Ye yɑ ko n sɑ̃ɑ Lefibɑgiɑ
18
1 Yɑ̃ku kowo Lefibɑ kɑ be bɑ tie Lefin bweseru sɔɔ kpuro bɑ#ǹ tem wɑsi nge Isireli be bɑ tie. Yɑ̃ku ni bɑ Yinni Gusunɔ kuɑ kɑ gɑ̃ɑ ni bɑ kɑ nùn nɑɑwɑ, yerɑ yɑ ko n sɑ̃ɑ ben dĩɑnu. 2 Bɑ#ǹ tem wɑsi mu n sɑ̃ɑ ben tubi nge Isireli be bɑ tie. Adɑmɑ Yinni Gusunɔgiɑ yɑ ko n sɑ̃ɑ ben tubi nge mɛ u bu sɔ̃ɔwɑ.
3 Yɑ̃ku yɑɑn mi bɛɛ Isirelibɑ i ko yɑ̃ku kowobu wɛ̃ ì n yɑ̃kuru kuɑ kɑ kɛtɛ ǹ kun mɛ kɑ yɑ̃ɑru ǹ kun mɛ kɑ boo, miyɑ yen nɔm fɑrɑm kɑ yen bɑɑ sɑburosu kɑ yen bɔsɔnu. 4 Kpɑ i mɑɑ bu bɛɛn dĩɑ ni i gbiɑ i gɑ̃ wɛ̃. Niyɑ, ɑlikɑmɑ kɑ dɑ̃ɑ bii ni bɑ rɑ kɑ tɑm ko kɑ ni bɑ rɑ kɑ gum ko kɑ sere bɛɛn yɑ̃ɑnun sɑn si i gbiɑ i bɔɔrɑ. 5 Domi bɛɛn bwese kɛri kpuro sɔɔ, Lefin bwese kɛrɑ Gusunɔ bɛsɛn Yinni u gɔsɑ bu kɑ sɔmburu ko win sɑ̃ɑ yerɔ be, kɑ ben bibun bweseru sere kɑ bɑɑdommɑɔ.
6 Lefi goo ù n kĩ u yɑri Isirelin wuu gɑgun di mi u wɑ̃ɑ u kɑ dɑ mi Yinni Gusunɔn sɑ̃ɑ yerɑ wɑ̃ɑ, 7 u koo kpĩ u win sɔmburu ko mi, Gusunɔ win Yinnin wuswɑɑɔ nge mɛ win mɛro bisibu Lefi be u deemɑ mi bɑ mɔ̀. 8 Bɑ koo nùn dim wɛ̃wɑ mu n kɑ begim nɛ bɑɑ mɛ u ye u rɑɑ mɔ dɔrɑ.
Gusunɔn sɔmɔ weesugibu
kɑ win sɔmɔ gemgii
9 Ì n turɑ tem mɛ sɔɔ, mɛ Gusunɔ bɛsɛn Yinni u bɛɛ wɛ̃, i ku rɑ mɛn tɔmbun sɑ̃ɑru sɑɑri te Yinni Gusunɔ u tusɑ. 10 I ku rɑ de bɛɛ sɔɔ, goo u kɑ win bii yɑ̃kuru gɑru ko. I ku mɑɑ de goo u n sɔroru mɔ̀ bɛɛn suunu sɔɔ, 11 ǹ kun mɛ u n gɔribu sokumɔ ǹ kun mɛ u n dobo dobobɑ mɔ̀. 12 Domi yeni kpurowɑ Yinni Gusunɔ u tusɑ. Yen sɔ̃nɑ u koo tem min tɔn be kpuro girɑ bɛɛn wuswɑɑn di, 13 kpɑ bɛɛ i n sɑ̃ɑ Gusunɔ bɛsɛn Yinnigibu mɑm mɑm.
14 Domi bwese te i ko i girɑ mi, bɑ rɑ sɔroru kowɑ kpɑ bu kperin sɑriɑ mɛɛri bu kɑ bikiɑru ko. Adɑmɑ Gusunɔ bɛsɛn Yinni u#ǹ bɛɛ ye wurɑrimɔ. 15 U koo bɛɛ win sɔmɔ goo seeyɑ bɛɛn bweseru sɔɔn di nge nɛ, Mɔwisi. Wiyɑ i ko i swɑɑ dɑki. 16 Domi yerɑ i Yinni Gusunɔ bikiɑ sɑnɑm mɛ i mɛnnɑ Horɛbun guurɔ. I nɛɛ, i#ǹ mɑɑ kĩ i Yinni Gusunɔn tiin nɔɔ nɔ ǹ kun mɛ i win dɔ̃ɔ boko wi wɑ. Domi i#ǹ kĩ u bɛɛ go. 17 Mɑ Yinni Gusunɔ u mɑn sɔ̃ɔwɑ u nɛɛ, bɛɛn bikiɑ bi, bu wɑ̃. 18 U nɛɛ, u koo bɛɛ win sɔmɔ goo seeyɑ bɛɛgibun suunu sɔɔn di nge nɛ, kpɑ u win gɑri doke win nɔɔ sɔɔ. Kpɑ sɔmɔ wi, u bɛɛ sɔ̃ kpuro ye u nùn yiire. 19 Bɛɛn goo ù n yinɑ u gɑri yi swɑɑ dɑki yi sɔmɔ wi, u koo gere kɑ Gusunɔn yĩsiru, u koo yɛ̃ro sɛɛyɑsiɑwɑ. 20 Adɑmɑ sɔmɔ wi, ù n gɑri gɛɛ sosi kɑ Yinni Gusunɔn yĩsiru ye u#ǹ nùn yiire u gere ǹ kun mɛ ù n gɑri geruɑ kɑ bũnun yĩsiru, bɑ koo nùn gowɑ.