44
1 Womu ge Koren bibu bɑ wom kowobun wirugii kuɑ. Ge wee.
2 Gusunɔ, sɑ nuɑ kɑ bɛsɛn tiin swɑɑ
wunɛn sɔmɑ ye ɑ kuɑ bɛsɛn bɑɑbɑbɑn wɑɑti.
Berɑ bɑ sun ye sɔ̃ɔwɑ.
3 Kɑ wunɛn tiin nɔmɑ ɑ bwese tukunu girɑ.
A bwese ni so nu yɑrinɑ,
mɑ ɑ bɛsɛn bɑɑbɑbɑ swĩi nin wɑ̃ɑ yenɔ.
4 Bɛsɛn bɑɑbɑ be, bɑ bwese nin tem mwɑ.
N ǹ mɔ yèn sɔ̃ bɑ tɑkobi mɔ,
n ǹ mɑɑ mɔ yèn sɔ̃ bɑ dɑm mɔ,
ɑdɑmɑ yèn sɔ̃ ɑ bu kĩwɑ mɑ ɑ wɑ̃ɑ kɑ be,
mɑ ɑ bu yɑrɑ kɑ wunɛn nɔmu.
5 Gusunɔ, wunɑ ɑ sɑ̃ɑ nɛn sinɑ boko.
A wunɛn tɔmbu nɑsɑrɑ wɛ̃ɛyɔ.
6 Kɑ wunɛn dɑmɑ sɑ ko bɛsɛn yibɛrɛbɑ suriri.
Kɑ wunɛn yĩsirɑ sɑ ko bu suni.
7 Domi nɑ yɛ̃ mɑ n ǹ nɛn tɛndu,
ǹ kun mɛ nɛn tɑkobi yɑ koo mɑn fɑɑbɑ ko.
8 Wunɑ kɑɑ sun wɔrɑ bɛsɛn yibɛrɛbɑn nɔmɑn di.
Kpɑ ɑ be bɑ sun tusɑ burisinɑ.
9 Sɑ ko n woo kɑnɑmɔ tɔ̃ru bɑɑtere wunɛn sɔ̃,
sɑ n nun siɑrɑmɔ sere kɑ bɑɑdommɑɔ.
10 Kɑ mɛ, wee ɑ sun yinɑ, ɑ sun sekuru doke,
ɑ ku rɑ n mɑɑ kɑ bɛsɛn tɑbu kowobu wɑ̃ɑ bɑ̀ n tɑbu yɑriɔ.
11 A derɑ sɑ biruku yirɑ wurɔ bɛsɛn yibɛrɛbɑn wuswɑɑɔ,
be, be bɑ sun tusɑ bɑ bɛsɛn yɑ̃nu gurɑmɔ.
12 A sun bɛri ben nɔmɑɔ nge mɛ bɑ rɑ ɑrɑri yɑ̃ɑru nɔmu bɛrie.
Mɑ ɑ derɑ sɑ yɑrinɑ, sɑ yɑbi bwese tukunu sɔɔ.
13 A bɛsɛ, wunɛn tɔmbu dɔrɑmɔ gobi sɑri,
ɑ ǹ mɑɑ sun gɑrisi gɑ̃ɑ geenu.
14 Wee ɑ sun sekuru doke bɛsɛn berusebun wuswɑɑɔ,
15 be, be bɑ sun sikerenɛ, bɑ sun yɛ̃ɛmɔ, bɑ sun yɑɑkoru mɔ̀.
A derɑ bwese tukunu nu sun womu dokemɔ,
mɑ nu sun wii gimɑnu koosimɔ kɑ yɑɑkoru.
16 Wee sere kɑ tɛ̃, seku te, tɑ rɑ n mɑn mɔ̀wɑ,
kpɑ nɑ n nɛn wuswɑɑ wukiri
17 yèn sɔ̃ nɛn yibɛrɛ u mɑn wɔri, u wɔmmɔ
u mɑn nɔɔ kuurimɔ.
18 Yenibɑ kpurowɑ yɑ rɑ sun deemɛ.
Kɑ mɛ, sɑ ǹ nun duɑri,
sɑ ǹ mɑɑ wunɛn ɑrukɑwɑni kusie.
19 Bɛsɛn gɔ̃ru gɑ ǹ sĩire wunɛn min di,
sɑ ǹ mɑɑ gɛre wunɛn swɑɑn di.
20 Adɑmɑ kɑ mɛ, ɑ sun kɔsukɑ gbɑburɔ dɛmɑkunun wɑ̃ɑ yerɔ.
Mɑ ɑ sun yɑm wɔ̃kuru wukiri.
21 Gusunɔ, sɑ̀ n dɑɑ wunɛn yĩsiru duɑri,
mɑ sɑ dɑ sɑ bũnu gɑnu sɑ̃ɑmɔ,
22 ɑ ǹ kɑɑ tubu, wunɛ wi ɑ tɔnun gɔ̃run gɑri yɛ̃?
23 Adɑmɑ wunɛn sɔ̃nɑ bɑ sun goomɔ bururu kɑ yokɑ,
bɑ sun mɛɛrɑ nge yɑ̃ɑ ni bɑ kɑ dɔɔ bu go.
24 A dom yɑndo Yinni! Mbɑn sɔ̃nɑ ɑ do.
A dom yɑndo. A ku sun yinɑ sere kɑ bɑɑdommɑɔ.
25 Mbɑn sɔ̃nɑ ɑ wunɛn wuswɑɑ berumɔ.
Mbɑn sɔ̃nɑ ɑ ǹ bɛsɛn wɔnwɔndu mɔ̀.
A ǹ wɑ nge mɛ bɑ sun tɑɑre?
26 Domi sɑ nuki sɑnkire. Sɑ kpĩ tuɑ sɔɔ.
27 A seewo ɑ sun somi.
A sun wɔro wunɛn durom bɑkɑm sɔ̃.