Gɔɔ sɑrɑribun tɔ̃ɔ bɑkɑrun
woodɑbɑ
13
1 Yinni Gusunɔ u Mɔwisi sɔ̃ɔwɑ u nɛɛ, 2 ɑ de Isirelibɑ bu ben bii tɔn durɔ gbiikobu kɑ ben yɑɑ sɑbenun bii gbiikii dwɑnu wunɑ nɛnɛm kpɑ ye kpuro yɑ n sɑ̃ɑ nɛgiɑ.
3 Mɔwisi u Isirelibɑ sɔ̃ɔwɑ u nɛɛ, i n dɑ tɔ̃ɔ te yɑɑye tè sɔɔ Gusunɔ u bɛɛ yɑrɑmɑ kɑ win dɑm bɑkɑm sɑɑ Egibitin di, mi i yoru di. Yen sɔ̃, ì n tɔ̃ɔ ten yɑɑ dibu dimɔ, i ku rɑ pɛ̃ɛ ye bɑ seeyɑtiɑ doke di. 4 Suru wì sɔɔ bɑ rɑ gɛ̃ɛbu tore, wi bɑ mɔ̀ Abibu, win tɔ̃ɔ gbiikiru sɔɔrɑ i yɑrɑ. 5 Yinni Gusunɔ u bɛɛn bɑɑbɑbɑ nɔɔ mwɛɛru kuɑ kɑ bɔ̃ri sɑnnu u nɛɛ, u koo bu tem gem wɛ̃ mi tim kɑ bom yibɑ. Tem miyɑ Kɑnɑnibɑ kɑ Hɛtibɑ kɑ Amɔrebɑ kɑ Hefibɑ kɑ Yebusibɑ bɑ wɑ̃ɑ. Ù n kɑ bɛɛ turɑ tem mi, i n dɑ tɔ̃ɔ bɑkɑ teni di i kɑ nùn sɑ̃ suru win tɔ̃ɔ gbiikiru sɔɔ. 6 Sɔ̃ɔ nɔɔbɑ yirun bɑɑ sɔɔrɑ i ko pɛ̃ɛ di ye bɑ ǹ seeyɑtiɑ doke. Yen nɔɔbɑ yirusen tii sɔɔrɑ i ko Yinni Gusunɔ tɔ̃ɔ bɑkɑru diiyɑ. 7 Sɔ̃ɔ nɔɔbɑ yiru ye sɔɔ, i ku mɑɑ de pɛ̃ɛ ye yɑ seeyɑtiɑ mɔ ǹ kun mɛ seeyɑtiɑ gɑɑ yɑ n wɑ̃ɑ bɛɛn suunu sɔɔ tem mɛ kpuro sɔɔ. 8 Dɔmɑ te i tɔ̃ɔ bɑkɑ te mɔ̀, i bɛɛn bibu sɔ̃ɔwɔ i nɛɛ, sɑ yeni mɔ̀wɑ su kɑ yɑɑyɑ ye Yinni Gusunɔ u sun kuɑ sɑnɑm mɛ sɑ yɑrɑ Egibitin di. 9 Yeni yɑ ko n sɑ̃ɑwɑ nge yĩre te bɑ yoruɑ nɔmɑɔ, ǹ kun mɛ sirikɑnɑɔ, kpɑ i n Yinni Gusunɔn woodɑbɑ yɑɑyɑmɔ bɛɛn fɑɑgi sɔɔ. Domi wiyɑ u bɛɛ yɑrɑmɑ kɑ win dɑm bɑkɑm Egibitin di. 10 Yen sɔ̃nɑ n weenɛ i tɔ̃ɔ bɑkɑ ten woodɑ yibiɑ wɔ̃ɔ bɑɑgere, ten sɑɑ yɑ̀ n turɑ.
