Kɛ̃ɛ ni Isirelibɑ bɑ koo wɛ̃
bu kɑ Yinni Gusunɔn
sɑ̃ɑ yeru ko
25
1 Yinni Gusunɔ u Mɔwisi sɔ̃ɔwɑ u nɛɛ, 2 ɑ Isirelibɑ sɔ̃ɔwɔ bu kɑ mɑn kɛ̃nu nɑɑwɑ. Ye bɑ wɛ̃ kɑ nuku tiɑ kpuro, ɑ mɔɔ. 3 Kɛ̃ɛ ni bɑ koo wɛ̃, niyɑ, wurɑ kɑ sii geesu kɑ sii gɑndu, 4 kɑ ɑnɑ bekunu ni bɑ wɔ̃kuɑ kɑ burɑ, kɑ mɑɑ gɑɑdurɑ kɑ ni bɑ swɛ̃rɑsiɑ kɑ sɛ̃ɛsu, kɑ ni bɑ wesɑ kɑ wɛ̃ɛ dɑmgii kɑ yɑɑ sɑnsun bekɑ, 5 kɑ yɑ̃ɑ gɔni yi bɑ swɛ̃rɑsiɑ kɑ sɛ̃ɛsu, kɑ gɔni sinumgii, kɑ dɑ̃ɑ dɑmgiɑ, 6 kɑ gum mɛ bɑ rɑ kɑ fitilɑ sɔ̃re kɑ gum mɛ mu turɑre mɔ mɛ bɑ rɑ kpuro tɑ̃re bu kɑ sɔ̃ɔsi mɑ Gusunɔ u ye gɔsɑ nɛnɛm, kɑ turɑre ye bɑ rɑ dɔ̃ɔ doke, 7 kɑ kpee gobiginu nìn nɔni sɑ̃ɑ bɛrɔ wuru kɑ kpee gobiginu bwese bwesekɑ kɑ ni bɑ koo doke yɑ̃ku kowo tɔnweron yɑbe tɑrɑkpe sɔɔ kɑ sere mɑɑ win bɔɔ bɑrɑn wɔllɔ. 8 Yen biru i kɑ mɑn ye kpuro kuu bekurugiru kuo nɑ n kɑ wɑ̃ɑ bɛɛn suunu sɔɔ. 9 I ko tu kowɑ kɑ ten dendi yɑ̃nu kpuro nge mɛ kon bɛɛ sɔ̃ɔsi.
Yinni Gusunɔn woodɑn
kpɑkororu
10 Bɑ koo kpɑkororu ko kɑ dɑ̃ɑ dɑmgiɑ. Ten dɛ̃ɛbu bu ko n sɑ̃ɑwɑ gɔm soonu yiru kɑ bɔnu. Ten yɑsum mu ko n mɑɑ sɑ̃ɑwɑ gɔm soo teeru kɑ bɔnu kpɑ ten gunum mu n sɑ̃ɑ gɔm soo teeru kɑ bɔnu. 11 Kpɑ ɑ tu wurɑ pote ten sɔɔwɔ kɑ tɔɔwɔ. Kpɑ ɑ ten goonu nnɛ kpuro nɔɔ bɔkɑ kuɑ kɑ wurɑ. 12 Kpɑ ɑ wurɑn sumi ko wɑsi nnɛ ɑ doke ten goo gookɑn yinnɑ yenu sɔɔ, yiru yɑ n mɛɛrinɛ bee tiɑ, yiru yeni yɑ n mɑɑ mɛɛrinɛ bee tiɑ. 13 Yen biru ɑ dɑ̃ɑ pɔɔsi kɑsu yiru ɑ yi wurɑ pote. 14 Kpɑ ɑ yi wɑsi kpɑkoro ten sumi sɔɔ beri berikɑ, yi n sɑ̃ɑ ten nɛnutii. 15 Sumi yi sɔɔrɑ dɑ̃ɑ pɔɔsi yi, yi ko n dɑ n wɑ̃ɑ. Bɑ ǹ yi wunɑmɔ min di. 16 Yen biru kɑɑ woodɑn kpee bɛsi yi kon nun wɛ̃ doke kpɑkoro te sɔɔ.
17 Kpɑ ɑ kpɑkoro te wukiritiɑ kuɑ kɑ wurɑ yɑ n kɑ tu sɑkɑ nɛ. 18-19 Kpɑ ɑ wɔllun kɔ̃sobu yirun weenɑsibu ko kɑ wurɑ ɑ mɑni wukiritiɑ yen goo piiminun wɔllɔ gee kɑ gee. 20 Kpɑ yi n kpɑkoro ten wukiritiɑ ye kɑsɑ wukiri mɑm mɑm. Yi ko n wuswɑɑ kisinɛwɑ yi n mɛɛrinɛ. 21 Kɑɑ woodɑn kpee bɛsi yi doke kpɑkoro te sɔɔ, ɑ sere ten wukiritiɑ ye doke. 22 Yen wɔllɔwɑ ko nɑ n dɑ kɑ nun yinnɛ kɔ̃sobu yiru yen bɑɑ sɔɔ, kpɑ n nun nɛn woodɑbɑ kpuro wɛ̃ Isirelibɑn sɔ̃.
