Bɑ Isi Bosɛti go
4
1 Sɑɑ ye Sɔɔlun bii Isi Bosɛti u nuɑ mɑ Abinɛɛ u gu Heboroniɔ, yerɑ win gɔmɑ kpuro dwiiyɑ. Mɑ Isirelibɑ kpuro bɑ nɑndɑ.
2 Sɔɔlun bii wi, u tɑbu sinɑmbu yiru mɔ be bɑ rɑ tɑbu kowobu kpɑre bu kɑ wɔrɑɑ dɑ. Beyɑ Bɑɑnɑ kɑ Rekɑbu. Be kpuro bɑ sɑ̃ɑwɑ Rimɔɔ, Beerɔtugiin bibu Bɛnyɑmɛɛn bweseru sɔɔ. 3 Beerɔtu ye, yɑ wɑ̃ɑwɑ Bɛnyɑmɛɛn tem sɔɔ. Adɑmɑ yen tɔmbu bɑ duki suɑ mɑ bɑ dɑ bɑ wɑ̃ɑ Gitɑimuɔ sere kɑ gisɔn gisɔ. 4 N deemɑ Yonɑtɑm, Sɔɔlun bii turo u bii tɔn durɔ mɔ wi bɑ mɔ̀ Mɛfibosɛti. Bii wi, u kuɑ yɛmɔ. Wɔ̃ɔ nɔɔbuwɑ u mɔ sɑnɑm mɛ Sɔɔlu kɑ Yonɑtɑm bɑ gu Yisirɛɛliɔ tɑbu sɔɔ. Ye kurɔ wi u bii wi nɔɔrimɔ u gɔɔ win lɑbɑɑri nuɑ, yerɑ u bii wi suɑ u kɑ doonɔ. Ye u dukɑ mɔ̀ kɑ sɛndɑru mɑ u wɔrumɑ u nùn surɑ. Min diyɑ bii wi, u kuɑ yɛmɔ.
5 Yerɑ sɔ̃ɔ teeru Bɑɑnɑ kɑ Rekɑbu bɑ dɑ Isi Bosɛtin dirɔ sɔ̃ɔ sɔɔ mi u do u sɔ̃ɔ sure. 6-7 Mɑ bɑ duɑ sere dii ten sɔɔwɔ nge bɑ kĩ bu dobi suɑ. Ye bɑ turɑ mi u kpĩ, yerɑ bɑ nùn woburu sɔkɑ bɑ go. Mɑ bɑ win wiru burɑ bɑ kɑ doonɑ. Mɑ bɑ swɑɑ mwɑ ye yɑ dɔɔ Yuudɛnin wɔwɑ giɑ. Yen dɔmɑ te, wɔ̃ku girirɑ bɑ sĩɑ. 8 Yerɑ tɔn be, bɑ kɑ Isi Bosɛtin wii te dɑ Dɑfidin mi, Heboroniɔ, bɑ nɛɛ, wunɛn yibɛrɛ Sɔɔlu wi u kɑsu u nun hunde wunɑ, win bii Isi Bosɛtin wiru wee. Yinni Gusunɔwɑ u Sɔɔlu kɑ win bweseru mɔru kɔsie gisɔ wunɛn sɔ̃.
9-11 Dɑfidi u Rekɑbu kɑ Bɑɑnɑ wisɑ u nɛɛ, i ǹ yɑɑye sɔmɔ wi u nɑ u mɑn Sɔɔlun gɔɔ sɔ̃ɔwɑ, mɑ u tɑmɑɑ lɑbɑɑri geɑ u mɑn nɔɔsiɑmɔ, ɑdɑmɑ nɑ derɑ bɑ nùn mwɑ bɑ go Sikilɑgiɔ? Nɑ nùn win lɑbɑɑrin ɑre wɛ̃. Kɑɑ sere gere tɔn kɔ̃sobu be bɑ tɔnu wi u kun gɑ̃ɑnu kue kɑ̃ɑsi bɑ go win dirɔ mi u kpĩ? Sere kɑ Yinni Gusunɔn wɑ̃ɑru wi u mɑn wɔrɑ sɑɑ nɔni swɑ̃ɑru kpuron di, kon de bu bɛɛ gowɑ.
12 Mɑ u win tɑbu kowobu sɔ̃ɔwɑ u nɛɛ, bu Rekɑbu kɑ Bɑɑnɑ mɔɔ bu go. Yerɑ bɑ ben nɑɑsu kɑ nɔmɑ bɔɔrɑ, yen biru bɑ bu bwɛ̃ Heboronin dɑɑ burerun bɔkuɔ. Mɑ bɑ Isi Bosɛtin wii te suɑ bɑ sikuɑ Abinɛɛn sikirɔ Heboroni mi.