A wunɛn tɔnusin gɑ̃ɑnu
gɑrisio nge wunɛn tiiginu
22
1 Ì n bɛɛn tɔnusin nɑɑ ǹ kun mɛ win yɑ̃ɑru wɑ tɑ kɔ̃ɔrɑmɔ, i ku rɑ de tu doonɑ. I kɑ tu wuro wi u tu mɔn mi. 2 Yɛ̃ron yɛnu gɑ̀ n tomɑn nɑ, ǹ kun mɛ ì kun nùn yɛ̃n nɑ, i yɑɑ sɑbe te suo i kɑ dɑ bɛɛn yɛnuɔ i tu nɔɔri sere wi u tu mɔ ù n tu kɑsum nɑ. Sɑɑ yerɑ i ko i nùn tu wesiɑ. 3 Ì n mɑɑ bɛɛn tɔnusin kɛtɛku wɑ ǹ kun mɛ win yɑberu ǹ kun mɛ win gɑ̃ɑnu gɑnu ni nu kɔ̃ɔrɑ, nge mɛyɑ i ko i mɑɑ nu kuɑ. I ku nu deri nu kɑm ko.
4 Ì n wɑ goon kɛtɛku ǹ kun mɛ win nɑɑ yɑ wɔrumɑ swɑɑ sɔɔ, i ku de yen yɛ̃ro u ye seeyɑ wi tɔnɑ. I ko i nùn somiwɑ u kɑ ye seeyɑ.
Woodɑ bwese bwesekɑ
5 Tɔn kurɔ u ku rɑɑ tɔn durɔn gɑ̃ɑnu sebe, mɛyɑ tɔn durɔ u ku rɑɑ mɑɑ tɔn kurɔn gɑ̃ɑnu sebe. Domi wi u kuɑ mɛ, Gusunɔ bɛsɛn Yinni u koo yɛ̃ro tusi.
6 Ì n wuu dɔɔ mɑ i gunɔ wɑ gɑ sɛ̃ɑ wɔkusi ǹ kun mɛ gɑ binu wɔkusi dɑ̃ɑɔ ǹ kun mɛ temɔ, i ku gu mwɑ kɑ gen binu sɑnnu. 7 I de mɛro gu doonɑ kpɑ i tii binu yiiyɑ, kpɑ bɛɛn wɑ̃ɑru tu bɛɛ wɛ̃rɑ kpɑ tu dɑkɑɑ dɑ.
8 Ì n dii kpɑɑru bɑnɑ i kpɑ, i ten tɛɛrɑ wɔllɔ gɑni dumi dokeo i kɑ sikerenɑ kpɑ bɑɑ goo ù n wɔrumɑ min di u gu, i kun tɑɑrɛ mɔ.
9 Bɛɛn resɛm gbɑɑnu sɔɔ, i ku rɑ mɑɑ dĩɑ bweseru gɑru duure. Ì n kuɑ mɛ, ten mɑrum kpuro kɑ mɑɑ resɛm ye, yɑ ko n sɑ̃ɑwɑ Gusunɔgiɑ. 10 Ì n wukumɔ, i ku nɑɑ kɑ kɛtɛku sugu doke sɑnnu. 11 I ku yɑ̃nu sebe ni bɑ wesɑ kɑ wɛ̃ɛ dɑmgii kɑ yɑ̃ɑ sɑnsun wɛ̃ɛ sɑnnu.