11 Sɑɑ ye Yinni Gusunɔ u derɑ bɛɛ Isirelibɑ i duɑ Kɑnɑnin temɔ, mɛ u bɛɛ kɑ bɛɛn bɑɑbɑbɑ nɔɔ mwɛɛru kuɑ kɑ bɔ̃ri mɑ u bɛɛ mu wɛ̃, 12 i ko nùn bɛɛn bii tɔn durɔ gbiikobu kɑ bɛɛn yɑɑ sɑbenun bii gbiikii dwɑnu yiiyɑwɑ nɛnɛm n sɑ̃ɑ wigiɑ. 13 Adɑmɑ bɛɛn goo ù n kĩ u win kɛtɛku buu gbiikuu nɛnɛ, u koo gu yɑkiɑwɑ kɑ yɑ̃ɑ buu. Ù kun mɑɑ kue mɛ, u koo gen wĩi sumɑ buɑwɑ u go. I ko mɑɑ bɛɛn bii tɔn durɔ gbiikoo bɑɑwure yɑkiɑwɑ kɑ gobi. 14 Bɑɑ siɑ bɛɛn bibu bɑ̀ n dɑ bɛɛ bikiɑ bɑ nɛɛ, mbɑ yenin tubusiɑnu, kpɑ i bu wisi i nɛɛ, tɔ̃ɔ te Yinni Gusunɔ u sun yɑrɑmɑ kɑ win dɑm bɑkɑm Egibitin di, mi sɑ rɑɑ yoru di, terɑ sɑ yɑɑyɑmɔ mi. 15 Domi sɑɑ ye Egibiti sunɔ u yinɑ mɑm mɑm su yɑri tem min di, yerɑ Yinni Gusunɔ u derɑ tem min bii tɔn durɔ gbiikobɑ gu gu kɑ mɑɑ yɑɑ sɑbenun bii gbiikii dwɑnu. Yen sɔ̃nɑ sɑ rɑ kɑ bɛsɛn yɑɑ sɑbenun bii gbiikii dwɑnu Yinni Gusunɔ yɑ̃kuru kue, kpɑ su bɛsɛn bii tɔn durɔ gbiikobu yɑkiɑ. 16 Yeni yɑ ko n sɑ̃ɑwɑ nge yĩre te bɑ yoruɑ nɔmɑɔ kɑ sirikɑnɑɔ kpɑ tɑ n sun yɑɑyɑsie mɑ dɑm bɑkɑmɑ Yinni Gusunɔ u kɑ sun yɑrɑ sɑɑ Egibitin di.
Yinni Gusunɔ u derɑ
guru wii wurorɑ Isirelibɑ kpɑre
17 Sɑnɑm mɛ Egibiti sunɔ u derɑ Isirelibɑ bɑ doonɑ, Yinni Gusunɔ u ǹ wure bu kpe kɑ swɑɑ ye yɑ dɔɔ Filisitibɑn temɔ, bɑɑ mɛ yɑ turuku bo. Domi u nɛɛ, u ǹ kĩ bu gɔ̃ru gɔsiɑ bu wurɑ Egibitiɔ sɑnɑm mɛ bɑ bu tɑbu wɔri. 18 Yen sɔ̃nɑ u kɑ bu gbɑburun swɑɑ bɛɛri nim wɔ̃kun berɑ giɑ, ge bɑ mɔ̀ Nɑɑ yɑri. Tɔn be, bɑ yɑrɑwɑ Egibitin di kɑ tɑbun sɔɔru. 19 Mɑ Mɔwisi u Yosɛfun goru suɑ bɑ kɑ dɑ, nge mɛ Yosɛfu u rɑɑ Isirelibɑ bɔ̃rusiɑ bu ko. U nɛɛ, bu de bu kɑ win goru yɑri sɑnɑm mɛ Yinni Gusunɔ u koo bu yɑkiɑ.
20 Isirelibɑ bɑ doonɑ Sukɔtun di bɑ dɑ bɑ ben sɑnsɑni kuɑ Etɑmuɔ gbɑbu dirirun nɔɔwɔ. 21 Yinni Gusunɔ u bu swɑɑ gbiiye guru wii wuroru sɔɔ sɔ̃ɔ sɔɔ kɑ wɔ̃kuru. Wɔ̃kuru kpɑ tɑ n sɑ̃ɑ nge dɔ̃ɔ yɑri bɑkɑru tɑ n kɑ bu yɑm bururɑsie. 22 Sɔ̃ɔ sɔɔ kɑ wɔ̃kuru guru wii wuro te, tɑ ku rɑ biɑre tɔn ben wuswɑɑɔ.