Yɑ̃ku kowobun sɑ̃ɑ yɑ̃nu
28
1 Yinni Gusunɔ u kpɑm Mɔwisi sɔ̃ɔwɑ u nɛɛ, ɑ wunɛn mɔɔ Aroni kɑ win bibu nnɛ ye wunɔ nɛnɛm Isirelibɑn suunu sɔɔn di kpɑ bɑ n sɑ̃ɑ nɛn yɑ̃ku kowobu. Bii berɑ Nɑdɑbu kɑ Abihu kɑ Eleɑsɑɑ kɑ Itɑmɑɑ. 2 A de bu wunɛn mɔɔ Aroni wi sɑ̃ɑ yɑ̃nu kuɑ ni nu koo win yiiko kɑ win girimɑ sɔ̃ɔsi. 3 Yen sɔ̃, be nɑ yen bwisi wɛ̃, ɑ bu woodɑ wɛ̃ɛyɔ bu kɑ nùn yɑ̃ɑ ni kuɑ ni u koo doke dɔmɑ te bɑ koo nùn tusiɑ tɔmbun wuswɑɑɔ kɑ sɑnɑm mɛ u win sɔmburu mɔ̀. 4 Yɑ̃ɑ ni bɑ koo ko wee, bɔɔ bɑrɑ ye u koo doke win tororun wɔllɔ, kɑ yɑbe tɑrɑkpe, kɑ yɑberu kɑ tɑko ye bɑ sɔmɑ kuɑ kɑ dɑwɑni kɑ sere mɑɑ sɛ̃kɑtiɑ. Yenibɑ kpuro yɑ ko n sɑ̃ɑwɑ yɑ̃ɑ ni Aroni kɑ win bibu bɑ ko n dɑ doke bɑ̀ n yɑ̃kurun sɔmburu mɔ̀. 5 Bɑ koo yɑ̃ɑ ni kpuro kowɑ kɑ beku ni bɑ wɔ̃kuɑ kɑ burɑ kɑ mɑɑ gɑɑdurɑ kɑ ni bɑ wunɔm doke, kɑ ni bɑ kuɑ kɑ wɛ̃ɛ dɑmgii kɑ wurɑn wɛ̃ɛ siiri.
Yɑbe tɑrɑkpe
6 Yinni Gusunɔ u mɑɑ Mɔwisi sɔ̃ɔwɑ u nɛɛ, kɑɑ yɑbe tɑrɑkpe kowɑ kɑ beku te bɑ kuɑ kɑ wɛ̃ɛ dɑmgii kpɑ ɑ ge burɑru kuɑ kɑ wɛ̃ɛ wunɔmgii kɑ yi bɑ wɔ̃kuɑ kɑ burɑ kɑ mɑɑ gɑɑdurɑ kɑ wurɑn wɛ̃ɛ siiri. 7 Kpɑ ɑ gu sɑri kuɑ yi bɑ koo kɑ gen senu sɔrenɑ. 8 Kpɑ ɑ sɛ̃kɑtiɑ ko yɑ n sɑ̃ɑ beku nɔni tee kɑ yɑbe tɑrɑkpe ge. Kpɑ yɑ n yinusi ge sɔɔ. 9 Yen biru ɑ kpee gobiginu yiru suo nìn nɔni sɑ̃ɑ bɛrɔ wuru, kpɑ ɑ Isirelin bibu wɔkurɑ yiru yen yĩsɑ yore ni sɔɔ. 10 Teerɔ ben nɔɔbɑ tiɑn yĩsɑ. Teerɔ mɑɑ nɔɔbɑ tiɑ benin yĩsɑ. Kɑɑ ye kpuro yorewɑ nge mɛ̀sum bɑ kerɑnɛ. 11 Kɑɑ yĩsɑ ye yorewɑ kpee ni sɔɔ, nge mɛ bɑ rɑ yore sisɔ. À n ye yoruɑ ɑ kpɑ, kpɑ ɑ kpee ni wurɑ gore ɑ kɑ sikerenɑ. 12 Kpɑ ɑ nu mɑni tɑrɑkpe gen sɑri sɔɔ. Aroni ù n nu doke win senɔ, niyɑ nu koo sɔ̃ɔsi mɑ kɑ Isirelibɑn yĩsinɑ u duɑ nɛn sɑ̃ɑ yerɔ, kpɑ nɛ, Yinni Gusunɔ nɑ n kɑ bu yɑɑye. 13 Mi bɑ kpee ni gore mu ko n sɑ̃ɑwɑ wurɑ, 14 kpɑ ɑ yɔni wurɑgii yiru tɑri ɑ yi sɔre wurɑ ye sɔɔ.
