Dĩɑ gbiikinun woodɑ
26
1 Ì n dɑ i duɑ tem mɛ Gusunɔ bɛsɛn Yinni u koo bɛɛ wɛ̃ sɔɔ, mɑ i mu mwɑ, i sinɑ mɛ sɔɔ, 2 i de bɛɛn bɑɑwure u win gbeɑn dĩɑ gbiikinu tɑmɑ ni u duurɑ tem mɛ sɔɔ, u nu doke bireru sɔɔ u kɑ nɑ Gusunɔ bɛsɛn Yinnin sɑ̃ɑ yerɔ, 3 kpɑ u dɑ sɑɑ ye sɔɔn yɑ̃ku kowon mi, u nùn sɔ̃ u nɛɛ, u gerumɔ Gusunɔ win Yinnin wuswɑɑɔ gisɔ mɑ u duɑ tem mɛ sɔɔ, mɛ Yinni Gusunɔ wi, u bɛsɛn bɑɑbɑbɑ nɔɔ mwɛɛru kuɑ u nɛɛ, u koo sun wɛ̃. 4 Kpɑ yɑ̃ku kowo wi, u yɛ̃ro bire te mwɑɑri u yi Gusunɔ bɛsɛn Yinnin yɑ̃ku yerun wuswɑɑɔ. 5 Kpɑ yɛ̃ro u gere Gusunɔn wuswɑɑɔ u nɛɛ, win sikɑdo u sɑ̃ɑwɑ Arɑmugii wi u kun wɑ̃ɑ yeru mɔ. U dɑ Egibitiɔ u sinɑ mi kɑ tɔmbu fiiko be bɑ wɑ̃ɑ kɑ wi. Yen biru, tɔn be, bɑ dɑbiɑ bɑ kuɑ bwese dɑmgiru. 6 Adɑmɑ Egibitigibu bɑ bu dɑm dɔre, bɑ bu nɔni sɔ̃ɔwɑ, mɑ bɑ bu kuɑ yobu. 7 Yerɑ bɑ Gusunɔ bɛsɛn bɑɑbɑbɑn Yinni nɔɔgiru sue, mɑ u begiɑ nuɑ. U ben nɔni swɑ̃ɑru wɑ kɑ dɑm mɛ bɑ bu dɔremɔ kɑ nge mɛ bɑ bu tɑɑre. 8 Yen biru, u bu yɑrɑmɑ Egibitin di kɑ win nɔm dɑmguu, kɑ nɑnum bɑkɑm, kɑ sɔm mɑɑmɑɑkiginu. 9 U kɑ bu tunumɑ tem mini, mɛ mu tim kɑ bom yibɑ, mɑ u bu mu wɛ̃. 10 Yen sɔ̃nɑ tɛ̃, u kɑ tem mɛ Yinni Gusunɔ u nùn wɛ̃n dĩɑ gbiikinu nɑ win wuswɑɑɔ.
Kpɑ yɛ̃ro u yiirɑ u wuswɑɑ tem girɑri u kɑ Gusunɔ sɑ̃. 11 Yen biru, bɛɛ kɑ Lefibɑ kɑ sɔɔ be bɑ wɑ̃ɑ bɛɛn suunu sɔɔ, i ko n nuku dobu mɔ̀ gɑ̃ɑ geenu kpuron sɔ̃ ni Gusunɔ bɛsɛn Yinni u bɛɛ kɑ bɛɛn bibu wɛ̃.
Wɔkuru bɑɑteren wɔllɔn
tiɑ tiɑn wɛ̃ɛbun wɔ̃ɔ
12 Wɔ̃ɔ yirun biru, itɑse, i ko ge sokuwɑ wɔkuru bɑɑteren wɔllɔn tiɑ tiɑn wɛ̃ɛbun wɔ̃ɔ. Ì n bɛɛn dĩɑnu gɑ̃ i kpɑ, i ko nin wɔkuru bɑɑteren wɔllɔ tiɑ tiɑ wunɑwɑ kpɑ i Lefibɑ wɛ̃ kɑ sɔbu kɑ gobekubɑ kɑ gɔminibu kpɑ bɑ n dɑ di bu debu bɛɛn wuu si sɔɔ. 13 Sɑɑ yerɑ i ko i Gusunɔ bɛsɛn Yinni sɔ̃ i nɛɛ, wɔkuru bɑɑteren wɔllɔn tiɑ tiɑ ye yɑ sɑ̃ɑ wigiɑ, wee i wunɑmɑ bɛɛn yɛnun di i Lefibɑ wɛ̃ kɑ sɔbu kɑ gobekubɑ kɑ gɔminibu nge mɛ u bɛɛ yiire i ko. I#ǹ yen gɑɑ duɑri i sere ye deri. 14 I#ǹ wɔkuru bɑɑteren wɔllɔn tiɑ tiɑ yen gɑɑ di sɑnɑm mɛ i gɔɔ wooru sɔ̃. I#ǹ ye sue sɑnɑm mɛ i#ǹ dɛɛre. I#ǹ mɑɑ yen gɑɑ gɔribu wɛ̃. 15 U tukɑmɑ u bɛɛ mɛɛri sɑɑ win sin yee dɛɛrɑrun di te tɑ wɑ̃ɑ wɔllɔ, kpɑ u bɛɛ win tɔmbu Isirelibɑ domɑru sosiɑ kɑ bɛɛn tem mɛ u bɛɛ wɛ̃, mɛ mu tim kɑ bom yibɑ nge mɛ u bɛsɛn bɑɑbɑbɑ nɔɔ mwɛɛru kuɑ.
Isirelibɑ bɑ sɑ̃ɑwɑ
Gusunɔn tɔmbu
16 Gisɔ, Gusunɔ bɛsɛn Yinni u bɛɛ sɔ̃ɔmɔ u nɛɛ, i win woodɑbɑ kɑ win yiirebu kpuro mɛm nɔɔwɔ. I n tii sɛ kpɑ i ye kpuro swĩi kɑ gɔ̃ru tiɑ kɑ bɛɛn bwɛ̃rɑ kpuro. 17 Gisɔ, i wurɑ mɑ Gusunɔwɑ u sɑ̃ɑ bɛsɛn Yinni, i mɑɑ wurɑ mɑ i ko i sĩ win swɑɑ sɔɔ, kpɑ i win woodɑbɑ kɑ win yiirebu kpuro mɛm nɔɔwɑ. 18 Yinni Gusunɔn tii u mɑɑ wurɑ gisɔ mɑ i sɑ̃ɑ win tɔn be u gɔsɑ nɛnɛm win tiin sɔ̃ i kɑ win yiirebu kpuro swĩi nge mɛ u bɛɛ nɔɔ mwɛɛru kuɑ. 19 Mɛyɑ u koo mɑɑ bɛɛ wɔlle suɑ i yĩsiru yɑri kpɑ i n bɛɛrɛ mɔ n kere hɑnduniɑn bwesenu kpuro ni u tɑkɑ kuɑ, kpɑ i n sɑ̃ɑ win tɔn be u tii yiiyɑ nge mɛ u geruɑ.ISIRELIBA BA GUSUNƆN ARUKAWANI YAAYAMƆ