Yɑ̃ku kowon yɑbe tɑrɑkpe
39
1 Bɑ yɑ̃ku kowobun yɑ̃ɑ ni kuɑ kɑ yɑ̃ɑ sɑnsun beku ni bɑ wɔ̃kuɑ kɑ burɑ kɑ mɑɑ gɑɑdurɑ kɑ ni bɑ wunɔm doke. Mɑ Mɔwisi u derɑ bɑ Aronin sɑ̃ɑ yɑ̃ɑ ni kuɑ nge mɛ Yinni Gusunɔ u geruɑ.
2 Bɑ yɑbe tɑrɑkpe ge kuɑ kɑ beku te bɑ kuɑ kɑ wɛ̃ɛ dɑmgii, mɑ bɑ ge burɑru kuɑ kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ kɑ wɛ̃ɛ wunɔmgii kɑ wurɑ. 3 Bɑ wurɑ ye bɛsukɑwɑ teere teere bɑ doke doke yɑbe tɑrɑkpe gen bekuru sɔɔ. 4 Mɑ bɑ gu sɑri yiru kuɑ bu kɑ gen senu sɔrenɑ. 5 Yɑbe tɑrɑkpe ge kɑ gen sɛ̃kɑtiɑ yɑ sɑ̃ɑwɑ beku nɔni tee, mɑ bɑ sɛ̃kɑtiɑ ye yinusi yɑbe te sɔɔ. Bɑ ye kuɑwɑ nge mɛ Yinni Gusunɔ u Mɔwisi sɔ̃ɔwɑ u ko. 6 Mɑ bɑ kpee gobiginu yiru nìn nɔni sɑ̃ɑ bɛrɔ wuru wurɑ gore nì sɔɔ bɑ Isireli bibun yĩsɑ yorusi nge mɛ bɑ rɑ yore sisɔ. 7 Mɑ bɑ nu mɑni sɑri yi sɔɔ nu kɑ sɔ̃ɔsi mɑ Isirelin bwesenu kpuron yĩsɑ Aroni u sɔɔwɑ sɑnɑm mɛ u duɔ sɑ̃ɑ yee ten mi. Mɛyɑ bɑ ye kpuro kuɑ nge mɛ Mɔwisi u geruɑ.
Yɑ̃ku kowon bɔɔ bɑrɑ
8 Bɑ mɑɑ bɔɔ bɑrɑ ye kuɑ. Ye kɑ yɑbe tɑrɑkpe ge, yɑ sɑ̃ɑwɑ beku nɔni tee kɑ burɑ teeru. 9 Bɔɔ bɑrɑ yen yɑsum kɑ yen dɛ̃ɛbu mu nɛwɑ. Ye kpuro gɔm soonun bɔnu bɔnu. 10 Mɑ bɑ ye kpee gobiginu bwese bwesekɑ mɑni sĩɑ nnɛ. Kpee nin nɔni wee. Sĩi gbiikɑɑ sɔɔ, swɑ̃ɑru kɑ dɔm buuru kɑ wuru beku. 11 Yiruse sɔɔ mɑɑ, swɑ̃ɑru kɑ boogu kɑ sɔ̃ɔ tiro. 12 Itɑse sɔɔ, dɔm buuru kɑ nɔni bwese bwesekɑ kɑ gɑɑdurɑ. 13 Nnɛse sɔɔ, wuru beku kɑ bɛrɔ wuru kɑ nɔni bwese bwesekɑ. Bɑ ye kpuro wurɑ gore gorewɑ bɑ sere mɑni bɔɔ bɑrɑ ye sɔɔ. 14 Mɑ bɑ nin bɑɑtere sɔɔ Isirelin bibun yĩsinu yoruɑ tiɑ tiɑ, domi ben bɑɑwuren yĩsiru tɑ sɑ̃ɑwɑ Isirelibɑn bwese kɛrɑ tiɑn yĩsiru.
15 Mɑ bɑ bɔɔ bɑrɑ ye wurɑn yɔni yiru kuɑ. 16 Mɑ bɑ tɑɑminu yiru kɑ sɔretinu yiru kuɑ kɑ wurɑ, mɑ bɑ tɑɑmii ni doke bɔɔ bɑrɑ yen soo wɔrikisɔ. 17 Tɑɑminu yiru ye sɔɔrɑ bɑ wurɑn yɔni yiru ye sɔre. 18 Mɑ bɑ bɔɔ bɑrɑ yen yɔni yi gbinisi yɑbe tɑrɑkpe gen sɑriɔ mi wurɑn sɔretii ni, nu wɑ̃ɑ, kpɑ yɑ n kɑ sɔndi tororu wɔllɔ. 19 Mɑ bɑ mɑɑ wurɑn tɑɑminu yiru kuɑ bɑ doke bɔɔ bɑrɑ yen soo temkisɔ si su yɑbe tɑrɑkpe ge girɑri. 20 Mɑ bɑ mɑɑ tɑɑminu yiru kuɑ kɑ wurɑ bɑ nu doke yɑbe tɑrɑkpe gen sɑrin nɔɔwɔ wuswɑɑɔ sɛ̃kɑtiɑ yen wɔllu giɑ. 21 Yen biru bɑ bɔɔ bɑrɑ yen tɑɑmii ni sɔɔ wɛ̃ɛ gɑɑdurɑgii doke bɑ yi gbinuɑ yɑbe tɑrɑkpe gen tɑɑminu sɔɔ. Nge mɛyɑ bɑ kɑ ye sɔre yɑbe tɑrɑkpe ge sɔɔ yu ku kɑ bɑ̃ɑri. Bɑ ye kuɑwɑ nge mɛ Yinni Gusunɔ u Mɔwisi sɔ̃ɔwɑ.
