29
1 Dɑfidin womu.
Bɛɛ be i wɑ̃ɑ wɔllɔ, i Yinni Gusunɔ siɑro
win yiiko kɑ win dɑm sɔ̃.
2 I win yĩsiru wɔlle suo,
kpɑ i yiirɑ win wuswɑɑɔ win dɛɛrɑrun sɔ̃.
3 Yinni Gusunɔ yiiko kpurogii
u derɑ gurɑ yɑ gbɑ̃rɑmɔ.
Win nɔɔ gɑ nɔɔrɑ guru winu sɔɔ.
U dɑm mɔ nim bɑkɑm wɔllɔ.
4 Win nɔɔ gɑ nɔɔrɑ kɑ dɑm kɑ yiiko.
5 Win nɔɔ ge, gɑ Libɑnin dɑ̃ɑ dɑmginu bɛsukumɔ.
6 U derɑ Libɑnin guunu nu yɔ̃ɔkumɔ
nge kɛtɛ kpɛmminu.
Mɑ guu te bɑ mɔ̀ Hɛɛmɔɔ tɑ suɑrɑ dikɑ
nge kɛtɛ gbeeku kpɛmbu.
7 Win nɔɔ gɑ derɑ guru mɑɑkinu koorɑmɔ.
8 Win nɔɔ gɑ nɔɔrɑ,
mɑ ye yɑ wɑ̃ɑ Kɑdɛsin gbɑburɔ kpuro yɑ diirɑ.
9 U gbɑ̃rɑ sere nɛm gurɑginu nu nɑndɑ nu mɑrɑ.
Mɑ dɑ̃nu kpuron wurusu dɛllɑ sɔ̃ɔwɔ.
Yerɑ win sinɑ kpɑɑrun di bɑ mɔ̀,
yiikogiiwɑ Yinni Gusunɔ.
10 Wiyɑ u dɑm mɔ nim wɔllɔ.
Wiyɑ u ko n sɑ̃ɑ sunɔ sere kɑ bɑɑdommɑɔ.
11 Wiyɑ u koo mɑɑ tɔmbu dɑm kɛ̃.
Wiyɑ u koo bu domɑru kuɑ u bu bɔri yɛndu wɛ̃.