Bɑ nim wɔ̃ku
ge bɑ mɔ̀ Nɑɑ yɑri tɔburɑ
14
1 Yen biru Yinni Gusunɔ u Mɔwisi sɔ̃ɔwɑ u nɛɛ, 2 ɑ Isirelibɑ sɔ̃ɔwɔ bu wuro Pihɑ Hirotun berɑ giɑ bu ben sɑnsɑni girɑ Migidoli kɑ nim wɔ̃kun bɑɑ sɔɔ, Bɑɑli Sefonin deedeeru. Miyɑ i ko ginɑ yɔ̃rɑ nim wɔ̃kun bɔkuɔ, 3 kpɑ Egibiti sunɔ u n tɑmɑɑ bɛɛ Isirelibɑ i kɔ̃ɔrɑwɑ tem mɛ sɔɔ, mi gbɑburu tɑ bɛɛ sikerenɛ, 4 kpɑ n win gɔ̃ru bɔbiɑsiɑ u bɛɛ nɑɑ swĩi. Adɑmɑ kon wi kɑ win tɑbu kowobu dendi n kɑ nɛn yiiko sɔ̃ɔsi kpɑ Egibitigibu bu kɑ giɑ mɑ nɛnɑ Yinni Gusunɔ.
Mɑ Isirelibɑ bɑ kuɑ mɛ.
5 Sɑnɑm mɛ bɑ Egibiti sunɔ sɔ̃ɔwɑ mɑ tɔn be, bɑ yɑkurɑwɑ, yerɑ wi kɑ win bwɑ̃ɑbu bɑ ben himbɑ gɔsiɑ. Bɑ nɛɛ, mbɑn bweserɑ sɑ kuɑ mini. Domi sɑ derɑ Isirelibɑ bɑ bɛsɛn yoru yɑrɑ bɑ doonɑ. 6 Mɑ Egibiti sunɔ u win tɑbu kɛkɛ sɔɔru kuɑ kɑ win tɑbu kowobu sɑnnu. 7 U tɑbu kɛkɛ nɑtɑ (600) suɑ yi yi giɑ sɑ̃ɑ kɑ sere Egibitin tɑbu kɛkɛbɑ kpuro, yen bɑɑyere kɑ yen tɑbu kowo dɑmgii. 8 Sɑɑ yerɑ Yinni Gusunɔ u sunɔ win gɔ̃ru bɔbiɑsiɑ, mɑ u Isirelibɑ nɑɑ girɑ bɑɑ mɛ u yɛ̃ mɑ Yinni Gusunɔwɑ u bu yɑrɑ. 9 Egibitigibun tɑbu kowobu kɑ ben mɑɑsɔbu kɑ dumi, kɑ tɑbu kɛkɛbɑ bɑ bu nɑɑ girɑ mɑ bɑ bu nɑɑmwɛ mi bɑ yɔ̃rɑ nim wɔ̃kun bɔkuɔ bɑ ben sɑnsɑni girɑ Pihɑ Hirotun berɑ giɑ Bɑɑli Sefonin deedeeru.
10 Sɑnɑm mɛ Egibiti sunɔ u turuku kuɑ, Isirelibɑ bɑ nɔni seeyɑ bɑ wɑ wee, Egibitigibɑ kɛkuɑ bɑ wee. Mɑ bɛrum bu mwɑ gem gem, mɑ bɑ Yinni Gusunɔ nɔɔgiru sue. 11 Bɑ Mɔwisi sɔ̃ɔwɑ bɑ nɛɛ, siku yeru sɑriwɑ Egibitiɔ? Yen sɔ̃nɑ ɑ kɑ sun nɑ su gbi gbɑburu mini? A wɑ ye ɑ kɑ sun deemɑ ye ɑ sun yɑrɑmɑ Egibitin di? 12 Sɑ ǹ dɑɑ nun sɔ̃ɔwɑ mɛ Egibitiɔ sɑ nɛɛ, ɑ sun derio su Egibitigibu yoru diiyɑ? Domi sɑ kĩru bo su bu yoru diiyɑ kɑ sere ye sɑ ko gbi gbɑburu mini.
13 Yerɑ Mɔwisi u tɔn be wisɑ u nɛɛ, i ku bɛrum ko, i yɔ̃ro sɛ̃ɛ, kpɑ i wɑ nge mɛ Yinni Gusunɔ u koo bɛɛ fɑɑbɑ ko gisɔ. Domi Egibitigii be i wɑɑmɔ mini, i ǹ mɑɑ bu wɑsi sere kɑ bɑɑdommɑɔ. 14 I yɔ̃ro sɛ̃ɛ, Yinni Gusunɔwɑ u koo bɛɛ sɑnnɑ.
