45
1 Kĩrun womu ge Koren bibu bɑ wom kowobun wirugii kuɑ. Ge wee.
2 Nɛn gɔ̃ru gɑ bwisiku duronu yibɑ sere nu yɑrimɔ.
Nɑ womu geni mɔ̀ sunɔn sɔ̃.
Nɛn yɑrɑ yɑ sɑ̃ɑ nge yoro geon yorutiɑ.
3 Wunɑ ɑ burɑm bo tɔn bibun suunu sɔɔ.
Wunɛn gɑri yi durom yibɑ.
Yen sɔ̃nɑ ɑ Gusunɔn domɑru mɔ sere kɑ bɑɑdommɑɔ.
4 Tɑbu kowo dɑmgii, ɑ wunɛn tɑkobi bɛkio,
wunɑ ɑ yiiko kɑ bɛɛrɛ bɑkɑ mɔ.
5 Kɑ wunɛn sinɑndun dɑm,
ɑ wunɛn tɑbu kɛkɛ yɔɔwo ɑ dɑ ɑ nɑsɑrɑ suɑ,
kpɑ ɑ gem sɑnnɑ kɑ dɑɑ duudwiɑ kɑ geɑn kobu,
kpɑ ɑ sɔm mɑɑmɑɑkiginu ko kɑ wunɛn nɔm geun dɑm.
6 Wunɛn sɛ̃ɛnu nu nɔɔ do,
nu koo wunɛn yibɛrɛbɑ sɔku,
kpɑ tɔmbu bu wɔruku wunɛn wuswɑɑɔ.
7 Gusunɔ, bɑ wunɛn bɑndu swĩi sere kɑ bɑɑdommɑɔ.
Gemɑ ɑ kɑ wunɛn bɑndu nɛni.
8 A geɑ kĩ, mɑ ɑ kɔ̃sɑ tusɑ.
Yen sɔ̃nɑ Gusunɔ wi u sɑ̃ɑ wunɛn Yinni, u nun gɔsɑ.
U mɑɑ nun nuku dobu wɛ̃ ye u kɑ nun ɑye bɛɛrɛgiru wɛ̃
te tɑ wunɛn kpɑɑsibugiru kpɑ̃ɑru kere.
9 Wunɛn yɑ̃nu nu turɑre numɔ
ye bɑ rɑ soku miru kɑ ɑloɛsi kɑ kɑsi.
Bɑ mɔrɔkunu soomɔ ɑ kɑ nuku dobu wɑ
wunɛn sinɑ gbɑburɔ te bɑ suunu donnu mɑni mɑni.
10 Sinɑ bii wɔndiɑbɑ bɑ sɑ̃ɑ wunɛn kurɔ kpɑɑ sɑ̃kobu.
Kurɔ kpɑo u yɔ̃ wunɛn nɔm geuɔ u wurɑ sebuɑ ye yɑ nɑ Ofirin di.
11 A swɑɑ dɑkio, bii kurɔbu ɑ nɛn gɑri nɔ,
kpɑ ɑ yi bwisiku.
A wunɛn tɔmbu duɑrio kɑ wunɛn bɑɑn yɛnugibu.
12 Wunɛn burɑm mu kɑ sinɑ boko nɑɑwɑ gem gem.
A nùn bɛɛrɛ wɛ̃ɛyɔ yèn sɔ̃ u sɑ̃ɑ wunɛn yinni.
13 Tirin tɔmbu be bɑ bwesenu kpuro ɑrumɑni kere,
bɑ koo kɑ nun dukiɑ bwese bwesekɑ nɑɑwɑ
bu kɑ wunɛn kĩi geeru kɑsu.
14 Sinɑ bii wɔndiɑ kurɔ kpɑo wi, u wɑ̃ɑ sinɑ kpɑɑrɔ,
u yɑ̃nu sebuɑ ni bɑ burɑru koosi kɑ wurɑbɑ.
15 Bɑ kɑ nùn dɑ sunɔn mi kɑ win yɑ̃ɑ burɑ nɔnigii ni,
mɑ win kurɔ kpɑɑ sɑ̃kobɑ nùn swĩi.
16 Bɑ bu duusiɑ sinɑ kpɑɑrɔ kɑ nuku dobu kɑ yɛ̃ɛribu.
17 Sinɑ boko, wunɛn bibɑ koo wunɛn bɑɑbɑbɑn tubi di,
kpɑ bu bɑndu di tem kpuro sɔɔ.
18 Nɛn womu geni, gɑ koo de bu wunɛn yĩsiru yɑɑyɑ tɔ̃ru bɑɑtere,
kpɑ bwesenu kpuro nu nun siɑrɑ sere kɑ bɑɑdommɑɔ.