Wi bɑ go yɑkɑsɔn gɑri
21
1 Sɑnɑm mɛ i wɑ̃ɑ tem mɛ Gusunɔ bɛsɛn Yinni u koo bɛɛ wɛ̃ sɔɔ, mɑ i wɑ bɑ goo go mɛ sɔɔ, yɛ̃ron gorɑ kpĩi yɑkɑsɔ, mɑ i#ǹ sere yɛ̃ wi u nùn go, 2 sɑnɑm mɛ sɔɔrɑ guro gurobu kɑ siri kowobu bɑ koo yɑrimɑ kpɑ bu wusun tondɑm yĩire si su wi bɑ go mi sikerenɛ. 3 Wuu ge bɑ wɑ gɑ kɑ wi bɑ go mi turuku bo, wuu gen guro gurobu bɑ koo nɑɑ gbiibɑ kɑsumɑ tiɑ ye bɑ#ǹ sugu dokere yu kɑ sɔmburu gɑru ko. 4 Kpɑ wuu gen guro guro be, bu kɑ nɑɑ gbiibɑ ye dɑ wɔwɑ gɑɑ sɔɔ ye yɑ nim kokumɔ, mi goo kun wukure u sere gɑ̃ɑnu duure. Kpɑ bu nɑɑ gbiibɑ yen wĩi sumɑ buɑ mi.
5 Kpɑ yɑ̃ku kowobu bu susimɑ yen bɔkuɔ be, be bɑ sɑ̃ɑ Lefin bibu be Gusunɔ bɛsɛn Yinni u wunɑ nɛnɛm bu kɑ win sɑ̃ɑ yerun sɔmburu ko kpɑ bu mɑɑ tɔmbu domɑru kuɑ kɑ Yinni Gusunɔn yĩsiru. Beyɑ bɑ ko n dɑ gɑri kpuro wunɑnɛ yi yi sɑ̃ɑ soonɑɑ kɑ mɛɛrɑn gɑri.
6 Kpɑ wuu gen guro guro be kpuro be bɑ susi wi bɑ go min bɔkuɔ bu ben nɔmɑ niɑ nɑɑ yen wɔllɔ wɔwɑ mi. 7 Kpɑ bu gere bu nɛɛ, ben nɔmɑ kun yɛm mɛni yɑri, mɛyɑ ben nɔni kun mɑɑ wɑ mɛ n kuɑ u kɑ gu. 8 Yinni u be win tɔmbu Isireli be u yɑkiɑmɑ torɑ ten suuru kuo, kpɑ u ku yɛm mɛ gɑrisi ben winɔ mɛ mu sɑ̃ɑ torɑru sɑrirugiin yɛm. Sɑɑ ye, Gusunɔ u koo mɑɑ bu yɛm mɛ suuru kuɑ.
9 Nge mɛyɑ i ko i kɑ torɑru sɑrirugiin yɛm wunɑ bɛɛ sɔɔn di kpɑ i n mɔ̀ ye yɑ koo Gusunɔ wɛ̃re.
Kurɔ dɛson suɑbu
10 Sɑnɑm mɛ i yɑrɑ i bɛɛn yibɛrɛbɑ tɑbu wɔrim dɔɔ be Gusunɔ bɛsɛn Yinni u bɛɛ nɔmu bɛriɑ, mɑ i bu dɛsiru mwɑ, 11 be sɔɔ, mɑ bɛɛn turo u kurɔ burɔ wɑ mɑ u nùn kĩru gɔ̃ru doke u kɑ nùn suɑ kurɔ, 12 sɑɑ ye, u koo nùn suɑwɑ u kɑ dɑ win yɛnuɔ kpɑ u de u wii pɔɔru wokɑ kpɑ u win nii kɔkɔsu bɔɔri. 13 Kpɑ u win yɑ̃ɑ ni u rɑɑ doke potɑ kpɑ u dɑ u sinɑ yɛ̃ron yɛnuɔ u swĩ win bɑɑbɑ kɑ win mɛron sɔ̃ suru tiɑ. Yen biru, kpɑ yɛ̃ro u den dɑ u nùn deemɑ u ko win durɔ kpɑ wi, u mɑɑ ko win kurɔ. 14 Adɑmɑ ù n dɑ nùn bwɛ̃rɑ yɑrɑ, u de u doonɑ mi u kĩ. U ku rɑɑ nùn dɔrɑ u gobi mwɑ. Mɛyɑ u ku mɑɑ nùn gɑrisi yoo. Domi u kɑ nùn mɛnnɑ.
Ye yɑ sɑ̃ɑ bii yerumɑgiɑ
15 Goo ù n mɑɑ kurɔbu mɔ yiru, mɑ u turo kĩ n kere turo, mɑ be yiru kpuro bɑ nùn bii tɔn durɔbu mɑruɑ, wi u kun kĩ mi, mɑ wiyɑ u nùn yerumɑ mɑruɑ, 16 sɑnɑm mɛ u bii be tubi bɔnu kuɑmmɛ, n ǹ weenɛ u wi u kĩn bii gɑrisi yerumɑ wi u#ǹ kĩn biin ɑyerɔ. 17 Adɑmɑ n weenɛ u wi u#ǹ kĩn bii wurɑ nge win yerumɑ, kpɑ u nùn win tubin bɔnu yiru wɛ̃. Domi u sɑ̃ɑwɑ win tundon dɑm yĩre gbiikiru. N weenɛwɑ u yerumɑrun bɑɑ wɑ.
Bii mɛm nɔɔ sɑrin kɔkɔrɔ
18 Goo ù n bii tɔn durɔ mɔ, mɑ bii wi, u kuɑ mɛm nɔɔ sɑri wi u ku rɑ win tundo kɑ win mɛron gere nɔ bɑɑ bɑ̀ n nùn sɛɛyɑsiɑ, 19 sɑɑ ye sɔɔ, win tundo kɑ win mɛro bɑ koo nùn mwɑwɑ bu kɑ nɑ wuun guro gurobun mi, 20 kpɑ bu guro guro be sɔ̃ bu nɛɛ, ben bii wee, u ku rɑ ben gɑri nɔ. U win wɑ̃ɑru dimɔwɑ bɛrɛtɛkɛ tɑm nɔrubu sɔɔ. 21 Sɑɑ yerɑ wuun tɔn durɔbu kpuro bɑ koo nùn kpenu kɑsuku bu go kpɑ i kɔ̃sɑ wunɑ bɛɛn suunu sɔɔn di. Isirelibɑ kpuro bɑ̀ n ye nuɑ kpɑ bu bɛrum ko.
Wi bɑ soorɑ doken goru
22 Goo ù n torɑru gɑru kuɑ te tɑ turɑ bu kɑ nùn go, mɑ bɑ nùn soorɑ doke bɑ bwɛ̃ dɑ̃ɑ wɔllɔ, 23 bu ku de win goru tɑ n wɑ̃ɑ dɑ̃ɑ mi sere kɑ wɔ̃kurɔ. Bɑɑ ǹ n yen mɛren nɑ, bu de bu nùn sike yen tɔ̃ɔ te. Domi wi bɑ soorɑ doke bɑ bwɛ̃ u kuɑwɑ mi bɔ̃ruro Gusunɔn wuswɑɑɔ. I n dɑ ko mɛ, kpɑ i ku rɑ bɛɛn tem disi doke mɛ Gusunɔ bɛsɛn Yinni u bɛɛ wɛ̃.