Mɔwisi kɑ Isirelibɑn womu
15
1 Sɑɑ yerɑ Mɔwisi kɑ Isirelibɑ bɑ Yinni Gusunɔ siɑrɑbun womu kuɑ. Bɑ nɛɛ,
kon Yinni Gusunɔ tɔmɑ kɑ womu
domi u win wɛrɔbu tɑbu di.
U dumi kɑ yin mɑɑsɔbu sure nim wɔ̃ku sɔɔ.
2 Yinni Gusunɔwɑ nɛn dɑm,
wiyɑ nɑ siɑrɑmɔ kɑ nɛn womu.
Wiyɑ u mɑn fɑɑbɑ kuɑ.
Wiyɑ nɛn Yinni, kon nùn bɛɛrɛ wɛ̃.
Wiyɑ nɛn bɑɑbɑn Yinni, kon nùn wɔlle suɑ.
3 U sɑ̃ɑwɑ tɑbu kowo kɑ gem.
Win yĩsirɑ Yinni Gusunɔ.
4 U Egibiti sunɔn tɑbu kɛkɛbɑ kɑ win tɑbu kowo dɑmgibu sure
nim wɔ̃ku sɔɔ ge bɑ mɔ̀ Nɑɑ yɑri.
Win tɑbu kowo gisonkobɑ bɑ nim diirɑ.
5 Nim mɛ, mu bu wukiri,
mɑ bɑ numɑ temɔ nge kperu.
6 Yinni Gusunɔ, wunɛn nɔm geu gɑ dɑm yiikogim mɔ.
Geyɑ gɑ wunɛn wɛrɔbu munkɑ muku muku.
7 Wunɛn sinɑndun kpɑ̃ɑru tɑ rɑ wunɛn wɛrɔbu tɑɑre.
Wunɛn mɔru yɑ̀ n seewɑ,
ɑ rɑ de bu dɔ̃ɔ mwɑɑrewɑ nge wĩi.
8 A wɛ̃ru wurɑ mɑ nim mu kpɑɑsinɑ
mu sinum kuɑ berɑ kɑ berɑ nge gbɑ̃rɑru.
9 Wɛrɔ u nɛɛ, u koo bu nɑɑ swĩi kpɑ u bu nɑɑmwɛ.
U koo mɔru kɔsiɑ be sɔɔ nge mɛ u kĩ,
kpɑ u tɑkobi womɑ u bu go kɑ win nɔmɑ,
kpɑ u ben dukiɑ bɔnu ko.
10 Adɑmɑ ɑ wunɛn wom wɛ̃siɑ,
mɑ nim mu bu wukiri.
Bɑ numɑ bɑ kpunɑ nge dɔ̃ɔ kpenu mi nim mu duku.
11 Yinni Gusunɔ, mbɑ n kɑ nun weenɛ
ye tɔmbɑ sɑ̃ɑmɔ kpuro sɔɔ.
Mbɑ n kɑ nun dɛɛrɑru nɛ, wunɛ wi ɑ nɑnum mɔ.
Mbɑ n kɑ nun weenɛ, wunɛ wi bɑ koo siɑrɑ.
Mbɑ n kɑ nun weenɛ, wunɛ wi ɑ rɑ sɔm mɑɑmɑɑkiginu ko.
12 Domi ɑ wunɛn dɑm sɔ̃ɔsi, mɑ tem bu mwɛ.
13 Wunɛn wɔnwɔndu sɔɔrɑ
ɑ wunɛn tɔmbu swɑɑ sɔ̃ɔsi be ɑ yɑkiɑ.
A mɑɑ bu kpɑrɑmɑ kɑ wunɛn dɑm
ɑ kɑ dɔɔ sere wɑ̃ɑ yee te ɑ bu nɔɔ mwɛɛru kuɑ sɔɔ.
14 Tɔn tukobu bɑ ye nuɑ, mɑ bɑ diirumɔ.
Filisitibɑ bɑ bɛrum soorɑ.
15 Edɔmun sinɑmbun toronu kɑrɑ.
Mɑ Mɔɑbun tɑbu durɔbu bɑ diirumɔ.
Kɑnɑnibɑ kpuro, ben wɑsi dwiiyɑ.
16 Bɛrum kɑ nɑndɑbu koo bu deemɑ subɑru sɔɔ.
Wunɛn dɑm sɑɑbu bɑ koo mɑri sɔ̃ɔ sɔ̃ɔ nge kperu.