Tɑbulu yèn mi bɑ koo pɛ̃ɛ yi,
ye bɑ kɑ Gusunɔ nɑɑwɑ
23 Yinni Gusunɔ u kpɑm Mɔwisi sɔ̃ɔwɑ u nɛɛ, kɑɑ tɑbulu ko kɑ dɑ̃ɑ dɑmgiɑ. Yen dɛ̃ɛbu ko n sɑ̃ɑwɑ gɔm soonu yiru, yen yɑsum mu ko n mɑɑ sɑ̃ɑ gɔm soo teeru, kpɑ yen gunum mu n sɑ̃ɑ gɔm soo teeru kɑ bɔnu. 24 Kpɑ ɑ ye kpuro wurɑ pote, kpɑ ɑ mɑɑ yen goo gookɑ nɔɔ bɔkɑ kuɑ kɑ wurɑ. 25 Yen biru kpɑ ɑ dɑ̃ɑ bɛsi piiminu gore yen goo gookɑ mi, ni nu kɑ nɔm tɑrɑru yɑsum nɛ, ɑ kɑ sikerenɑ, kpɑ ɑ nin tii wurɑ pote. 26 Kpɑ ɑ mɑɑ sumi nnɛ ko kɑ wurɑ ɑ doke tɑbulu yen goo gookɑɔ mi yen nɑɑsu gire gire. 27 Mi bɑ dɑ̃ɑ bɛsi piimii ni goren bɔku bɔkukɑ sɔɔrɑ sumi yi, yi ko n wɑ̃ɑ, kpɑ bu dɑ̃ɑ pɔɔsi wɑsi yi sɔɔ, bɑ n dɑ kɑ tɑbulu ye sue. 28 Dɑ̃ɑ pɔɔsi yi, yi ko n sɑ̃ɑwɑ dɑ̃ɑ dɑmgiɑ kpɑ ɑ yi wurɑ pote. 29 Yen biru kɑɑ gbɛ̃ɑ ko kɑ nɔri kɑ pɛrɛntibɑ kɑ gbɛ̃ɛ yorukunu, ye kpuro yɑ n sɑ̃ɑ wurɑgiɑ kpɑ bɑ n dɑ kɑ dendi bɑ n yɑ̃ku tɑm wisimɔ. 30 Kpɑ ɑ pɛ̃ɛ ye bɑ kɑ mɑn nɑɑwɑ sɔndi tɑbulu yen wɔllɔ. A ku rɑ de pɛ̃ɛ ye, yu biɑrɑ mi. A de yɑ n dɑ n wɑ̃ɑ nɛn wuswɑɑɔ bɑɑdommɑ.
Fitilɑn dɑbu
31-32 Yinni Gusunɔ u kpɑm Mɔwisi sɔ̃ɔwɑ u nɛɛ, kɑɑ dɑbu ko kɑ wurɑ geɑ, gɑ n kɑ̃ɑsi mɔ nɔɔbɑ tiɑ, gen yɛ̃si yɛ̃sikɑɔ itɑ itɑ. Kpɑ gen yɔ̃rɑtiɑ kɑ gen pɔturɑ kɑ gen kɑ̃ɑsi kɑ gen burɑ te tɑ kɑ dɑ̃ɑ mɑrum kɑ biibii weenɛ, ye kpuro yɑ n sɑ̃ɑ bɔri tiɑ.
33 A de kɑ̃ɑsi nɔɔbɑ tiɑ yen bɑɑyere yɑ n burɑnu itɑ itɑ mɔ ni nu kɑ biibii weenɛ. 34 Kpɑ dɑbu gen pɔturɑn tii yɑ n burɑnu nnɛ mɔ ni nu kɑ dɑ̃ɑ mɑrum weenɛ. 35 Mi kɑ̃ɑsi yiru yiru yi gbinnɛ kɑ pɔturɑ, kɑɑ nin temɔ burɑru koosiwɑ te tɑ kɑ dɑ̃ɑ mɑrum weenɛ. 36 Burɑ te, kɑ kɑ̃ɑsi yi, ye kpuro yɑ n sɑ̃ɑ wurɑn bɔri tiɑ. 37 Yen biru kɑɑ fitilɑnu nɔɔbɑ yiru ko, kpɑ ɑ nu sɔndi sɔndi dɑbu gen wɔllɔ kɑ gen tiin wii kpiirɔ. Kpɑ bɑ n nu sɔ̃re nu n yɑm bururɑsie. 38 Bɑku piibu ge bɑ ko n dɑ kɑ fitilɑ nin dɔ̃ɔ sɔmɛ kɑ mì sɔɔ nin torom mu ko n dɑ wɔriki, kɑɑ ye kpuro kowɑ kɑ wurɑ geɑ. 39 Dɑbu ge, kɑ gen dendi yɑ̃nu kpuro, wurɑn kilo tɛnɑn sɑkɑwɑ kɑɑ kɑ ye ko. 40 Wunɛ Mɔwisi, ɑ de ɑ n sɔmbu te nɔni doke kpɑ ɑ kuu te ko tɑ n sɑ̃ɑ nge te nɑ nun sɔ̃ɔsi guuru wɔllɔ.