78
1 Womu ge Asɑfu u kuɑ. Ge wee.
Nɛn tɔmbu, i nɛn gɑri swɑɑ dɑkio.
I swɑɑ tem kpĩiyɔ i nɔ ye nɑ gerumɔ.
2 Kon bɛɛ fɑɑgi gɑɑ kuɑ kɑ mɔnnu ye yɑ sɑ̃ɑ yellun gɑri.
3 Ye sɑ nuɑ kɑ ye sɑ giɑ kɑ ye bɛsɛn bɑɑbɑbɑ bɑ sun sɔ̃ɔwɑ,
4 sɑ ǹ ye bɛsɛn bibu beruɑmmɛ.
Sɑ ko bu Yinni Gusunɔn tɔmɑru sɔ̃wɑ kɑ win dɑm gɑri kɑ sɔm mɑɑmɑɑkigii ni u kuɑ.
5 U bɛsɛ Isirelibɑ, Yɑkɔbun bweseru woodɑ wɛ̃.
Woodɑ yerɑ u bɛsɛn bɑɑbɑbɑ wɛ̃ bu kɑ ye ben bibu sɔ̃ɔsi.
6 Bii be bɑ koo mɑrurɑ, ben tii bɑ koo ye giɑ,
kpɑ bu mɑɑ ye ben bibu sɔ̃ɔsi.
7 Sɑɑ yerɑ bɑ koo Yinni Gusunɔ nɑɑnɛ ko.
Bɑ ǹ mɑɑ duɑrimɔ ye u kuɑ.
Kpɑ bu win woodɑbɑ mɛm nɔɔwɑ.
8 Bɑ ǹ mɑɑ mɔ̀ nge ben bɑɑbɑbɑ.
Domi bɑɑbɑ be, bɑ kuɑ mɛm nɔɔ sɑribɑ,
mɑ ben gɔ̃ru gɑ ǹ kɑ Gusunɔ turo yɔ̃re.
Mɑ bɑ kuɑ nɑɑnɛ sɑribɑ Gusunɔn mi.
9 Efɑrɑimun bweseru te tɑ tɛnnu mɔ
tɑ biruku yirɑ wurɑ tɑbun sɑɑ.
10 Tɑ ǹ ten ɑrukɑwɑni yibie ye tɑ kɑ Gusunɔ bɔkuɑ.
Tɑ yinɑ tu win woodɑbɑ mɛm nɔɔwɑ.
11 Tɑ win sɔm mɑɑmɑɑkigii ni duɑri ni u tu sɔ̃ɔsi.
12 U mɑɑmɑɑki kuɑ ben sikɑdobɑn wuswɑɑɔ Soɑniɔ Egibitin temɔ.
13 U nim wɔ̃ku bɛrɑ gɑ kpɑɑsinɑ gɑ yɔ̃rɑ nge gɑnɑ,
mɑ u derɑ bɑ tɔburɑ.
14 Guru wii wurorɑ u derɑ tɑ bu gbiiye sɔ̃ɔ sɔɔ.
Wɔ̃kuru, kpɑ u de dɔ̃ɔ yɑrɑ yɑ n sɔ̃ɔsire guru wii wuro te sɔɔ.
15 U kpenu bɛsukɑ gbɑburɔ,
mɑ nim bɑkɑm mu kurɑ bɑ nɔrɑ.
16 U derɑ nim mu yɑrɑ kpenun di,
mɑ mu kokumɔ nge dɑɑ bɑkɑrun nim.
17 Adɑmɑ kɑ mɛ, bɑɑbɑ be, bɑ wi, Wɔrukoo torɑrimɔwɑ bɑ dɔɔ.
Bɑ nùn seesiwɑ gbɑburu mi, mi gɑ̃ɑnu ku rɑ kpi.
18 Mɑ bɑ wi, Gusunɔ nɔɔ kuurɑ bɑ nùn dĩɑnu kɑnɑ ni bɑ kĩ.
19 Bɑ nɛɛ, kɑ gem, Gusunɔ u koo kpĩ u sun diisiɑ gbɑburu mini?
20 Geemɑ, Mɔwisi u kpee te so, mɑ nim mu kokɑ nge dɑɑrun nim.
Adɑmɑ u koo kpĩ u sun diisiɑ?
U koo kpĩ u sun yɑɑ wɛ̃ su tem?
21 Ye Yinni Gusunɔ u yeni kpuro nuɑ,
yerɑ win mɔru yɑ seewɑ nge dɔ̃ɔ
wi bɑ sɔ̃re win tɔmbu Isirelibɑn sɔ̃.
22 Domi bɑ ǹ nùn nɑɑnɛ kue.
Bɑ ǹ win somiru yĩiyɔ.
23 Kɑ mɛ, u guru wiru woodɑ wɛ̃.
Mɑ u wɔllun gɑmbobɑ kɛniɑ.
