Yinni Gusunɔ u Mɔwisi sɔ̃ɔwɑ
u kuu te giro
40
1 Yinni Gusunɔ u Mɔwisi sɔ̃ɔwɑ u nɛɛ, 2 suru gbiikoon tɔ̃ɔ gbiikiru sɔɔrɑ kɑɑ nɛn kuu te girɑ. 3 À n tu girɑ ɑ kpɑ, kpɑ ɑ woodɑn kpɑkoro te suɑ ɑ doke te sɔɔ, kpɑ ɑ tu gɑndi kɑ beku kɑre te. 4 Kpɑ ɑ tɑbulu ye duusiɑ kɑ yen dendi yɑ̃nu, kɑ mɑɑ dɑbu ge, kpɑ ɑ gen fitilɑnu doke nin ɑyenɔ. 5 Kɑɑ mɑɑ de bu kpɑkoro wurɑgiru tèn mi bɑ ko n dɑ turɑre dɔ̃ɔ doke yi woodɑn kpɑkororun deedeeru. Kpɑ ɑ mɑɑ beku kɛnutiru doke kuu ten kɔnnɔwɔ. 6 Kpɑ ɑ mɑ yɑ̃ku yee te yi ten ɑyerɔ kuu ten kɔnnɔn deedeeru. 7 Kpɑ ɑ boo ge yi yɑ̃ku yee te kɑ kuu ten bɑɑ sɔɔ kpɑ ɑ gu nim yibiɑ. 8 Kpɑ ɑ kuu ten kɑrɑ ye girɑ ɑ kɑ sikerenɑ, kpɑ ɑ yen kɔnnɔn beku kɛnutiru doke.
Yinni Gusunɔ u Mɔwisi sɔ̃ɔwɑ
u kuu te gum yɛ̃kɑ
tɑ n kɑ sɑ̃ɑ nɛnɛm
9 Yen biru kɑɑ gum yɛ̃kɑ kuu te sɔɔ kɑ ten dendi yɑ̃nu kpuro sɔɔ. Nge mɛyɑ kɑɑ kɑ sɔ̃ɔsi mɑ tɑ sɑ̃ɑ sɑ̃ɑrugiru. 10 Mɛyɑ kɑɑ mɑɑ yɑ̃ku yee te gum mɛ yɛ̃kɑ kɑ ten dendi yɑ̃nɔ. Nge mɛyɑ kɑɑ kɑ sɔ̃ɔsi mɑ tɑ sɑ̃ɑ sɑ̃ɑrugiru. 11 Kɑɑ mɑɑ boo gen tii kɑ gen sɔwɑritiɑ gum mɛ yɛ̃kɑ ɑ kɑ sɔ̃ɔsi mɑ gɑ sɑ̃ɑ sɑ̃ɑruguu.
12 Yen biru kɑɑ kɑ Aroni kɑ win bibu nɑ kuu ten kɔnnɔwɔ, kpɑ ɑ bu wobure kɑ nim dirum. 13 Kpɑ ɑ Aroni sɑ̃ɑ yɑ̃ɑ ni sebusiɑ ɑ nùn gum mɛ tɑ̃re ɑ kɑ sɔ̃ɔsi mɑ u sɑ̃ɑ nɛn yɑ̃ku kowo. 14 Mɛyɑ kɑɑ mɑɑ win bibu sɔ̃ bu susimɑ kpɑ ɑ bu tɑko be sebusiɑ. 15 Yen biru kpɑ ɑ mɑɑ bu gum mɛ tɑ̃re nge mɛ ɑ ben tundo kuɑ. Nge mɛyɑ kɑɑ kɑ sɔ̃ɔsi mɑ bɑ sɑ̃ɑ nɛn yɑ̃ku kowobu, be kɑ ben bibun bweseru sere kɑ bɑɑdommɑɔ.
Mɔwisi u kuu te girɑ
16 Mɔwisi u kuɑ kpuro nge mɛ Yinni Gusunɔ u nùn sɔ̃ɔwɑ. 17 Ye n kuɑ wɔ̃ɔ yirusen suru gbiikoon tɔ̃ɔ gbiikiru sɑɑ mìn di bɑ yɑrimɑ Egibitin di, yerɑ Mɔwisi u Yinni Gusunɔn kuu te girɑ.
18 U gbiɑ u dɑ̃ɑ bɛsi yin yɔ̃rɑtii girɑ mɑ u dɑ̃ɑ bɛsi yi doke sɔɔ, mɑ u yi dɑ̃ɑ kɑre. Mɑ u dɑ̃ɑ bɛsi sinumgii girɑ. Mɑ u bekɑ ye wukiri yin wɔllɔ. 19 Mɑ u boo sɑnsun bekɑ ye sɔndi bekɑ yen wɔllɔ. Mɑ u yɑɑ gɔni yi suɑ u kɑ ye kpuro wukiri nge mɛ Yinni Gusunɔ u nùn sɔ̃ɔwɑ.