12 I bɛɛn bekɑn soo sookɑɔ sɑri dokeo.
Suɑnɑɑn woodɑ sɑrɑbu
13 Goo ù n kurɔ suɑ mɑ bɑ mɛnnɑ kɑ kurɔ wi, yen biru mɑ u#ǹ mɑɑ kurɔ wi kĩ, u nùn tusɑ, 14 sere u nùn funɛ wunɑ u win yĩsiru sɑnkɑ, u geruɑ u nɛɛ, u kurɔ wi suɑ, ye bɑ duɑ kɑ wi, u#ǹ kɑ nùn deemɛ, 15 sɑɑ ye sɔɔrɑ bii kurɔbu gen tundo kɑ gen mɛro bɑ koo kɑ bii win wɔndiɑrun seedɑ nɑ bu wuun guro gurobu sɔ̃ɔsi wuun duu yerɔ mi bɑ rɑ mɛnnɛ. 16 Kpɑ bii win tundo u guro guro be sɔ̃ u nɛɛ, nɑ nɛn bii wɔndiɑ wi durɔ wini kɑ̃wɑ u n mɔ kurɔ, ɑdɑmɑ u nùn tusɑ. 17 Wee u nùn weesu mɑni u nɛɛ, u#ǹ kɑ nùn deemɛ. Adɑmɑ nɛn biin wɔndiɑrun yĩreru wee. Kpɑ bu beku te dɛriɑ wuun guro gurobun wuswɑɑɔ. 18 Kpɑ wuun guro guro be, bu durɔ wi mwɑ bu so, 19 kpɑ bu nùn sii geesun gobi wunɔbu (100) bure u wɔndiɑ win tundo kɔsiɑ domi u Isirelibɑn wɔndiɑ turon yĩsiru sɑnkɑ. Yen sɔ̃, u#ǹ mɑɑ kpɛ̃ u kurɔ wi yinɑ, u ko n nùn suewɑ sere kɑ win wɑ̃ɑrun tɔ̃ru kpuro sɔɔ.
20 Adɑmɑ gɑri yi, yì n sɑ̃ɑn nɑ gem, mɑ bɑ#ǹ yĩreru gɑru wɑ te tɑ sɑ̃ɑ bii wigiru, 21 sɑɑ ye sɔɔrɑ bɑ koo kurɔ wi suɑ bu kɑ dɑ win bɑɑbɑn yɛnu kɔnnɔwɔ kpɑ win wuun tɔn durɔbu bu nùn kpenu kɑsuku bu kɑ go. Domi seku bɑkɑrɑ Isirelibɑn mi bu nɛɛ, bii wɔndiɑ u durɔ dɑmɑru kuɑ win bɑɑbɑn yɛnuɔ. Nge mɛyɑ i ko i kɑ dɑɑ kɔ̃sɑ yen bweseru wunɑ bɛɛn suunu sɔɔn di.
22 Bɑ̀ n durɔ goo mwɑ u sɑkɑrɑru mɔ̀ kɑ goon kurɔ, bɑ koo be kpuro gowɑ durɔ wi kɑ kurɔ wi. Nge mɛyɑ i ko i kɑ dɑɑ kɔ̃sɑ yen bweseru wunɑ bɛɛn suunu sɔɔn di.
23 Bii wɔndiɑ goo ù n wɑ̃ɑ, mɑ bɑ nùn durɔ kɑ̃ɑ, ɑdɑmɑ bɑ#ǹ ginɑ suɑnɛ, mɑ durɔ goo u nùn wɑ mɑ u kɑ nùn kpunɑ, 24 i ko i be yiru kpuro mwɑwɑ i kɑ nɑ wuun duu yerɔ mi guro gurobu bɑ rɑ mɛnnɛ, kpɑ i bu kpenu kɑsuku i go yèn sɔ̃ bii wɔndiɑ wi, u#ǹ wurɑ kue sɑɑ ye u nùn gɑbɑ wuuɔ kɑ yèn sɔ̃ durɔ wi, u win winsim kurɔ bekuru doke. Nge mɛyɑ i ko i kɑ dɑɑ kɔ̃sɑ yen bweseru wunɑ bɛɛn suunu sɔɔn di. 25 Adɑmɑ durɔ wi, ù n wɔndiɑ wi bɑ durɔ kɑ̃ɑ mi wɑn nɑ yɑkɑsɔ u kɑ nùn gɑbɑ u kɑ kpunɑ kɑ dɑm yɑkɑsu mi, durɔ wi tɔnɑwɑ bɑ koo go. 26 I ku wɔndiɑ wi gɑ̃ɑnu kuɑ. U#ǹ torɑru gɑru kue te tɑ weenɛ bu kɑ nùn go. N sɑ̃ɑwɑ nge durɔ goo wi u win beruse wɔri u go. 27 Domi u nùn deemɑwɑ yɑkɑsɔ. Mɑ bii wɔndiɑ wi, u wurɑ kuɑ ɑdɑmɑ goo sɑri wi u koo nùn wɔrɑ.