Wuu sìn mi
bɑ ko n dɑ kpikiru de
19
1 Gusunɔ bɛsɛn Yinni u koo bwese tukunu girɑ nin tem di kpɑ u nin tem mɛ bɛɛ wɛ̃, kpɑ i n ben wusu kɑ ben yɛnusu mɔ. 2-3 Tem mɛ Yinni Gusunɔ u koo bɛɛ wɛ̃ mi, ì n mu mwɑ i kpɑ, i mu bɔnu koowo beri itɑ kpɑ i yen bɑɑyere sɔɔ wuu teu wunɑ mi be bɑ tɔnu go bɑ ko n dɑ kpikiru we, kpɑ i swɛɛ yɑbiri yi bɑ ko n dɑ kɑ de mi.
4 Tɔn be bɑ ben winsim go bɑ#ǹ kɑ bɑɑru, bɑ#ǹ dɑɑ mɑɑ yibɛrɛ tɛɛru mɔɔsinɛ, be tɔnɑwɑ bɑ koo kpĩ bu kpikiru dɑ wuu sin mi. 5 Nge tɛ̃, gɑbu bɑ̀ n dɑ yɑkɑsɔ bɑ dɑ̃ɑ kĩimɔ, kpɑ gbɑ̃ɑ yu wɔɔrɑ yu win beruse wɔri yu go, wuu gen teu sɔɔrɑ u koo kpikiru dɑ u wɑ u n kɑ wɑ̃ɑ, 6 kpɑ wi bɑ gon dusibun mɔru yɑ̀ n seewɑ bu ku rɑɑ yɛ̃ro nɑɑ turi bu mwɑ swɑɑn tondɑbun sɔ̃. Domi wi, kɑ wi u gu mi, bɑ#ǹ dɑɑ yibɛrɛ tɛɛru sɑ̃ɑ. 7 Yen sɔ̃nɑ nɑ bɛɛ sɔ̃ɔwɑ nɑ nɛɛ, i wusu itɑ gɔsio su n sɑ̃ɑ kpiki yenu.
8-9 Mɑ i woodɑ ye kpuro mɛm nɔɔwɑ i ye nɔni doke ye nɑ bɛɛ wɛ̃ɛmɔ gisɔ, mɑ i Gusunɔ bɛsɛn Yinnin kĩru mɔ̀, u koo bɛɛn tem mɛ yɑsiɑsiɑ kpɑ u mu bɛɛ wɛ̃ mɛ u bɛsɛn bɑɑbɑbɑ nɔɔ mwɛɛru kuɑ. Sɑɑ yerɑ i ko i mɑɑ wusu itɑ gɑsu gɔsi i sosi sìn mi bɑ ko n dɑ kpikiru de. 10 Nge mɛyɑ bɑ#ǹ koo mɑɑ be bɑ kun toren yɛm yɑri tem mɛ sɔɔ mɛ Gusunɔ bɛsɛn Yinni u bɛɛ wɛ̃ i n mɔ, kpɑ yɛ̃ron yɛm mu kun wɑ̃ɑ bɛɛn winɔ.
11 Adɑmɑ goo ù n win winsim tusɑ, mɑ u nùn so u go, yen biru, kpɑ u kpikiru we wuu sin gɑgu sɔɔ, 12 win wuun guro gurobu bɑ koo dɑwɑ bu nùn mwɑɑmɑ bu wi u koo nùn mɔru kɔsie nɔmu bɛriɑ u nùn go. 13 I ku nùn wɔnwɔndu kuɑ. I tɑɑrɛ sɑrirugiin yɛm wunɔ bɛɛ Isirelibɑn suunu sɔɔn di kpɑ n bɛɛ wɛ̃rɑ.
Gbee kɔɔrɔn woodɑ
14 Ì n duɑ tem mɛ sɔɔ i kpɑ mɛ Gusunɔ bɛsɛn Yinni u koo bɛɛ wɛ̃, bɑ̀ n bɛɛ mu bɔnu kuɑ bɑ kpɑ, i ku rɑ bɛɛn winsim kɔɔrɔ mure bɛɛgiɑ sɔɔ.
Seedɑ ye bɑ koo wurɑ
15 Goo ù n tɔnu go ǹ kun mɛ ù n torɑru gɑru kuɑ, tɔn turon seedɑ kun turɑ bu kɑ yɛ̃ro tɑɑrɛ wɛ̃. Adɑmɑ tɔmbu yiru ǹ kun mɛ itɑ bɑ̀ n seedɑ di, sɑɑ yerɑ bɑ koo yɛ̃ro gɑrisi tɑɑrɛgii.
16 Goo ù n win winsim kɔ̃sɑ gɑɑ mɑni, 17 be yiru ye kpuro bɑ koo dɑwɑ Yinni Gusunɔn sɑ̃ɑ yerɔ bu yɑ̃ku kowobu kɑ siri kowobu wɑ be bɑ dɔmɑ te sɔmburu mɔ̀ mi. 18 Siri kowo be, bɑ koo ben gɑri wɛ̃ɛriwɑ kɑ lɑɑkɑri. Bɑ̀ n deemɑ seedɑ weesugiɑ u win winsim mɑnimɔ, 19 sɑɑ ye sɔɔrɑ bɑ koo nùn kuɑ nge mɛ u rɑɑ bwisikɑ bu win winsim wi kuɑ. Nge mɛyɑ i ko i kɑ kɔ̃sɑ wunɑ bɛɛn suunu sɔɔn di. 20 Tɔmbu bɑ̀ n ye nuɑ, bɑ koo bɛrum duurɑ. Bɑ#ǹ mɑɑ kɔ̃sɑ yen bweseru mɔ̀ bɛɛn suunu sɔɔ. 21 I ku tɑɑrɛgii wɔnwɔndu kuɑ. Wi u tɔnu go, bɑ koo mɑɑ win tii gowɑ. Wi u win winsim nɔni wunɑ, bɑ koo mɑɑ wigii wunɑwɑ. Wi u win winsim dondu buɑ, bɑ koo mɑɑ wigiru buɑwɑ. Wi u win winsim nɔmɑ buɑ, bɑ koo mɑɑ wigiɑ buɑwɑ. Wi u win winsim nɑɑsu buɑ, bɑ koo mɑɑ wigisu buɑwɑ.