɛn bɔkuɔ,
mɑ nu tɔmbu nɔrɔbun subɑ wɔkuru (10.000) wɔri wunɛn nɔm geuɔ,
gɑ̃ɑnu kun nun bɑbɑmɔ.
8 Nɔniyɑ kɑɑ kɑ mɛɛri tɔnɑ kpɑ ɑ tɔn kɔ̃sobun ɑre wɑ.
9 Yèn sɔ̃ Yinni Gusunɔ u kuɑ wunɛn kuku yeru,
mɑ wi, Wɔrukoo u kuɑ wunɛn wɑ̃ɑ yeru,
10 yen sɔ̃nɑ nɔni swɑ̃ɑru gɑrɑ kun nun sisie,
bɑrɑru gɑrɑ kun mɑɑ wunɛn yɛnu susiɔ.
11 Domi u koo win gɔrɑdobɑ nɔɔ kɛ̃ wunɛn sɔ̃,
bɑ n nun kɔ̃su wunɛn swɛɛ kpuro sɔɔ,
12 bu nun nɛnɛ kɑ ben nɔmɑ
kpɑ ɑ ku rɑ kɑ wunɛn nɑɑsu kperu sokurɑ.
13 Kɑɑ gbee sunɔ kɑ surɔkɔru yɔ ɑ sɑrɑ,
kpɑ ɑ gbee sunɔ kpɛmu kɑ yɑɑ gɔbɑ tem tɑɑre.
14 Yinni Gusunɔ u nɛɛ, yèn sɔ̃ u mɑn kĩ,
kon nùn yɑkiɑ kpɑ n nùn kɔ̃su domi u nɛn yĩsiru yɛ̃.
15 Ù n mɑn sokɑ kon nùn wurɑri.
Ko nɑ n wɑ̃ɑ kɑ wi nɔni swɑ̃ɑrun sɑɑ.
Kon nùn yɑkiɑ kpɑ n nùn bɛɛrɛ wɛ̃.
16 Kon de u tɔkɔru ko bɔri yɛndu sɔɔ,
kpɑ n nùn nɛn fɑɑbɑ sɔ̃ɔsi.