Siribun woodɑ
25
1 Nɔɔsinɑɑ sɑriru tɑ̀ n duɑ tɔmbu gɑbun bɑɑ sɔɔ, mɑ bɑ dɑ siri yerɔ bɑ bu siriɑ, sɑɑ ye sɔɔ, wi u gem mɔ, i nùn win gem wɛ̃ɛyɔ. Wi u mɑɑ tɑɑrɛ mɔ kpɑ i nùn win tɑɑrɛ wɛ̃. 2 Wi siribu di, bɑ̀ n nùn soberu bure, siri kowo u koo de yɛ̃ro u kpunɑwɑ win wuswɑɑɔ kpɑ bu nùn so nge mɛ win torɑrɑ nɛ. 3 Adɑmɑ bu ku sɛni nɔɔ weeru sɑrɑ, domi yɑ̀ n kerɑ mɛ, i bɛɛn mɛro bisi wi bɛɛrɛ birɑwɑ mi.
Nɑɑ yɑ̀ n sɔmburu mɔ̀ dĩɑnɔn
woodɑ
4 I ku bɛɛn nɑɑ kinɛrun nɔɔ bɔke sɑɑ ye tɑ sɔmburu mɔ̀ dĩɑnu sɔɔ.
Gɔmini wi u kun bii mɔn
woodɑ
5 Mɔɔ kɑ wɔnɔ bɑ̀ n wɑ̃ɑ yɛnu teu sɔɔ, mɑ mɔɔ u gu u#ǹ bii mɑrɑ, win gɔmini wi, u ku yɑri yɛnu min di u mɔrɑru dɑ gɑm. Win durɔn wɔnɔ wiyɑ u koo nùn suɑ kurɔ. 6 Bɑ̀ n bii tɔn durɔ mɑrɑ, bɑ koo bii gbiikoo wi gɑrisiwɑ wi u gu min bii kpɑ win yĩsiru tu wɑ tɑ n wɑ̃ɑ Isirelibɑn suunu sɔɔ.
7 Goo ù n yinɑ u win mɔɔn kurɔ gɔmini suɑ, kurɔ wi, u doo siri yerɔ u wuun guro gurobu deemɑ kpɑ u bu sɔ̃ u nɛɛ, nɛn durɔn wɔnɔ u yinɑ u mɑn suɑ kurɔ u kɑ win mɔɔ bii mɑruɑ win yĩsiru tu kɑ wɑ tɑ n wɑ̃ɑ Isirelibɑn suunu sɔɔ. 8 Sɑɑ ye sɔɔrɑ wuun guro guro be, bɑ koo durɔ wi soku kpɑ bu nùn gɑri yi bikiɑ. Ù n yinɑn nɑ mɑm mɑm u win mɔɔn gɔmini wi suɑ kurɔ, 9 kurɔ wi, u koo dɑwɑ u win bɑrɑ nɔɔ teu wunɑ guro guro ben wuswɑɑɔ, kpɑ u nùn yɑ̃ɑtɑm sie kpɑ u gere u nɛɛ, wee nge mɛ bɑ rɑ durɔ kue wi u yinɑ u win mɔɔ bii mɑruɑ. 10 Kpɑ bu win bweseru yĩsiru kɛ̃ Isirelibɑ sɔɔ bu nɛɛ, wìn bɑrɑ nɔɔ bɑ wunɑn bweseru.
Ye bɑ yinɑ sɑnnɔ sɔɔ
11 Tɔn durɔbu yiru bɑ̀ n sɑnnɑmɔ, kpɑ mi bɑ sɑnnɑmɔ mi, ben turon kurɔ u nɑ u kɑ win durɔ wɔrɑ win yibɛrɛn nɔmɑn di, kpɑ u yibɛrɛ win tɔn durɔru nɛnɛ, 12 sɑɑ ye sɔɔ, i kurɔ win nɔmu ge buro. I ku nùn wɔnwɔndu kuɑ.
Tenkurun swɑɑn woodɑ
13 I ku kiɑru dɔrenɑ kɑ tɑki, i de bɛɛn kilo yɑ n sɑ̃ɑ dee dee, kpɑ yen gɑɑ kun gɑɑ kere. 14 I de bɛɛn sɑkɑkunu nu n sɑ̃ɑ dee dee. I ku de gɑgu gɑ n gɑgu kere. 15 I de bɛɛn kilo yɑ n sɑ̃ɑ dee dee kpɑ bɛɛn sɑkɑkunu nu n sɑ̃ɑ tiɑ. Kpɑ bɛɛn wɑ̃ɑru tu wɑ tu dɑkɑɑ dɑ tem mɛ Gusunɔ bɛsɛn Yinni u koo bɛɛ wɛ̃ sɔɔ. 16 Domi Gusunɔ bɛsɛn Yinni wi, u be bɑ yen bweseru mɔ̀ tusɑ.
Amɑlɛkibɑn kpeerɑsiɑbu
17 I yɑɑyo ye Amɑlɛkibɑ bɑ bɛɛ kuɑ sɑɑ ye i wee Egibitin di, 18 i wɑsire, mɑ bɑ bɛɛ wɔri birun di bɑ be bɑ wɑ̃ɑ biruɔ go go, bɑ#ǹ Gusunɔn bɛrum kue. 19 Sɑɑ yè sɔɔ Gusunɔ bɛsɛn Yinni u koo bɛɛ wɛ̃rɑbu wɛ̃ u de yibɛrɛbɑ kpuro bu bɛɛ deri tem mɛ u koo bɛɛ wɛ̃ sɔɔ mu n kɑ sɑ̃ɑ bɛɛgim, i ko i Amɑlɛkibɑ kpuro kɑm koosiɑwɑ kpɑ bu ku mɑɑ ben yĩsiru yɑɑyɑ hɑnduniɑ sɔɔ. I ku rɑ ye duɑri.