Kuu bekurugii tèn mi
bɑ rɑ kɑ Yinni Gusunɔ yinnɛ
26
1 Yinni Gusunɔ u Mɔwisi sɔ̃ɔwɑ u nɛɛ, ɑ bekunu wɔkuru wesio kɑ wɛ̃ɛ dɑmgii kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ, kɑ mɑɑ wɛ̃ɛ wunɔmgii, kpɑ ɑ bekɑ ye burɑru dokeɑ tɑ n sɑ̃ɑ wɔllun kɔ̃sobun weenɑsibu. Kpɑ ɑ kɑ mɑn kuu bekurugiru kuɑ. 2 Bekɑ ye kpuro yɑ ko n nɛwɑ. Yen dɛ̃ɛbu bu ko n sɑ̃ɑwɑ gɔm soonu tɛnɑ yiru sɑri. Yen yɑsum mɑɑ gɔm soonu nnɛ. 3 Bekɑ yen nɔɔbu nɔɔbuwɑ bɑ koo suɑ bu swɛɛnɑ. 4 Yen biru kpɑ ɑ yen bɑɑyeren goo bɑkɑ teerɔ wɛ̃ri doke kɑ wɛ̃ɛ yi bɑ wɔ̃kuɑ kɑ burɑ, yi bɑ koo rɑ kɑ ye sɔrenɑ. 5 Wɛ̃ri weerɑɑkuukuubuwɑ kɑɑ doke bekɑ ye bɑ swɛɛnɑn bɑɑyeren goo bɑkɑ teerɔ yi n nɔɔ kisinɛ. 6 Yen biru kɑɑ sɔretinu weerɑɑkuru ko kɑ wurɑ bu kɑ bekɑ ye kpuro sɔrenɑ, kpɑ yu ko beku teeru kuu ten sɔ̃.
7 Kpɑ ɑ mɑɑ bekunu wɔkurɑ tiɑ wesi kɑ boo sɑnsu ni bɑ koo kuu bekurugii te wukiri. 8 Bekɑ ye kpuro yɑ ko n nɛwɑ. Yen dɛ̃ɛbu bu ko n sɑ̃ɑwɑ gɔm soonu tɛnɑ. Yen yɑsum mɑɑ gɔm soonu nnɛ. 9 Bekɑ yen nɔɔbuwɑ bɑ koo gbi bu swɛɛnɑ kpɑ bu mɑɑ nɔɔbɑ tiɑ yeni swɛɛnɑ. Kpɑ bu nɔɔbɑ tiɑse ten sukum bue kuu ten wɔllɔ wuswɑɑ giɑ. 10 Kpɑ ɑ wɛ̃ri weerɑɑkuukuubu doke bekɑ ye bɑ swɛɛnɑn bɑɑyeren goo bɑkɑ teerɔ. 11 Yen biru kɑɑ sɔretinu weerɑɑkuru ko kɑ sii gɑndu, kpɑ ɑ nu doke bekɑ yen wɛ̃ri yi sɔɔ, ɑ kɑ ye sɔrenɑ, yu ko beku teeru. 12 Bɑ̀ n kɑ tu kuu te wukiri, beku te tɑ kuu te sɑre mi, ɑ de tɑ n sɑ̃ɑre kuu ten biruɔ. 13 Kuu ten yɑsum giɑ, bekɑ ye yɑ mɑɑ tiɑrɑ, ɑ de yɑ n sɑ̃ɑre beri berikɑ gɔm soo teeru. 14 Kɑɑ bekunu yiru ko bu kɑ kuu te wukiri, teeru kɑ yɑ̃ɑ kinɛnun gɔni, yi bɑ swɛ̃rɑsiɑ, teeru mɑɑ kɑ yɑɑ gɔni sinumgii, te tɑ ko n wɑ̃ɑ kpuron wɔllɔ.
