Yɑ̃ku yeru
27
1 Yinni Gusunɔ u kpɑm Mɔwisi sɔ̃ɔwɑ u nɛɛ, kɑɑ yɑ̃ku yeru ko kɑ ɑkɑsiɑn dɑ̃ɑ. A de ten goonu nnɛ kpuro nu n nɛ, nu n sɑ̃ɑ gɔm soonu nɔɔbu nɔɔbu, kpɑ ten gunum mu n sɑ̃ɑ gɔm soonu itɑ. 2 Kpɑ ɑ ten wɔllun goo gɔmkinɔ kɑ̃ɑnu doke kpɑ ɑ nu sii gɑndu pote. 3 Kɑɑ yɑ̃ku yee ten dendi yɑ̃nu kpuro kowɑ kɑ sii gɑndu. Niyɑ gbɛ̃ɛ ni bɑ koo kɑ torom gurɑ, kɑ kɑɑtonu kɑ kɑɑto donnuginu, kɑ gbɛ̃ɛ nì sɔɔ bɑ koo yɑɑ yɛm doke bu kɑ yɛ̃kɑ, kɑ dɔ̃ɔ gurɑtii. 4 Kpɑ ɑ kɔkɔsɔ ko kɑ sii gɑndu kpɑ ɑ yen goo gɔmkinɔ sii gɑndun sumi doke. 5 Yen biru kpɑ ɑ ye suɑ ɑ doke yɑ̃ku yee ten kɔkɔrɔ kpɑ yen nɔɔ gu seemɑ wɔllɔ yɑ̃ku yee ten suunu suunukɑɔ. 6 Kpɑ ɑ tu suɑtii yiru kuɑ kɑ ɑkɑsiɑn dɑ̃ɑ pɔɔsi ɑ yi sii gɑndu pote. 7 Kɑɑ dɑ̃ɑ pɔɔsi yi wɑsi sumi yi sɔɔ bɑ n dɑ kɑ yɑ̃ku yee te sue. 8 Kɑɑ yɑ̃ku yee te kowɑ kɑ dɑ̃ɑ bɛsi tɑ n wɔru mɔ, nge te nɑ nun sɔ̃ɔsi.
Kuu ten kɑrɑ
9 Yenibɑ kpuron biru Yinni Gusunɔ u mɑɑ Mɔwisi sɔ̃ɔwɑ u nɛɛ, ɑ kuu bekurugii te kɑrɑ koosio. Yen sɔ̃ɔ yɛ̃sɑn nɔm dwɑru giɑ kpɑ ɑ bekunu kɑre ni bɑ wesɑ kɑ wɛ̃ɛ dɑmgii. Bɑ̀ n ni kpuro swɛɛnɑ, nu ko gɔm soonu wunɔbu (100). 10 Bɑ koo bekɑ ye sɔrewɑ dɑ̃ɑ bɛsi sinumgii yɛndu sɔɔ kɑ sɔretii kɑ sii dɛki yi bɑ kuɑ kɑ sii geesu. Kpɑ dɑ̃ɑ bɛsi yin yɔ̃rɑtii yi n sɑ̃ɑ sii gɑndu. 11 Nge mɛyɑ yɑ ko n mɑɑ sɑ̃ɑ sɔ̃ɔ yɛ̃sɑn nɔm geu giɑ, kpɑ ye yiru ye, yɑ n dɛ̃ɛbu nɛ. 12 Kɑrɑ yen sɔ̃ɔ duu yeru giɑ kɑɑ bekunu kɑre dɑ̃ɑ bɛsi sinumgii wɔkuru sɔɔ yi bɑ yɔ̃rɑtii kuɑ. Kɑrɑ yen yɑsum mu ko n sɑ̃ɑwɑ gɔm soonu weerɑɑkuru. 13 Mɛyɑ yen sɔ̃ɔ yɑri yeru giɑ yen yɑsum ko n mɑɑ sɑ̃ɑwɑ gɔm soonu weerɑɑkuru. 14-15 Yen suunu sɔɔ kɑɑ kɔnnɔ wĩɑ gɑ n sɑ̃ɑ gɔm soonu yɛndu. Kpɑ ɑ kɔnnɔ gen beri berikɑɔ bekɑ kɑre gɔm soonu wɔkurɑ nɔɔbu nɔɔbu dɑ̃ɑ bɛsi sinumgii itɑ itɑ sɔɔ. Dɑ̃ɑ bɛsi yin bɑɑyere yɑ ko n yɔ̃rɑtiɑ mɔ. 16 Kɑrɑ yen kɔnnɔn tii sɔɔ, kɑɑ beku kɛnutiru doke, tèn yɑsum ko n sɑ̃ɑ gɔm soonu yɛndu. Wɛ̃ɛ dɑmgiiyɑ kɑɑ kɑ tu ko kpɑ ɑ tu burɑru kuɑ kɑ wɛ̃ɛ wunɔmgii kɑ yi bɑ wɔ̃kuɑ kɑ burɑ kɑ mɑɑ gɑɑdurɑ. Kpɑ ɑ mɑɑ tu gɑbɑ kuɑ kɑ dɑ̃ɑ bɛsi sinumgii nnɛ yi yi yɔ̃rɑtii mɔ. 17 Kɑrɑ yen beku sɔretii kɑ yen sii dɛki yi, yì sɔɔ bɑ koo beku ni sɔresi, ye kpuro yɑ ko n sɑ̃ɑwɑ sii geesu, kpɑ yen dɑ̃ɑ bɛsi sinumgii yin yɔ̃rɑtii yi n sɑ̃ɑ sii gɑndu. 18 Kɑrɑ yen dɛ̃ɛbu bu ko n sɑ̃ɑwɑ gɔm soonu wunɔbu (100) kpɑ yen yɑsum mu n mɑɑ sɑ̃ɑ gɔm soonu weerɑɑkuru, kpɑ yen gunum mu n sɑ̃ɑ gɔm soonu nɔɔbu. Bɑ koo yen bekɑ wesiwɑ kɑ wɛ̃ɛ dɑmgii kpɑ bu sii pɔɔsi yin yɔ̃rɑtii ko kɑ sii gɑndu. 19 Kuu bekurugii ten dendi yɑ̃nu kpuro, sii gɑndɑ bɑ koo kɑ nu ko. Mɛyɑ kuu te kɑ kɑrɑ yen gɑbɑtiɑn kurum kpuro yɑ ko n sɑ̃ɑwɑ sii gɑndu.
Fitilɑ gen gum
20 Yerɑ Yinni Gusunɔ u kpɑm Mɔwisi sɔ̃ɔwɑ u nɛɛ, ɑ de Isirelibɑ bu dɑ̃ɑ ye bɑ mɔ̀ olifin binun gum ko mɛ mu geɑ sɑ̃ɑ, bɑ n dɑ kɑ kuu ten fitilɑ sɔ̃re bɑɑdommɑ. 21 Kuu bekurugii ten ɑdɛrɔ ge sɔɔrɑ Aroni kɑ win bibu bɑ koo dɑ bu fitilɑ ni yi yi, beku kɑre ten biruɔ te tɑ woodɑn kpɑkororu beruɑ. Mɛyɑ fitilɑ ni, nu ko n dɑ n sɔ̃re sɑɑ yokɑn di sere kɑ bururu. Isirelibɑ bɑ koo woodɑ yeni nɛnɛwɑ sere kɑ bɑɑdommɑɔ.