24 U derɑ dĩɑ ni bɑ mɔ̀ mɑnnɑ nu bu nɛɛyɑ sɑɑ wɔllun di.
25 U bu ye wɛ̃wɑ nge mɛ̀n nɔɔ bɑ kĩ.
Tɔn boko dimɑ bɑ di.
26 Yen biru, u derɑ woo gɑ nɑ
sɑɑ sɔ̃ɔ yɑri yerun di gɑ wɔllu swee.
Kɑ win dɑmɑ u woo seeyɑmɑ
sɔ̃ɔ yɛ̃sɑn nɔm dwɑru giɑn di,
27 mɑ u derɑ gunɔsu su sɑrɑmɑ
su bu wukiri nge tuɑ.
Su dɑbi nge yɑni sɛɛri nim wɔ̃kun goorɔ.
28 U derɑ su wɔrukɑ su tɛrie bɑɑmɑ ben sɑnsɑniɔ.
29 Mɑ Gusunɔ u bu wɛ̃ ye bɑ kĩ.
Mɑ bɑ di bɑ debɑ.
30 Adɑmɑ ye bɑ dimɔ bɑ ǹ kpɑ, dĩɑnu yibɑ ben nɔsɔ.
31 Sɑnɑm mɛyɑ Gusunɔ u kɑ bu mɔru kuɑ.
Mɑ u be bɑ dɑm bo go.
U ben ɑluwɑɑsibɑ so u sururɑ.
32 Kɑ mɛ, bɑ wure bɑ torɑ.
Bɑ ǹ win sɔm mɑɑmɑɑkigii ni nɑɑnɛ kue.
33 Mɑ Yinni Gusunɔ u bu doke bɛrum sɔɔ u ben wɑ̃ɑru nɔru koosiɑ nge woo.
U bu kɑm koosiɑ nɔni kpɑki teeru.
34 Yinni Gusunɔ ù n kĩ u bu go,
yerɑ ben gɑbu bɑ rɑ gɔsirɑmɛ win mi giɑ.
35 Kpɑ bu yɑɑyɑ mɑ wi, Wɔrukoowɑ u sɑ̃ɑ ben kpee bɑɑ mì bɑ rɑ kuke.
Wiyɑ u rɑ mɑɑ bu wɔre.
36 Adɑmɑ bɑ ku rɑ gem gere.
Bɑ rɑ n kĩ bu nùn nɔni wɔ̃kewɑ kɑ ben gɑri.
37 Ben gɔ̃ru gɑ ǹ kɑ nùn wɑ̃ɑ.
Bɑ ǹ mɑɑ ben ɑrukɑwɑni yibie.
38 Adɑmɑ kɑ mɛ, Yinni Gusunɔ u rɑ tii nɛnɛ
u kun win mɔru kpuro yɔ̃su.
U rɑ bu wɔnwɔndu kue,
kpɑ u bu ben durum wɔkɑ u kun bu go.
39 U rɑ yɑɑye mɑ bɑ sɑ̃ɑwɑ tɔmbu.
Bɑ sɑ̃ɑwɑ nge woo.
Gɑ̀ n doonɑ, gɑ ku rɑ wurɑmɛ.
40 Nɔn dɑbinɑ bɑ Gusunɔ seesi gbɑburɔ.
Nɔn dɑbinɑ bɑ win mɔru seeyɑ.
41 Bɑ mɑɑ wure bɑ nùn nɔɔ kuurɑ wi, wi u sɑ̃ɑ ben Yinni Dɛɛro.
42 Bɑ ǹ tɔ̃ɔ te yɑɑye tè sɔɔ u bu wɔrɑ yibɛrɛbɑn nɔmɑn di kɑ win dɑm.
43 Bɑ ǹ mɑɑ yɑɑye sɔm mɑɑmɑɑkigii ni u kuɑ Egibitiɔ kɑ Soɑnin gberu kpɑɑnɛɔ.
44 U Egibitigibun dɑɑnun nim gɔsiɑ yɛm,
mɑ bɑ kpɑnɑ bu mu nɔ.
45 U derɑ gbɑbu swɛ̃ɛ yi bu wɔri yi di.
Mɑ u derɑ surenu nu bu kɑm kuɑ.
46 U derɑ twee yi ben dĩɑnu wɔri yi di.
Mɑ u derɑ ben hɑniɑn ɑre kɑm kuɑ.
47 U derɑ guru kpenu nu ben resɛm gbɑɑnu kɑm koosiɑ.
Mɑ woorɑ ben dɑ̃ɑ gbɑɑnu sɑnkɑ.
48 U derɑ guru gbɑ̃ɑ kɑ guru kpenu ben yɑɑ sɑbenu di.
49 Mɑ u kɑ Egibitigii be mɔru seewɑ kɑ dɑm u bu nɔni sɔ̃ɔwɑ.
U derɑ gɔɔn gɔrɑdobɑ bɑ nɑ dɑbi dɑbinu bɑ bu wɔri.