15 Akɑsiɑn dɑ̃ɑ bɛsiyɑ kɑɑ girɑ ɑ kɑ kuu te ko. 16-17 Dɑ̃ɑ bɛsi yi, yi ko n nɛwɑ. Yin dɛ̃ɛbu bu ko n sɑ̃ɑwɑ gɔm soonu wɔkuru kpɑ yin yɑsum mu n sɑ̃ɑ gɔm soo teeru kɑ bɔnu. Kpɑ ɑ yin bɑɑyere sɔretinu yiru dokeɑ yi n kɑ sɔrenɛ. 18 Kuu ten sɔ̃ɔ yɛ̃sɑn nɔm dwɑru giɑ dɑ̃ɑ bɛsi yɛndɑ kɑɑ girɑ. 19 Kpɑ ɑ yi yɔ̃rɑtii kuɑ weeru kɑ sii geesu ɑ doke yiru yiru, yin tiɑ sɔɔ temɔ, yi n kɑ sɔretii ni nɛni. 20 Ten sɔ̃ɔ yɛ̃sɑn nɔm geu giɑ bɛsi yɛndɑ kɑɑ mɑɑ ko. 21 Kpɑ ɑ mɑɑ yi yɔ̃rɑtii weeru kuɑ kɑ sii geesu bu doke yiru yiru yin tiɑ sɔɔ. 22 Ten sɔ̃ɔ duu yeru giɑ dɑ̃ɑ bɛsi nɔɔbɑ tiɑ kɑɑ girɑ. 23 Dɑ̃ɑ bɛsi yiru yiruwɑ kɑɑ doke ten goo gɔmkinu yiruɔ biru giɑ. 24 Dɑ̃ɑ bɛsi yi, yi ko n mɑninɛwɑ yiru yiru sɑɑ tem di sere kɑ wɔllɔ. Kpɑ ɑ sumi doke yi n kɑ sɔrenɛ wɔllɔ. Mɛsumɑ kɑɑ goo gɔmkinu yiru yen dɑ̃ɑ bɛsi yiru yiru ye kuɑ. 25 Kpɑ yi kpuro yi n sɑ̃ɑ dɑ̃ɑ bɛsi nɔɔbɑ itɑ. Kpɑ ɑ yen bɑɑyere sɔɔ yɔ̃rɑtii doke yiru yiru yi bɑ kuɑ kɑ sii geesu.
26-27 Yen biru kpɑ ɑ ten yɛ̃si itɑɔ ɑkɑsiɑn dɑ̃ɑ nɔɔbu nɔɔbu kɑre. 28 Dɑ̃ɑ kɑretiɑ ye yɑ wɑ̃ɑ yɛ̃sɑ bɑɑyeren suunu sɔɔ mi, yen nɔɔ gɑ koo yɔ̃rɑwɑ dɑ̃ɑ gɔmkinɔ. 29 Kpɑ ɑ mɑɑ dɑ̃ɑ bɛsi yi kɑ dɑ̃ɑ kɑretii yi wurɑ pote. Kpɑ ɑ mɑɑ wurɑn sumi ko yì sɔɔ bɑ koo dɑ̃ɑ kɑretii yi wɑsi wɑsi. 30 À n yenibɑ kpuro mɛnnɑ ɑ kpɑ, sɑɑ yerɑ kɑɑ den kuu bekurugii te girɑ tɑ n sɑ̃ɑ nge te nɑ nun sɔ̃ɔsi guu te bɑ mɔ̀ Sinɑin wɔllɔ.
31 Kpɑ ɑ mɑɑ beku kɑreru ko kɑ wɛ̃ɛ dɑmgii kɑ wɛ̃ɛ ye bɑ wɔ̃kuɑ kɑ burɑ kɑ mɑɑ gɑɑdurɑ kɑ wɛ̃ɛ wunɔmgii. Kpɑ ɑ wɔllun kɔ̃sobun weenɑsibu ko beku te sɔɔ, kpɑ yɑ n sɑ̃ɑ burɑru. 32 Kɑɑ ɑkɑsiɑn dɑ̃ɑ bɛsi sinumgii nnɛ ko ɑ wurɑ pote kpɑ ɑ sɔretii wurɑgii doke yi sɔɔ, yi kɑ beku kɑre te gɑbɑ. Kpɑ ɑ dɑ̃ɑ bɛsi yi yɔ̃rɑtii dokeɑ yi bɑ kuɑ kɑ sii geesu. 33-34 Kpɑ ɑ beku kɑre te bwɛ̃ te tɑ ko n dii sɔɔ ge gɑ dɛɛre gem gem kɑ ɑdɛrɔ ge gɑ dɛɛre bɔnu sɑ̃ɑ.
À n beku kɑre te bwɛ̃ ɑ kpɑ, ten sɔɔwɔwɑ kɑɑ kɑ kpɑkoro te dɑ ɑ yi tè sɔɔ woodɑn kpee bɛsi yiru ye, yɑ wɑ̃ɑ. Kpɑ ɑ kpɑkoro te wukiritiɑ dokeɑ dii te tɑ dɛɛre gem gem sɔɔ mi. 35 Kɑɑ tɑbulu ye yiwɑ nɔm geu giɑ ɑdɛrɔ ge sɔɔ ɑ̀ n duɔ kuu ten mi, kpɑ ɑ dɑbu ge yi nɔm dwɑru giɑ, tɑbulu ye kɑ dɑbu ge, nu n mɛɛrinɛ.
36 A kuu ten beku kɛnutiru wesio kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ kɑ wɛ̃ɛ wunɔmgii kɑ wɛ̃ɛ dɑmgii, kpɑ ɑ beku te sɔmɑ dokeɑ. 37 Kpɑ ɑ ɑkɑsiɑn dɑ̃ɑ bɛsi sinumgii nɔɔbu wurɑ pote kpɑ ɑ yin bɑɑyere yɔ̃rɑtiɑ kuɑ kɑ sii gɑndu. Yen biru kpɑ ɑ sɔretii wurɑgii doke yin bɑɑyere sɔɔ bu kɑ beku kɛnutii te bwɛ̃.