77
1 Asɑfun womu ge u Yedutum kuɑ. Ge wee.
2 Nɑ Gusunɔ nɔɔgiru sue.
Nɑ nùn soku, u koo mɑn swɑɑ dɑki.
3 Nɑ̀ n nuki sɑnkire, nɑ rɑ Gusunɔ kɑsuwɑ.
Wɔ̃kuru nɑ ku rɑ wɛ̃re.
Nɑ rɑ nɛn nɔmɑ yiiyewɑ wɔllɔ nɑ̀ n kɑnɑru mɔ̀.
Adɑmɑ kɑ mɛ, nɛn bwɛ̃rɑ ku rɑ kpunɛ.
4 Nɑ̀ n Gusunɔ yɑɑyɑ, nɑ rɑ n weeweenu mɔ̀wɑ.
Nɑ̀ n bwisikɑ, nɛn gɔmɑ yɑ rɑ dwiiyewɑ.
5 Yinni Gusunɔ u ku rɑ de n dweeyɑ.
Nɑ ku rɑ kpĩ n gɑri gere nɛn nɔni swɑ̃ɑrun sɔ̃.
6 Nɑ rɑ yellu yɑɑyewɑ kpɑ nɑ n gɑsɔn gɑri bwisikumɔ.
7 Nɑ nɛn womusu yɑɑyɑmɔ wɔ̃kuru,
mɑ nɑ bwisikumɔ nɑ mɔ̀,
8 Yinni Gusunɔ u koo sun yinɑwɑ sere kɑ bɑɑdommɑɔ?
U ǹ mɑɑ kɑ sun nɔnu geu mɛɛrimɔ?
9 Win durom mu kpɑwɑ mi sere kɑ bɑɑdommɑɔ?
U ǹ mɑɑ gɑri gɛɛ mɔ u sun sɔ̃ sere kɑ bɑɑdommɑɔ?
10 U duɑriwɑ u sun durom kuɑ?
U sun win wɔnwɔndu wunɑriwɑ win mɔrun sɔ̃?
11 Mɑ nɑ nɛn tii sɔ̃ɔwɑ nɑ nɛɛ, wee ye yɑ mɑn dumɔ,
yerɑ Wɔrukoon dɑm kun mɑɑ kɑ sun wɑ̃ɑ.
12 Yinni Gusunɔ, kon wunɛn sɔmɑ yɑɑyɑ.
Domi nɑ yɑɑyɑ sɔm mɑɑmɑɑkigii ni ɑ kuɑ.
13 Kon wunɛn sɔmɑ kpuron gɑri kpɑrɑ.
Kon sɔm mɑɑmɑɑkiginun gɑri sɑɑri.
14 Gusunɔ, wunɛn swɛɛ yi dɛɛrewɑ.
Wɑrɑ u kɑ nun kpɑ̃ɑru nɛ.
15 A sɑ̃ɑwɑ wi u rɑ sɔm mɑɑmɑɑkiginu ko.
A derɑ wunɛn dɑm mu sɔ̃ɔsirɑ bwesenu sɔɔ.
16 Kɑ wunɛn dɑmɑ ɑ wunɛn tɔmbu yɑkiɑ
be, be bɑ sɑ̃ɑ Yɑkɔbu kɑ Yosɛfun sikɑdominu.
17 Gusunɔ, ye nim mu nun wɑ, mɑ mu diirɑ,
mu gbisɑ sere sɔɔwɔ.
18 Mɑ gurɑ nɛmɔ nge dɑɑ surundu.
Mɑ guru gbɑ̃sukubu nɔɔrɑmɔ.
Mɑ guru mɑɑkinu dɑɑmɔ wɔllun bɑɑmɑ.
19 Gurɑ yɑ gbɑ̃rɑ mɑ guru mɑɑkinu nu hɑnduniɑ kpuro yɑm bururɑsiɑ,
mɑ tem mu diirɑ bɛrum sɔ̃.
20 A sĩɑ nim wɔ̃kun wɔllɔ kɑ mɑɑ mɛn sɔɔwɔ.
Adɑmɑ goo kun wunɛn yirɑ wɑ.
21 A derɑ Mɔwisi kɑ Aroni bɑ wunɛn tɔmbu kpɑrɑ nge yɑ̃ɑ gɔ̃ɔ.