Sere wunɛn tɔn be ɑ yɑkiɑ yorun di
bu kɑ nim wɔ̃ku tɔburɑ, Yinni Gusunɔ.
17 Kɑɑ kɑ bu dɑ kpɑ ɑ bu tɑ̃sisiɑ
wunɛn tiin guuru wɔllɔ,
mi ɑ wunɛn wɑ̃ɑ yeru sɔɔru kuɑ.
Terɑ tɑ sɑ̃ɑ wunɛn sɑ̃ɑ yeru te ɑ tii kuɑ.
18 Wunɛ Yinni Gusunɔ, kɑɑ n bɑndu diiwɑ kɑ bɑɑdommɑɔ.
19 Sɑnɑm mɛ Egibiti sunɔn dumi kɑ win tɑbu kɛkɛbɑ kɑ mɑɑsɔbu bɑ duɑ nim wɔ̃ku sɔɔ, Yinni Gusunɔ u derɑ nim mu wurɑmɑ mu bu wukiri. Adɑmɑ u derɑ tem mu gberɑ nim wɔ̃ku gen suunu sɔɔ, mɑ Isirelibɑ bɑ tɔburɑ.
20 Yen biruwɑ Aronin sesu Mɑriɑmu wi u sɑ̃ɑ Gusunɔn sɔmɔ, u bɑrɑ kpɑ̃ru suɑ mɑ tɔn kurɔbu kpuro bɑ nùn swĩi bɑ bɑrɑ kpɑ̃nu soomɔ bɑ yɑɑmɔ. 21 Mɑriɑmu u bu womu geni kuɑ u nɛɛ,
i Yinni Gusunɔ tɔmɔ kɑ womu,
domi u nɑsɑrɑ wɑ kɑ win yiiko.
Dumi kɑ yin mɑɑsɔbu u sure nim wɔ̃ku sɔɔ.ISIRELIBAN SANUM GBABURƆ
Nim sosurɑm
22 Yen biru Mɔwisi u Isirelibɑ kpɑrɑ sɑɑ nim wɔ̃ku ge bɑ mɔ̀ Nɑɑ yɑrin di bɑ dɑ gbɑburɔ te bɑ mɔ̀ Suri. Sɔ̃ɔ itɑwɑ bɑ sĩɑ gbɑbu te sɔɔ bɑ ǹ nim wɑ. 23 Mɑ bɑ turɑ Mɑrɑɔ ɑdɑmɑ nim mɛ bɑ wɑ mi, mu sosu, bɑ ǹ kpĩɑ bu nɔ. Yen sɔ̃nɑ bɑ yɑm mi sokɑ Mɑrɑ. Yen tubusiɑnɑ sosurɑ. 24 Mɑ tɔn be, bɑ Mɔwisi wɔkisi bɑ nɛɛ, mbɑ sɑ ko nɔ. 25 Mɔwisi u Yinni Gusunɔ nɔɔgiru sue. Mɑ Yinni Gusunɔ u nùn dɛkɑ gɑɑ sɔ̃ɔsi. Ye u dɛkɑ ye suɑ u kɑre nim mɛ sɔɔ, mɑ mu dorɑ.
Miyɑ Yinni Gusunɔ u win tɔmbu woodɑbɑ wɛ̃ kɑ woronu. Miyɑ u mɑɑ ben lɑɑkɑri mɛɛrɑ. 26 U nɛɛ, ì n nɛ Gusunɔ bɛɛn Yinnin gere nuɑ sɑ̃ɑ sɑ̃ɑ, mɑ i mɔ̀ ye n mɑn wɛ̃re mɑ i nɛn woodɑbɑ mɛm nɔɔwɑ, nɑ ǹ kɑ bɛɛ bɑrɑ ni sɛɛyɑsiɑmɔ ni nɑ Egibitigibu kpɛ̃ɛ. Nɛnɑ Yinni Gusunɔ nɛ wi nɑ rɑ n bɛɛ bɛkiɑmɔ.
27 Yen biru bɑ turɑ Elimuɔ mi nim bwii wɔkurɑ yiru yɑ wɑ̃ɑ kɑ kpɑkpɑ bɛ̃ɛ wɑtɑ kɑ wɔkuru. Mɑ bɑ ben sɑnsɑni girɑ bwii yin bɔkuɔ.