5
1 Dɑfidin womu ge u wom kowobun wirugii kuɑ kɑ gɑɑsirɑru. Ge wee.
2 Yinni Gusunɔ, ɑ mɑn swɑɑ dɑkio.
Gusunɔ, ɑ nɛn weeweenu nɔɔwɔ.
3 Yinni Gusunɔ, ɑ nɛn wuri swɑɑ dɑkio.
Yinni, nɛn sinɑ boko, wunɑ nɑ kɑnɑmɔ.
4 Yinni Gusunɔ, ɑ rɑ nɛn kɑnɑru nɔ bururu.
Yinni Gusunɔ, ɑ rɑ nɛn nɔɔ nɔ sɔ̃ɔ ù n yɑrɑ.
Wee nɑ wunɛn wisibu mɑrɑ.
5 Yinni Gusunɔ, ɑ ku rɑ kɔ̃sɑ kɑ̃.
Kɔ̃sɑn kowobu bɑ ǹ wɑ̃ɑ yeru wɑsi wunɛn mi.
6 Tii suobu bɑ ǹ kpɛ̃ bu yɔ̃rɑ wunɛn mi.
A kɔ̃sɑn kowobu tusɑ.
7 A tɔn gowobu tusɑ.
A tɑki diobu tusɑ.
A rɑ wee kowobu kpeerɑsie.
8 Adɑmɑ nɛ, wunɛn durom bɑkɑm sɔ̃nɑ
kon kpĩ n dɑ wunɛn sɑ̃ɑ yerɔ.
Wunɛn durom bɑkɑm sɔ̃nɑ
kon kpĩ n yiirɑ mi ɑ wɑ̃ɑ.
Miyɑ kon kpĩ n nun bɛɛrɛ wɛ̃.
Miyɑ kon kpĩ n nun sɑ̃.
9 Yinni Gusunɔ, ɑ sɑ̃ɑwɑ bɔrɔkini.
Yinni Gusunɔ, ɑ mɑn swɑɑ sɔ̃ɔsio ye ɑ kĩ n swĩi.
Yinni Gusunɔ, ɑ nɛn yibɛrɛbɑ sɔ̃ɔsio mɑ
wunɑ ɑ mɑn kpɑre.
10 Ben gɑri kun nɑɑnɛ mɔ.
Ben yɑrɑ yɑ rɑ n tɔmbu fufu mɔ̀wɑ.
Kɔ̃sɑ ben bwisikunu nu rɑ n nɑɑ gire.
Kɑm kobɑ ben gere yɑ rɑ kɑ nɛ.
11 A bu nɔni sɔ̃ɔwɔ ben tɑɑrɛn sɔ̃.
A bu sureo ben tiin yinɑ sɔɔ.
A bu giro wunɛn wuswɑɑn di,
domi ben durum yɑ kpɑ̃.
Bɑ mɑɑ nun seesi.
12-13 Be bɑ sɑ̃ɑ wunɛgibu, kɑɑ de bu nuku dobu wɑ.
Kɑɑ de bu kɑtinu kɑrɑ.
Kɑɑ de bu yɛ̃ɛri. Kɑɑ bu kɔ̃su.
Kɑɑ bu domɑru kuɑ.
Kɑɑ bu gɑnɛ nge tɛrɛru wunɛn kĩrun sɑɑbu,
domi bɑ nun kĩ,
mɑ bɑ nun mɛm nɔɔwɑmmɛ.