Yinni Gusunɔ u nim wɔ̃ku burɑnɑ
15 Mɑ Yinni Gusunɔ u Mɔwisi bikiɑ u nɛɛ, mbɑn sɔ̃nɑ i mɑn nɔɔgiru mɔ̀. A Isirelibɑ sɔ̃ɔwɔ bu seewo bu dɑ wuswɑɑɔ. 16 Wunɛ mɑɑ, ɑ wunɛn dɛkɑ suo ɑ tĩi nim wɔ̃ku wɔllɔ kpɑ gu bɔnu ko yiru Isirelibɑ bu kɑ du bu tɔburɑ ge sɔɔ, gɑ n tem gbere. 17 Nɛnɑ kon Egibitigibun gɔ̃rusu bɔbiɑsiɑ bu kɑ bu swĩi mi. Kpɑ n ben sunɔ kɑmiɑ kɑ win tɑbu kowobu kɑ win tɑbu kɛkɛbɑ kɑ win mɑɑsɔbu, kpɑ bu nɛn yiiko wɑ. 18 Sɑɑ ye sɔɔrɑ bɑ koo giɑ mɑ nɛnɑ nɑ Yinni Gusunɔ.
19 Sɑnɑm mɛ sɔɔ, Gusunɔn gɔrɑdo wi u Isirelibɑ gbiiye u gɔsirɑ ben biru giɑ mɑ guru wii wuro te, te tɑ rɑɑ bu gbiiye, tɑ mɑɑ wurɑmɑ biruɔ. 20 Mɑ tɑ dɑ Egibitigibu kɑ Isirelibɑn sɑnsɑni yiru yen bɑɑ sɔɔ. Tɑ yɑm tĩri Egibitigibun berɑ giɑ mɑ tɑ yɑm buriri Isirelibɑn mi giɑ. Mɑ Isirelibɑ kɑ Egibitigibu bɑ ǹ susinɛ wɔ̃ku te kpuro.
21 Ye bɑ turɑ nim wɔ̃ku gen mi, yerɑ Mɔwisi u win dɛkɑ tĩi gen wɔllɔ mɑ Yinni Gusunɔ u woo dɑmguu seeyɑ sɔ̃ɔ yɑri yerun di wɔ̃ku giriru sɔɔ, gɑ derɑ nim wɔ̃ku gen nim mu bɔnu kuɑ yiru, mɑ gen suunu sɔɔ mi, n gberɑ. 22 Nim mu kpɑɑsinɛ berɑ kɑ berɑ ben nɔm geuɔ kɑ nɔm dwɑrɔ. Mɑ Isirelibɑ bɑ sĩɑ tem gbebum sɔɔ, bɑ tɔburɑ. 23 Egibitigibu bɑ bu nɑɑ swĩi bɑ duɑ nim wɔ̃ku gen suunu sɔɔ, kɑ ben sunɔn dumi kɑ win tɑbu kɛkɛbɑ kɑ win mɑɑsɔbu. 24 Ye n kuɑ buru buru yellu, mɑ Yinni Gusunɔ u bu mɛɛrimɑ sɑɑ guru wii wuro ten min di, mɑ u bu nɑndɑsiɑ. Be kpuro bɑ yɔ̃sunɑ. 25 U derɑ ben kɛkɛbɑn nɑɑsu wɔɔrɑmɔ, bɑ kpɑnɑ bu sĩ fuuku. Mɑ bɑ nɛɛ, su duki gɔsirɑ Isirelibɑn min di, domi Yinni Gusunɔ u kɑ sun sɑnnɑmɔwɑ ben sɔ̃.
26 Mɑ Yinni Gusunɔ u kpɑm Mɔwisi sɔ̃ɔwɑ u nɛɛ, ɑ wunɛn dɛkɑ tĩiyɔ nim wɔ̃ku mi, kpɑ nim mɛ, mu wurɑmɑ mu Egibitigibu kɑ ben tɑbu kɛkɛbɑ kɑ mɑɑsɔbu wukiri.
27 Mɔwisi u win dɛkɑ ye tĩi nim wɔ̃ku gen mi. Ye n kuɑ yɑm sɑ̃reru, mɑ nim mɛ, mu wurɑmɑ nge mɛ mu rɑɑ sɑ̃ɑ. Egibitigibu bɑ kĩ bu nim mɛ suuri, ɑdɑmɑ Yinni Gusunɔ u bu sure mɛn suunu sɔɔ. 28 Nim mɛ, mu wurɑmɑ mu Egibiti sunɔn tɑbu kɛkɛbɑ kɑ win mɑɑsɔbu kɑ tɑbu kowobu kpuro wukiri be bɑ Isirelibɑ nɑɑmwɛm dɑ nim wɔ̃ku gen suunu sɔɔ. Bɑɑ ben turo, u ǹ yɑrɑ. 29 Adɑmɑ Isirelibɑ bɑ sĩɑ tem gbebum sɔɔ nim wɔ̃ku gen suunuɔ. Domi nim mu kpɑɑsinɛwɑ berɑ kɑ berɑ ben nɔm geuɔ kɑ nɔn dwɑrɔ.
30-31 Ye Isirelibɑ bɑ sɔm dɑmgiru wɑ te Yinni Gusunɔ u Egibitigibu koosi mɑ bɑ ben gonu wɑ nim wɔ̃kun goorɔ, yerɑ bɑ giɑ mɑ Yinni Gusunɔwɑ u bu fɑɑbɑ kuɑ dɔmɑ te, sɑɑ Egibitigibun nɔmɑn di. Mɑ bɑ nùn nɑsiɑ bɑ sosi, bɑ nùn nɑɑnɛ kuɑ kɑ mɑɑ win gɔro Mɔwisi.