Yɑ̃ku kowon sɑ̃ɑ yɑ̃ɑ ni nu tie
22 Yɑbe tèn wɔllɔ bɑ yɑbe tɑrɑkpe ge sɔndi, bɑ tu wesɑwɑ kɑ wɛ̃ɛ gɑɑdurɑgii. 23 Mɑ bɑ ten wĩirɔ sɔmɑ doke bɑ sinum koosiɑ kpɑ tu ku rɑɑ kɑ gɛ̃ɛrɑ. 24 Mɑ bɑ ten temɔ tusɑnu doke ni nu kɑ dɑ̃ɑ mɑrum gɑm weenɛ. Bɑ nu kuɑ kɑ wɛ̃ɛ dɑmgii kɑ yi bɑ wɔ̃kuɑ kɑ burɑ kɑ mɑɑ gɑɑdurɑ kɑ wɛ̃ɛ wunɔmgii. 25 Mɑ bɑ mɑɑ wurɑn yɑngire piiminu kuɑ bɑ nu doke bɑ kɑ sikerenɑ, nu kpɑsɑ sɑ̃ɑ kɑ tusɑ ni. 26 Bɑ ye kuɑwɑ nge mɛ Yinni Gusunɔ u Mɔwisi sɔ̃ɔwɑ.
27 Mɑ bɑ Aroni kɑ win bibu tɑkobɑ kuɑ kɑ wɛ̃ɛ dɑmgii. 28 Mɛyɑ bɑ mɑɑ dɑwɑni ye kuɑ kɑ furɔsu si su sɑ̃ɑ ben burɑru te tɑ ben girimɑ sɔ̃ɔsimɔ, kɑ sokoto kpirinu. Bɑ ye kpuro kuɑ kɑ wɛ̃ɛ dɑmgii. 29 Bɑ mɑɑ sɛ̃kɑtiɑ ye wesɑ kɑ wɛ̃ɛ dɑmgii bɑ burɑru koosi kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ kɑ wɛ̃ɛ wunɔmgii. Mɛyɑ bɑ ye kpuro kuɑ nge mɛ Yinni Gusunɔ u Mɔwisi sɔ̃ɔwɑ.
30 Bɑ bɑtɑni wurɑgiɑ ye kuɑ bɑ yoruɑ ye sɔɔ, wini sɑ̃ɑwɑ Yinni Gusunɔgii. Bɑ ye yoruɑwɑ nge mɛ bɑ rɑ yore sisɔ. 31 Mɑ bɑ ye sɔresi dɑwɑni yen wɔllɔ kɑ wɛ̃ɛ gɑɑdurɑgii nge mɛ Yinni Gusunɔ u Mɔwisi sɔ̃ɔwɑ.
Bɑ Yinni Gusunɔn
kuu bekurugii ten sɔmburu
kuɑ bɑ kpɑ
32 Isirelibɑ bɑ Yinni Gusunɔn kuu bekurugii te kuɑ bɑ kpɑ. Bɑ ye kpuro kuɑwɑ nge mɛ Yinni Gusunɔ u Mɔwisi sɔ̃ɔwɑ.
33 Mɑ bɑ kɑ Mɔwisi ten yɑ̃nu kpuro nɑɑwɑ.Niyɑ bekɑ ye kɑ yen sɔretinu kɑ dɑ̃ɑ bɛsi yi kɑ dɑ̃ɑ kɑretii yi kɑ dɑ̃ɑ bɛsi sinumgii yi kɑ yin yɔ̃rɑtii 34 kɑ yɑ̃ɑ kinɛnun gɔni yi bɑ swɛ̃rɑsiɑ kɑ yɑɑ gɔni sinumgii yi kɑ beku kɑre te 35 kɑ Yinni Gusunɔn woodɑn kpɑkoro te kɑ ten nɛnutii kɑ ten wukiritiɑ, 36 kɑ tɑbulu ye kɑ yen dendi yɑ̃nu kɑ pɛ̃ɛ ye bɑ rɑ yi yen wɔllɔ, 37 kɑ dɑbu wurɑguu ge kɑ gen fitilɑnu kɑ nin dendi yɑ̃nu kɑ nin gum, 38 kɑ kpɑkoro wurɑgiru tèn wɔllɔ bɑ ko n dɑ turɑre dɔ̃ɔ doke, kɑ gum mɛ bɑ ko n dɑ kpuro tɑ̃re bu kɑ sɔ̃ɔsi mɑ Gusunɔ u ye gɔsɑ nɛnɛm, kɑ turɑre nubu durorugiɑ yekɑ kuu ten kɔnnɔn beku kɛnutiru, 39 kɑ yɑ̃ku yee te bɑ kuɑ kɑ sii gɑndu kɑ ten kɔkɔsɔ sii gɑndugiɑ kɑ ten nɛnutii kɑ sere ten dendi yɑ̃nu kpurokɑ mɑɑ boo ge kɑ gen sɔwɑritiɑ, 40 kɑ kuu ten kɑrɑn bekunu kɑ yen dɑ̃nu kɑ nin yɔ̃rɑtii kɑ yen kɔnnɔn beku kɛnutiru kɑ yen wɛ̃ɛ kɑ yen gɑbɑtiɑn kurumbɑ,kɑ sere sɑ̃ɑrun dendi yɑ̃nu kpuro ni bɑ koo dendi kuu te sɔɔ, 41 kɑ sɑ̃ɑ yɑ̃ɑ ni Aroni kɑ win bibu bɑ ko n dɑ doke bɑ̀ n sɔmburu mɔ̀ sɑ̃ɑ yee ten mi. Niyɑ nu koo ben girimɑ sɔ̃ɔsi.