Gɔɔ sɑrɑribun tɔ̃ɔ bɑkɑru
12
1 Mɔwisi kɑ Aroni bu sere yɑri Egibitin di Yinni Gusunɔ u bu sɔ̃ɔwɑ u nɛɛ, 2 suru winiwɑ u koo ko bɛɛn suru gbiikoo wɔ̃ɔ sɔɔ. 3 I Isirelibɑ kpuro sɔ̃ɔwɔ i nɛɛ, suru winin sɔ̃ɔ wɔkuru, ben yɛnu yɛ̃ro bɑɑwure u yɑ̃ɑ kinɛ kpɛndu gɔsi win yɛnun sɔ̃. 4 Yɛnu yɛ̃ro wìn tɔmbɑ kun dɑbiru turɑ bu kɑ yɑ̃ɑ giriru tem, wi kɑ win beruse bu yɑ̃ɑru gɔsio te begibɑ koo kpĩ bu tem bu kpe. 5 I ko kpĩ i yɑ̃ɑru ǹ kun mɛ boo gɔsi, ɑdɑmɑ i de yɑ n sɑ̃ɑ kinɛru te tɑ wɔ̃ɔ tiɑ mɔ, kpɑ tɑ kun ɑlebu mɔ. 6 I ko nu berewɑ sere suru win sɔ̃ɔ wɔkurɑ nnɛ, kpɑ bɛɛ Isirelibɑ kpuro i nu go dɔmɑ ten yokɑ kpɑɑ. 7 I ko nin yɛm suɑ i tɛɛniwɑ dinu mi i ko nin yɑɑ tem kɔnnɔsun beri berikɑ kɑ sin wɔllɔ. 8 Wɔ̃ku terɑ bɑ koo yɑɑ ye wɔ̃ kpɑ bu ye di kɑ pɛ̃ɛ ye bɑ ǹ seeyɑtiɑ doke kɑ kpee wuru si su sosu sɑnnu. 9 I ku yen gɔmɑ tem, ǹ kun mɛ ye bɑ yikuɑ. I ye wɔ̃ɔwɔ girum girum kɑ yen wiru kɑ tɑɑnu kɑ bɔsɔ yɑ̃nu. 10 Yɑ̀ n mɑɑ tiɑrɑ i ko ye wisiwɑ dɔ̃ɔ sɔɔ. I ku de yen gɑɑ yu yɑm sɑ̃rɑ. 11 Wee mɛ i ko i n sɑ̃ɑ i kɑ ye di. I n sɔɔru sɑ̃ɑ i kɑ swɑɑ wɔri, i n gbɑburun yɑ̃nu doke, i n bokunu nɛni, kpɑ i di kɑ wɑsi kɑsɑnu, domi yɑ sɑ̃ɑwɑ tɔ̃ɔ bɑkɑru te i ko mɑn diiyɑ Gɔɔ sɑrɑribun sɔ̃.
12 Wɔ̃ku terɑ kon Egibitin tem bukiɑnɑ kpɑ n bii tɔn durɔ gbiikoo bɑɑwure go, tɔmbun bibu kɑ yɑɑ sɑbenun binu. Mɛyɑ kon kɑ sɔ̃ɔsi mɑ Egibitigibun bũnu nu ǹ dɑm mɔ. Nɛ, Yinni Gusunɔwɑ kon ye ko. 13 Yɛm mɛyɑ mu koo ko yĩreru te tɑ yɛnusu sɔ̃ɔsimɔ mi i wɑ̃ɑ. Nɑ̀ n yɛm mɛ wɑ, kon bɛɛ sɑrɑriwɑ. Kɛ̃si te, tɑ ǹ bɛɛ bɑbɑmɔ te kon kɑ Egibitigibu wɑhɑlɑ ko.
14 I ko i n dɑ tɔ̃ɔ te yɑɑyewɑ wɔ̃ɔ kɑ wɔ̃ɔ, kpɑ i mɑn tɔ̃ɔ bɑkɑru diiyɑ. Bɛɛn bibun bweseru bɑ ko n dɑ mɑɑ tu yɑɑyewɑ sere kɑ bɑɑdommɑɔ.
Pɛ̃ɛ ye bɑ ǹ seeyɑtiɑ doken
tɔ̃ɔ bɑkɑru
15 Yinni Gusunɔ u mɑɑ nɛɛ, i ko kowɑ sɔ̃ɔ nɔɔbɑ yiru i ku pɛ̃ɛ di ye bɑ seeyɑ. Tɔ̃ɔ gbiikiru i ko pɛ̃ɛ seeyɑtiɑ yɑrɑ bɛɛn yɛnusun di. Domi bɛɛn goo ù n gɑ̃ɑnu di ni nu seeyɑtiɑ mɔ sɔ̃ɔ nɔɔbɑ yiru ye, yu sere yibu, bɑ koo yɛ̃ro gowɑ. 16 Tɔ̃ɔ gbiikiru kɑ tɔ̃ru nɔɔbɑ yiruse, i ko mɛnnɑwɑ i mɑn sɑ̃. I ku rɑ sɔmburu gɑru ko tɔ̃nu yiru ye sɔɔ, mɑ n kun mɔ bɛɛn dĩɑ ni i ko din kobu.
17 I ko n dɑ pɛ̃ɛ ye bɑ ǹ seeyɑtiɑ doken tɔ̃ɔ bɑkɑru di, domi tɔ̃ɔ te sɔɔrɑ nɑ bɛɛn bweseru kpuro yɑrɑ Egibitin tem di. Yen sɔ̃, bɛɛn bibun bweseru bɑ ko n dɑ tɔ̃ɔ bɑkɑru diwɑ tɔ̃ɔ te sɔɔ, sere kɑ bɑɑdommɑɔ. 18 Suru gbiikoon sɔ̃ɔ wɔkurɑ nnɛsen yokɑn di, pɛ̃ɛ ye bɑ ǹ seeyɑtiɑ dokewɑ i ko i n dimɔ sere kɑ win sɔ̃ɔ yɛndɑ tiɑsen yokɑɔ. 19 Sɔ̃ɔ nɔɔbɑ yiru yen bɑɑ sɔɔ, bu ku rɑɑ pɛ̃ɛ seeyɑtiɑ wɑ bɛɛn yɛnusɔ. Domi wi u gɑ̃ɑnu di ni bɑ seeyɑtiɑ doke, bɑ koo yɛ̃ro gowɑ, bɑɑ ù n sɔɔn nɑ. 20 Ǹ n mɛn nɑ, bɛɛn yɛnusu kpuro sɔɔ, i ku rɑ gɑ̃ɑnu di ni bɑ seeyɑtiɑ doke.
Gɔɔ sɑrɑribun torubu
21 Yen biru Mɔwisi u Isirelibɑn guro gurobu sokusiɑ u nɛɛ, i yɑ̃ɑ kinɛ kpɛnnu gɔsio nge mɛ bɛɛn yɛnusu nɛ, kpɑ i nu go gɔɔ u kɑ bɛɛ sɑrɑri. 22 Kpɑ bɛɛn bɑɑwure u dɑ̃ɑ kiku ge bɑ mɔ̀ isɔpu suɑ u wɑsi yɑ̃ɑ yɛm sɔɔ mɛ mu ko n wɑ̃ɑ gbɛ̃ɛrɔ, kpɑ u tɛɛni win dii kɔnnɔn beri berikɑɔ kɑ gen wɔllɔ. Bɛɛn goo u ku rɑɑ yɑri dirun di mɑ n kun mɔ yɑm sