3
1 Sɔɔlun yɛnugibu bɑ kɑ Dɑfidi yibɛrɛ tɛɛru kuɑ n tɛ. Mɑ Sɔɔlun yɛnu gɑ dɑm dwiiyɑmɔ gɑ dɔɔ, ɑdɑmɑ Dɑfidiguu gɑ dɑm sosimɔwɑ gɑ dɔɔ.
Dɑfidin bii be u mɑrɑ
Heboroniɔ
(I mɑɑ mɛɛrio Bɑndun Gɑri I, 3:1-4)
2 Sɑɑ ye sɔɔ, Dɑfidi u bibu nɔɔbɑ tiɑ mɑrɑ Heboroniɔ. Ben gbiikoowɑ Amɔɔ. Win mɛrowɑ Akinɔɑmu, Yisirɛɛligii. 3 Yirusewɑ Kileɑbu. Win mɛrowɑ Abigɑli, Nɑbɑli Kɑɑmɛligiin gɔmini. Itɑsewɑ Abusɑlɔmu. Win mɛrowɑ Mɑɑkɑ, Tɑlimɑi Gesuribɑn sinɑ bokon bii. 4 Nnɛsewɑ Adoniyɑ. Win mɛrowɑ Hɑgiti. Nɔɔbusewɑ Sefɑtiɑ. Win mɛrowɑ Abitɑli. 5 Nɔɔbɑ tiɑsewɑ mɑɑ Yitereɑmu. Win mɛrowɑ Egilɑ.
Abinɛɛ kɑ Isi Bosɛti
bɑ ǹ nɔɔsinɛ
6 Sɑɑ ye tɑbu wɑ̃ɑ Dɑfidin yɛnu kɑ Sɔɔlun yɛnun bɑɑ sɔɔ, Abinɛɛ u kɑ Sɔɔlubɑ yɔ̃rɑwɑ dim dim. 7 Adɑmɑ sɔ̃ɔ teeru Isi Bosɛti u Abinɛɛ sɔ̃ɔwɑ u nɛɛ, mbɑn sɔ̃nɑ ɑ kɑ nɛn tundo Sɔɔlun kurɔ Risipɑ, Ayɑn bii kpunɑ.
8 Mɑ Isi Bosɛtin gɑri yi, yi Abinɛɛ duɑ. Mɑ u nɛɛ, ɑ tɑmɑɑ nɑ sɑ̃ɑwɑ nge Yudɑn wirugii be bɑ Sɔɔlu seesimɔ? Wee, sere kɑ tɛ̃, nɛnɑ nɑ wunɛn tundo Sɔɔlun yɛnugibu kɑ win bɔrɔbɑ durom kuɑmmɛ. Yen biru nɑ ǹ wure n nun Dɑfidi nɔmu sɔndiɑ. Yerɑ tɛ̃ ɑ mɑn gerusimɔ kurɔ winin sɔ̃? 9 Ǹ n mɛn nɑ, Gusunɔ u mɑn kuɑ ye u kĩ nɑ̀ kun kɑ Dɑfidi yɔ̃re kpɑ n de Gusunɔ u win nɔɔ mwɛɛru yibiɑ te u nùn kuɑ, 10 ye u nɛɛ u koo bɑndu wunɑ sɑɑ Sɔɔlun bweserun di u tu Dɑfidi wɛ̃ kpɑ u n sɑ̃ɑ sunɔ Isirelibɑ kɑ Yudɑbɑn tem kpuro sɔɔ.
11 Sɑɑ ye sɔɔ, Isi Bosɛti kun mɑɑ gɑ̃ɑnu geruɑ. Domi Abinɛɛn gɑri yi, yi nùn bɛrum mwɑ.
Abinɛɛ kɑ Dɑfidi bɑ dorɑ
12 Yerɑ Abinɛɛ u Dɑfidi sɔmɔbu gɔriɑ Heboroniɔ u nɛɛ, wɑrɑ u tem mɛ mɔ. Yen sɔ̃, u be kɑ mɑn ɑrukɑwɑni bɔkuo. Ko nɑ n wɑ̃ɑ kɑ wi, kpɑ n de Isirelibɑ kpuro bu wurɑ win mi giɑ.
13 Ye sɔmɔ be, bɑ turɑ mi, bɑ Dɑfidi gɑri yi sɑɑriɑ. Yerɑ u bu sɔ̃ɔwɑ u nɛɛ, yɑ wɑ̃, kon kɑ be nùn ɑrukɑwɑni bɔke. Adɑmɑ gɑ̃ɑ teenɑ nɑ nùn bikiɑmɔ. Niyɑ u ginɑ mɑn Mikɑli, Sɔɔlun bii mwɑɑmɑ su sere wɑɑnɑ nɛ kɑ wi. 14 Mɑ Dɑfidi u Isi Bosɛti sɔmɔbu gɔriɑ bu nùn sɔ̃ bu nɛɛ, bu be nùn win kurɔ Mikɑli wɛ̃ɛmɑ wìn dokuru u rɑɑ kɔruɑ kɑ Filisitibɑn sen sɑrusu wunɔbu (100) si bɑ nùn bikiɑ. 15 Yerɑ Isi Bosɛti u derɑ bɑ kurɔ wi mwɑɑmɑ Pɑtiɛli, Lɑisin biin min di mi u mɔre. 16 Mɑ Pɑtiɛli wi, u Mikɑli swĩi u sumɔ sere bɑ kɑ turɑ Bɑhurimuɔ. Mɑ Abinɛɛ u nùn sɔ̃ɔwɑ u nɛɛ, ɑ den gɔsiro. Yerɑ u gɔsirɑ u wurɑ win yɛnuɔ.
17 Yen biru Abinɛɛ u Isirelibɑn guro gurobu mɛnnɑ u bu sɔ̃ɔwɑ u nɛɛ, Dɑfidiwɑ i rɑɑ kĩ u n sɑ̃ɑ bɛɛn sinɑ boko. 18 Yen sɔ̃ tɛ̃, i nùn koowo sunɔ. Domi Yinni Gusunɔ u rɑɑ geruɑ u nɛɛ, sɑɑ win bɔ̃ɔ Dɑfidin nɔmɑn diyɑ u koo win tɔmbu Isirelibɑ yɑkiɑ Filisitibɑn nɔmɑn di kɑ sere mɑɑ ben yibɛrɛ be bɑ tien nɔmɑn di.
19-20 Mɑ Abinɛɛ u dɑ u Bɛnyɑmɛɛbɑ be bɑ sɑ̃ɑ Sɔɔlun bweseru deemɑ u bu gɑri yi sɔ̃ɔwɑ. Mɑ bɑ tɔmbu yɛndu gɔsɑ bɑ nùn yɔ̃siri bɑ dɑ Dɑfidin mi. Ye bɑ turɑ mi, yerɑ u Dɑfidi sɔ̃ɔwɑ kpuro ye Isirelibɑ kɑ Bɛnyɑmɛɛbɑ bɑ gɔ̃ru doke bu ko. Mɑ Dɑfidi u bu tɔ̃ɔ bɑkɑ dim kuɑ. 21 Yen biruwɑ Abinɛɛ u mɑɑ Dɑfidi sɔ̃ɔwɑ u nɛɛ, yinni sinɑ boko, kon se n dɑ n Isirelibɑ kpuro mɛnnɑ kpɑ bu kɑ nun ɑrukɑwɑni bɔke bɑ n kɑ wunɛn gɑri sɔmburu mɔ̀. Kpɑ ɑ n bɑndu dii be sɔɔ, ɑ n mɔ̀ ye ɑ kĩ.
Yen biru Dɑfidi u derɑ Abinɛɛ u gɔsirɑ u dɑ win yɛnuɔ kɑ bɔri yɛndu.
Yoɑbu u Abinɛɛ go
22 Sɑɑ ye sɔɔ, Dɑfidin tɑbu kowobu bɑ gɑbu wɔrɑɑ dɑ, mɑ bɑ dukiɑ bɑkɑ gurɑmɑ bɑ kɑ wee. N deemɑ Dɑfidi u derɑ Abinɛɛ u gɔsirɑ win yɛnuɔ kɑ bɔri yɛndu sɑɑ Heboronin di. 23 Sɑnɑm mɛ Yoɑbu kɑ tɑbu kowo be, bɑ tunumɑ yɛnuɔ, yerɑ bɑ bu Abinɛɛn lɑbɑɑri sɔ̃ɔwɑ. Bɑ nɛɛ, Abinɛɛ, Nɛrin bii, u nɑ Dɑfidi sinɑ bokon mi. Adɑmɑ Dɑfidi u nùn deri u doonɑ kɑ bɔri yɛndu. 24 Yerɑ Yoɑbu u dɑ u sinɑ boko deemɑ u nɛɛ, mbɑn sɔ̃nɑ ɑ kuɑ mɛ. Ye Abinɛɛ u nɑ wunɛn mi, mɑ ɑ nùn deri u doonɑ kɑ bɔri yɛndu? 25 Wunɛn tii ɑ Abinɛɛ wi yɛ̃. A yɛ̃ mɑ u nɑwɑ u kɑ nun nɔni wɔ̃ke kpɑ u kɑ giɑ ye ɑ mɔ̀ kpuro.
26 Ye Yoɑbu u gɑri yi geruɑ u kpɑ, yerɑ u doonɑ Dɑfidin min di, mɑ u sɔmɔbu gɔrɑ bɑ Abinɛɛ nɑɑ swĩi, bɑ nùn nɑɑmwɛ Sirɑn dɔkɔwɔ. Mɑ bɑ derɑ u gɔsirɑmɑ. Adɑmɑ Dɑfidi u ǹ yenibɑ kpuro yɛ̃. 27 Sɑɑ ye Abinɛɛ u gɔsirɑmɑ Heboroniɔ, yerɑ Yoɑbu u nun sokɑ wuun gbɑ̃rɑrun kɔnnɔn bee tiɑɔ, u kuɑ nge u kĩ u nùn gɑri ɑsirigii sɔ̃. Mɑ u nùn wobu sɛ̃u sɔkɑ nukurɔ u go. Nge mɛyɑ u kɑ mɔru kɔsiɑ yèn sɔ̃ u win wɔnɔ Asɑɛli go.
28 Yen biruwɑ Dɑfidi u ye nuɑ, mɑ u nɛɛ, nɛn bɑndu tɑ dɛɛre Yinni Gusunɔn wuswɑɑɔ, nɛn tii nɑ mɑɑ dɛɛre, Abinɛɛ, Nɛrin biin yɛm mɛ bɑ yɑrin sɔ̃. 29 Yen sɔ̃, Gusunɔ u de mu wɔri Yoɑbun wirɔ kɑ sere mɑɑ win bweserɔ. Kpɑ win bweseru sɔɔ, goo u n dɑ n yɛm wĩimɔ, ǹ kun mɛ u n bɑrɑ disigiru mɔ, ǹ kun mɛ u n sɑ̃ɑ yɛmɔ, ǹ kun mɛ u gbi tɑbu sɔɔ, ǹ kun mɛ u dĩɑnu biɑ u di.
30 Nge mɛyɑ Yoɑbu kɑ win wɔnɔ Abisɑi bɑ kɑ Abinɛɛ go yèn sɔ̃ u ben wɔnɔ Asɑɛli go tɑbu sɔɔ Gɑbɑoniɔ.
31 Mɑ Dɑfidi u Yoɑbu kɑ tɔn be bɑ wɑ̃ɑ mi sɔ̃ɔwɑ u nɛɛ, i bɛɛn yɑ̃ɑ ni i doke mi kɑsukuo kpɑ i sɑɑkibɑ dewe nuku sɑnkirɑnun sɔ̃, kpɑ i Abinɛɛn gɔɔ swĩ.
Mɑ wi, Dɑfidin tii, u goo te swĩi ye bɑ kɑ tu dɔɔ bu sike. 32 Mɑ bɑ Abinɛɛn goo te sikuɑ Heboroni mi. Yerɑ wi Dɑfidi sinɑ boko u wurɑ kuɑ kɑ dɑm siki ten mi. Mɑ tɔn be bɑ wɑ̃ɑ mi, bɑ swĩ. 33 Win gɔɔ wuri sɔɔ u nɛɛ,
Abinɛɛ, mbɑn sɔ̃nɑ ɑ gu nge tɔn gowo.
34 Bɑ ǹ nun mwɛ bɑ nɔmɑ kɑ nɑɑsu bɔkue.
A wɔrumɑ ɑ gu nge wi tɔn kɔ̃sobɑ so bɑ go.
Yerɑ tɔmbu kpuro bɑ kpɑm wure bɑ swĩ. 35 Yen biru bɑ mɑɑ nɑ bɑ Dɑfidi nukuru yɛmiɑsiɑ bɑ nɛɛ, u dio. Adɑmɑ u yinɑ, domi u Yinni Gusunɔ nɔɔ mwɛɛru kuɑ u nɛɛ, Gusunɔ u nùn kuɑ ye u kĩ, ù n di sɔ̃ɔ u sere du.
36 Mɑ tɔmbu kpuro bɑ wɑ ye Dɑfidi sinɑ boko u kuɑ mɑ yɑ bu dore. 37 Dɑfidin tɔmbu kɑ Isirelibɑ kpuro gesi, bɑ giɑ mɑ n ǹ kɑ win yɛ̃ru bɑ kɑ Abinɛɛ, Nɛrin bii go. 38 Mɑ sinɑ boko u win bwɑ̃ɑbu sɔ̃ɔwɑ u nɛɛ, i n yɛ̃ mɑ tɔn bokowɑ u gu mi gisɔ Isireliɔ. 39 Wee, nɑ ǹ dɑm mɔ, bɑɑ mɛ bɑ mɑn gum tɑ̃re wirɔ nɑ kɑ kuɑ sunɔ. Seruyɑn bibu bɑ mɑn bɔbunu kere. Yen sɔ̃, Gusunɔ u tɔn kɔ̃so nùn win nuku kɔ̃suru kɔsie.