Bɔɔ bɑrɑ
15 Kɑɑ bɔɔ bɑrɑ ko ye Aroni u ko n dɑ doke win tororɔ, u kɑ nɛ, Yinni Gusunɔn kĩru bikiɑ. Ye kɑ tɑrɑkpe ge, yɑ ko n sɑ̃ɑwɑ beku nɔni tee, kɑ burɑ teeru.
16 Bɔɔ bɑrɑ yen goonu nnɛ kpuro nu ko n nɛwɑ, nu n sɑ̃ɑ gɔm soonun bɔnu bɔnu. 17 Kpɑ ɑ bɔɔ bɑrɑ ye sɔɔ kpee gobigii bwese bwesekɑ mɑni yu ko sĩɑ nnɛ. Kpee nin nɔni wee. Sĩi gbiikɑɑ sɔɔ, swɑ̃ɑru kɑ dɔm buuru, kɑ wuru beku. 18 Yiruse sɔɔ mɑɑ, swɑ̃ɑru kɑ boogu kɑ sɔ̃ɔ tiro. 19 Itɑse sɔɔ, dɔm buuru kɑ nɔni bwese bwesekɑ kɑ gɑɑdurɑ. 20 Nnɛse sɔɔ, wuru beku kɑ bɛrɔ wuru, kɑ nɔni bwese bwesekɑ. Kpɑ ɑ ni kpuro wurɑ gore gore. 21 Kpee bwese bwesekɑ wɔkurɑ yiru yen bɑɑtere sɔɔrɑ kɑɑ Isirelin bibun yĩsinu yore tiɑ tiɑ. Kɑɑ nu yorewɑ nge mɛ bɑ rɑ yore sisɔ.
22 Kɑɑ yɔni wurɑgii yiru ko bɔɔ bɑrɑ ye sɔɔ. 23 Kpɑ ɑ tɑɑminu yiru ko kɑ wurɑ, ɑ sɔre bɔɔ bɑrɑ yen soo wɔrikisɔ. 24 Tɑɑminu yiru ye sɔɔrɑ bɑ koo yɔni yi sɔre sɔre. 25 Kpɑ ɑ bɔɔ bɑrɑ yen yɔni yi gbinisi tɑrɑkpe gen sɑriɔ. 26 Yen biru kɑɑ mɑɑ tɑɑminu yiru ko kɑ wurɑ, ɑ nu doke bɔɔ bɑrɑ yen soo temkisɔ si su yɑbe tɑrɑkpe ge girɑri. 27 Kpɑ ɑ tɑɑminu yiru ko ɑ doke yɑbe tɑrɑkpe gen sɑrin nɔɔwɔ wuswɑɑɔ, sɛ̃kɑtiɑ yen wɔllu giɑ. 28 Yen biru kɑɑ bɔɔ bɑrɑ yen tɑɑmii ni sɔɔ wɛ̃ɛ gɑɑdurɑgii doke kpɑ ɑ yi gbinɛ yɑbe tɑrɑkpe gen tɑɑminu sɔɔ. Nge mɛyɑ kɑɑ kɑ ye sɔre yɑbe tɑrɑkpe ge sɔɔ, kpɑ yu ku kɑ bɑ̃ɑri.
29 Sɑɑ ye Aroni u duɔ kuu bekurugii ten mi, u ko n bɔɔ bɑrɑ ye dokewɑ win tororɔ yè sɔɔ bɑ Isirelibɑn bwese kɛri wɔkurɑ yiru yen yĩsɑ yoruɑ, kpɑ nɛ, Yinni Gusunɔ nɑ n kɑ bɛɛ yɑɑye bɑɑdommɑ. 30 Kɑɑ mɑɑ urimu kɑ tumimu doke bɔɔ bɑrɑ ye sɔɔ, kpɑ yɑ n wɑ̃ɑ Aronin tororɔ sɑɑ kpuro ye u duɔ nɛn sɑ̃ɑ yerɔ, kpɑ u kɑ giɑ ye nɑ kĩ Isirelibɑn sɔ̃.