50 U ǹ dere win mɔru yu goo sɛ̃ɛnɑ.
U bu kɛ̃si kɛ̃si bɑrɑnu kpɛ̃ɛ u kɑ bu go.
51 U Egibitigibu be, be bɑ sɑ̃ɑ Kɑmun bibun bweserun bii tɔn durɔ gbiikoo bɑɑwure go,
be, be bɑ sɑ̃ɑ ben ɑluwɑɑsirun bibu.
52 U derɑ win tɔmbɑ yɑrɑ nge yɑ̃ɑ gɔ̃ɔ ge gɑ yɑrimɑ gɔ̃run di.
Mɑ u bu kpɑrɑ gbɑburɔ.
53 U bu kpɑrɑ kɑ bɔri yɛndu, bɑ ǹ diirɑ.
Mɑ u derɑ nim wɔ̃ku gɑ ben yibɛrɛbɑ wukiri.
54 Mɑ u kɑ bu dɑ win tem dɛɛrɑmɔ,
guu ten mi, te u mwɑ kɑ win dɑm.
55 U bwese tukunu girɑ win tɔmbu Isirelibɑn sɔ̃.
Mɑ u tem mɛ bɔnu kuɑ u derɑ bɑ sinɑ mi, kuu bekuruginu sɔɔ.
56 Adɑmɑ bɑ Gusunɔ nɔɔ kuurɑ.
Bɑ wi, Wɔrukoo seesi.
Bɑ ǹ win woodɑbɑ mɛm nɔɔwɛ.
57 Bɑ Gusunɔ dɛsirɑri, mɑ bɑ kuɑ nɑɑnɛ sɑribɑ
nge mɛ ben bɑɑbɑbɑ bɑ rɑɑ kuɑ.
Bɑ wururɑ nge tɛn tèn kirikɑ yɑ kusirɑ.
58 Bɑ win mɔru seeyɑ kɑ ben bũu turɑnu.
Bɑ win nisinu seeyɑ kɑ ben bwɑ̃ɑrokunu.
59 Ye Gusunɔ u ye kpuro wɑ, yerɑ win mɔru seewɑ,
mɑ u Isirelibɑ yinɑ.
60 U sɑ̃ɑ yee te deri te tɑ wɑ̃ɑ Siloɔ.
U kuu bekurugii te deri tèn mi u rɑ kɑ bu yinnɛ.
61 Mɑ u derɑ yibɛrɛbɑ bɑ win woodɑn kpɑkororu mwɑ,
tè sɔɔ u rɑ win dɑm kɑ win yiiko sɔ̃ɔsi.
U derɑ bɑ kɑ tu doonɑ tem tukumɔ.
62 U kɑ win tɔmbu mɔru kuɑ,
mɑ u derɑ bɑ bu go tɑbu sɔɔ.
63 U derɑ ɑluwɑɑsibɑ bɑ dɔ̃ɔ mwɑɑrɑ,
mɑ wɔndiɑbɑ bɑ durɔbu biɑ.
64 U derɑ bɑ ben yɑ̃ku kowobu go tɑbu sɔɔ kɑ tɑkobi.
Mɑ ben gɔminibu bɑ ǹ ben gɔɔ swĩ.
65 Yerɑ Yinni Gusunɔ u seewɑ nge tɔnu wi u dom yɑndɑmɑ.
U seewɑ nge tɑbu durɔ wɔrugɔ wi tɑm mu goomɔ.
66 Mɑ u win yibɛrɛbɑ so u girɑ.
U bu sekuru doke te tɑ ǹ kpeemɔ sere kɑ bɑɑdommɑɔ.
67 U Efɑrɑimu Yosɛfun biin bweseru yinɑ.
U ǹ tu gɔsɑ.
68 Yudɑn bweseru kɑ Siɔnin guurɑ u kĩɑ u gɔsɑ.
69 Guuru miyɑ u win sɑ̃ɑ yeru bɑnɑ
tɑ dɑm mɔ nge wɔllu kɑ tem
mɛ u swĩi sere kɑ bɑɑdommɑɔ.
70 U Dɑfidi gɔsɑ u n kɑ sɑ̃ɑ win sɔm kowo.
Yɑ̃ɑ kpɑrɑ yerun diyɑ u nùn mwɑɑmɑ
71 u kɑ ko Isirelibɑ, Yɑkɔbun bweserun kpɑro
be, be bɑ sɑ̃ɑ wi, Yinni Gusunɔn tɔmbu.
72 Dɑfidi wi, u tɔn be kpɑrɑwɑ kɑ gɔ̃ru dɛɛrɔ, kɑ lɑɑkɑri.