63
1 Dɑfidin womu. U gu kuɑwɑ sɑnɑm mɛ u wɑ̃ɑ Yudɑn gbɑburɔ. Ge wee.
2 Gusunɔ, ɑ sɑ̃ɑwɑ nɛn Yinni.
Wunɑ nɑ soku.
Nɑ wunɛn bɛkɛ bɑrɔ.
Mɑ nɛn wɑsi kpuro bɛsikirɑmɔ wunɛn sɑrirun sɔ̃
nge mɛ tem gbebum mu rɑ n bɛsikirɑmɔ nim sɑrirun sɔ̃.
3 Wee nɑ wɑ̃ɑ wunɛn sɑ̃ɑ yerɔ nɑ nun mɛɛrɑ,
kpɑ n kɑ wunɛn dɑm kɑ wunɛn yiiko wɑ.
4 Domi wunɛn tɔn geeru tɑ gisɔn wɑ̃ɑru kere.
Yen sɔ̃nɑ kon nun tɔmɑ kɑ womusu.
5 Kon nun siɑrɑ nɛn wɑ̃ɑru kpuro sɔɔ,
kpɑ n nɔmɑ suɑ wɔllɔ n kɑ nun sɑ̃.
6 Nɛn hunde koo debu
nge wi u dĩɑ duronu kɑ yɑɑ gumgiɑ di.
Kon nun siɑrɑ kɑ nuku dobun kuuki.
7 Nɑ̀ n kpĩ, nɑ rɑ n nun yɑɑyewɑ nɑ n wunɛn bwisikunu mɔ̀ wɔ̃kuru.
8 Domi ɑ sɑ̃ɑwɑ nɛn somiɔ.
Nɑ̀ n kukuɑ wunɛn kɑsenun kɔkɔrɔ,
nɑ rɑ n nuku dobu mɔ.
9 Nɑ kɑ nun mɑninɛwɑ dim dim,
mɑ wunɛn nɔm geu gɑ mɑn nɛni.
10 Be bɑ kɑsu bu mɑn go
bɑ koo dɑwɑ sere tem sɔɔ sɔɔwɔ.
11 Tɑkobiwɑ bɑ koo kɑ bu go,
kpɑ purukɑnu nu ben gonu tem.
12 Nɛ, sinɑ boko kon yɛ̃ɛri wunɛ sɔɔ.
Wi u kɑ nun bɔ̃ruɑ u koo tii siɑrɑ,
ɑdɑmɑ kɑɑ wee kowobun nɔsu kɔre.