Sɑ̃ɑ yɑ̃ɑ ni nu tie
31 Yinni Gusunɔ u kpɑm Mɔwisi sɔ̃ɔwɑ u nɛɛ, yɑbe tèn wɔllɔ yɑ̃ku kowo u koo yɑbe tɑrɑkpe ge sɔndi, kɑɑ tu kowɑ kɑ beku gɑɑdurɑgiru. 32 Kpɑ ɑ ten wĩirɔ sɔmɑ doke ɑ sinum koosiɑ tu ku rɑɑ kɑ gɛ̃ɛrɑ. Wĩi ten min diyɑ u koo wiru wɑsi ù n yɑbe te sebumɔ. 33 Kpɑ ɑ mɑɑ ten temɔ tusɑnu doke nu n kɑ dɑ̃ɑ mɑrum gɑm weenɛ ni bɑ kuɑ kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ kɑ wɛ̃ɛ wunɔmgii, kɑ sere mɑɑ yɑngire piiminu wurɑginu ɑ kɑ sikerenɑ. 34 Kpɑ ɑ de dɑ̃ɑ mɑrum weenɑsim mɛ kɑ yɑngire ni, nu n kpɑsɑ sɑ̃ɑ. 35 Yɑbe terɑ Aroni ko n dɑ n sebuɑ ù n sɔmburu mɔ̀ kuu bekurugii te sɔɔ. Mɛ̀n nɔɔ u duɔ, kɑ mɛ̀n nɔɔ u yɑriɔ nɑ kon dɑ n yɑngire nin wɔkinu nɔɔmɔwɑ, kpɑ n ku nùn go kuu bekurugii te sɔɔ.
36 Kpɑ ɑ mɑɑ wurɑn bɑtɑni ko ɑ yore ye sɔɔ, wini sɑ̃ɑwɑ Yinni Gusunɔgii. Kɑɑ ye yorewɑ nge mɛ bɑ rɑ yore sisɔ. 37 Kpɑ ɑ bɑtɑni ye sɔresi Aronin dɑwɑnin wuswɑɑɔ kɑ wɛ̃ɛ gɑɑdurɑgii. 38 U ko n ye dokewɑ bɑɑdommɑ ù n dɔɔ nɛn sɑ̃ɑ yerɔ, kpɑ nɛ, Yinni Gusunɔ n kɑ Isirelibɑn yɑ̃kunu mwɑ bɑɑ bɑ̀ n torɑnu gɑnu kuɑ sɑɑ ye bɑ yɑ̃ku ni mɔ̀.
39 Kpɑ ɑ mɑɑ tɑko kɑ dɑwɑni ko kɑ wɛ̃ɛ dɑmgii, kɑ sɛ̃kɑtiɑ ye bɑ sɔmɑ doke.
40 Kɑɑ mɑɑ Aronin bibu tɑkobɑ kuɑ kɑ mɑɑ sɛ̃kɑtii kɑ furɔsu, yɑ n sɑ̃ɑ ben burɑru te tɑ ben girimɑ sɔ̃ɔsimɔ.
41 Yen biru kɑɑ Aroni kɑ win bibu yɑ̃ɑ ni sebusiɑ, kpɑ ɑ bu gum tɑ̃re wirɔ ɑ kɑ sɔ̃ɔsi mɑ nɑ bu gɔsɑ bɑ n sɑ̃ɑ nɛn yɑ̃ku kowobu. 42 A bu sokoto kpirinu kuo kpɑ bu ku kɑ ben tereru wɑn sɔ̃. Kɑɑ ye kpuro kowɑ kɑ wɛ̃ɛ dɑmgii. 43 Aroni kɑ win bibu bɑ ko n nu dokewɑ bɑ̀ n dɔɔ kuu bekurugii te sɔɔ, ǹ kun mɛ bɑ̀ n susiɔ yɑ̃ku yerɔ bu kɑ ben sɔmburu ko. Yerɑ yɑ koo de nɑ kun bu go nɛn sɑ̃ɑ yerɔ, domi bɑ ǹ wɑ̃ɑ mi tereru. Yeni yɑ ko n sɑ̃ɑwɑ woodɑ sere kɑ bɑɑdommɑɔ Aroni kɑ win bibun bweserun sɔ̃.