55
1 Womu ge Dɑfidi u wom kowobun wirugii kuɑ kɑ mɔrɔku. Ge wee.
2 Yinni Gusunɔ, ɑ swɑɑ tem kpĩiyɔ ɑ nɛn kɑnɑru nɔ.
A ku mɑn biru kisi nɑ̀ n nun kɑnɑmɔ.
3 A nɛn lɑɑkɑri koowo kpɑ ɑ mɑn wisi.
Wee nɑ sirenɛ kɑ nuku sɑnkirɑru,
4 nɑ burisinɛ yibɛrɛbɑn gɑrin sɔ̃
kɑ tɔn kɔ̃sobun dɑm dɔrebun sɔ̃.
Tɔmbɑ mɑn kɔ̃sɑ kuɑmmɛ,
bɑ mɑn tɑɑrɛ wɛ̃ kɑ mɔru bɑkɑ.
5 Nɑ nuki sɑnkire too nɛn gɔ̃ruɔ.
Mɑ gɔɔn bɛrum mɑn nɛnuɑ.
6 Nɑ nɑndɑ sere nɑ diirimɔ.
7 Nɑ nɛɛ, nɑ̀ n dɑɑ kɑsɑ mɔ nge kpɑruko,
kon yɔ̃wɑ n dɑ n sinɑ nɑ n wɛ̃re.
8 Kon dukɑ yɑkurɑ n dɑ mi n tomɑ,
kpɑ nɑ n wɑ̃ɑ gbɑburɔ.
9 Kon dukɑ yɑkurɑ fuuku n kuku yeru kɑsu,
kpɑ guru woo dɑmguu gu ku rɑɑ mɑn so.
10 Yinni, ɑ nɛn yibɛrɛbɑn kpunɑɑ kɑm koosio,
kpɑ bu ku nɔɔsinɑ.
Domi nɑ wɑɑmɔ tɔmbɑ wɔbiɑ kɑ sɑnnɔsu mɔ̀ wuuɔ
11 bɑ kɑ gen gbɑ̃rɑru sikerenɛ sɔ̃ɔ sɔɔ kɑ wɔ̃kuru.
Mɛyɑ kɔ̃sɑ bɑ mɔ̀ wuu ge sɔɔ.
12 Nuku kɔ̃surugibu kɑ gbɛnɔbu kɑ keetɑgibɑ
bɑ yibɑ wuu ge sɔɔ.
13 Ǹ n yibɛrɛn nɑ u nɑ u mɑn wɔnwɑ,
nɑ ǹ gɑm gerumɔ.
Goo ù n mɑn tusɑ, kon kuke win sɔ̃.
14 Adɑmɑ wunɑ ɑ kuɑ mɛ,
wunɛ wi ɑ sɑ̃ɑ nɛn beruse kɑ nɛn bɔrɔ,
wunɛ wi nɑ rɑ nɛn ɑsiri sɔ̃.
15 Nɛ kɑ wunɛ, kĩi bɑkɑrɑ tɑ sun mɑninɛ,
mɑ sɑ dɔɔ sɑnnu Yinni Gusunɔn sɑ̃ɑ yerɔ.
16 A de gɔɔ u tɔn kɔ̃sobu sɛ̃re subɑru sɔɔ,
kpɑ bu dɑ gɔribun wɑ̃ɑ yerɔ wɑsiru.
Domi nuku kɔ̃surɑ yibɑ ben swɑɑ sɔɔ.
17 Adɑmɑ Yinni Gusunɔ, wunɑ nɑ fɑɑbɑ kɑnɑmɔ.
Kɑɑ mɑɑ mɑn fɑɑbɑ ko.
18 Tɔ̃ɔ giriru kpuro, nɑ rɑ n weeweenu mɔ̀wɑ.
Mɛyɑ ɑ mɑɑ nɛn nɔɔ nɔɔmɔ.
19 A ǹ kɑɑ de yibɛrɛbɑ bu mɑn nɔmɑ turi bɑɑ mɛ bɑ dɑbi.
Kɑɑ mɑn bɔri yɛndu wɛ̃.
20 Yinni Gusunɔ, wunɛ wi ɑ sɔ̃ wunɛn sinɑ gɔnɑɔ sere kɑ bɑɑdommɑɔ,
wunɑ kɑɑ nɛgii nɔ, kpɑ ɑ bu sekuru doke.
Domi n ǹ koorɔ bu gɔ̃ru gɔsiɑ
yèn sɔ̃ bɑ ǹ nun nɑsie.
21 Bɑ wi u kɑ bu wɑ̃ɑ bɔri yɛndu sɔɔ sɑnnɔ wɔri.
Bɑ ɑrukɑwɑni ye u kɑ bu bɔkuɑ kusiɑ.
22 Gɑri doriyɑ yi rɑ n wɑ̃ɑ tɔn kɔ̃so win nɔɔwɔ.
Adɑmɑ tɑbun gɑriyɑ yi rɑ n wɑ̃ɑ win nukurɔ.
Mɛyɑ mɑɑ win gɑri yi rɑ n kokumɔwɑ nge gum yɑrum.
Adɑmɑ yi rɑ n sɑ̃ɑwɑ nge tɑkobibɑ.
23 A wunɛn wɑ̃ɑru kpuro Yinni Gusunɔ nɔmu sɔndio,
kpɑ u nun nɔɔri.
Domi u ǹ derimɔ gemgii u wɔrumɑ.
24 Yinni Gusunɔ, wunɑ kɑɑ de tɔn kɔ̃sobu bu dɑ gɔribun wɑ̃ɑ yerɔ.
Kpɑ tɔn gowobu kɑ be bɑ bwisi kɔ̃si mɔ bu gbi sɛkum.
Adɑmɑ nɛ, wunɑ nɑ nɑɑnɛ sɑ̃ɑ, Yinni Gusunɔ.