20 Mɑ u woodɑn kpee bɛsi yi suɑ u doke yin kpɑkoro te sɔɔ. Mɑ u dɑ̃ɑ pɔɔsi yi bɑ rɑ kɑ tu sue wɑsi yin bɛri yenɔ. Mɑ u ten wukiritiɑ doke. 21 Mɑ u kɑ kpɑkoro te nɑ u yi kuu ten dii te tɑ dɛɛre gem gem sɔɔ, mɑ u beku kɑre te doke u kɑ kpɑkoro te gɑndi nge mɛ Yinni Gusunɔ u nùn sɔ̃ɔwɑ.
22 Mɑ u tɑbulu ye doke nɔm geu giɑ ɑdɛrɔ ge sɔɔ, ɑ̀ n duɔ kuu ten mi. 23 Mɑ u pɛ̃ɛ ye yoruɑ tɑbulu wɔllɔ mɑm mɑm, ye bɑ kɑ Yinni Gusunɔ nɑɑwɑ, nge mɛ u nùn sɔ̃ɔwɑ.
24 Mɑ u dɑbu ge doke nɔm dwɑru giɑ tɑbulun deedeeru. 25 Mɑ u gu fitilɑnu sɔndi u sɔ̃rɑ Yinni Gusunɔn wuswɑɑɔ nge mɛ u nùn sɔ̃ɔwɑ.
26 Mɑ u kpɑkoro wurɑgii te doke ɑdɛrɔ ge sɔɔ beku kɑre ten bɔkuɔ te tɑ woodɑn kpɑkoro te gɑndi. 27 Mɑ u turɑre dɔ̃ɔ doke ten wɔllɔ, nge mɛ Yinni Gusunɔ u nùn sɔ̃ɔwɑ.
28 Mɑ u beku kɛnutiru doke kuu ten kɔnnɔwɔ. 29 Mɑ u yɑ̃ku yee te yi kuu ten kɔnnɔwɔ. Mɑ u yɑ̃ku dɔ̃ɔ mwɑɑrɑrugiru kɑ ɑbɔru gɑru kuɑ mi, nge mɛ Yinni Gusunɔ u nùn sɔ̃ɔwɑ.
30 Mɑ u boo ge doke yɑ̃ku yee te kɑ kuu ten bɑɑ sɔɔ. Mɑ u gu nim yibiɑ, mɛ bɑ koo kɑ tii dɛɛrɑsiɑ sɑ̃ɑrun sɔ̃. 31 Mɛyɑ Mɔwisi kɑ Aroni kɑ win bii tɔn durɔbu bɑ rɑ kɑ ben nɔmɑ kɑ nɑɑsu kpɑkie, 32 bɑ̀ n duɔ kuu ten mi, ǹ kun mɛ bɑ̀ n yɑ̃ku yee te susiɔ, nge mɛ Yinni Gusunɔ u Mɔwisi sɔ̃ɔwɑ.
33 Mɑ Mɔwisi u kuu te kɑ yɑ̃ku yee te kɑrɑ koosi. Mɑ u beku kɛnutiru doke yen kɔnnɔwɔ. Nge mɛyɑ u kɑ sɔmbu te wiru go.
Guru wii wuro te,
tɑ yɔ̃rɑ kuu ten wɔllɔ
34 Sɑnɑm mɛyɑ guru wii wuro te, tɑ kuu te wukiri mɑ Yinni Gusunɔn yiikon girimɑ yɑ tu yibɑ. 35 Mɔwisi u ǹ mɑɑ kpĩɑ u kuu te du yèn sɔ̃ guru wii wuro te, tɑ yɔ̃ ten wɔllɔ mɑ Yinni Gusunɔn yiikon girimɑ ye, yɑ yibɑ te sɔɔ.
36 Sɑɑ ye Isirelibɑ bɑ wɑ̃ɑ gbɑburɔ, guru wii wuro te, tɑ̀ n seewɑ kuu ten wɔllun di yerɑ bɑ rɑ se bu swɑɑ wɔri. 37 Adɑmɑ tɑ̀ kun seewe, bɑ ku rɑ swɑɑ wɔri.
38 Isirelibɑn sɑnum mɛ kpuro sɔɔ, Yinni Gusunɔn guru wii wuro te, tɑ rɑ n wɑ̃ɑwɑ win kuu ten wɔllɔ sɔ̃ɔ sɔɔ. Ǹ n kuɑ wɔ̃kuru, dɔ̃ɔwɑ tɑ rɑ n kɑ weenɛ._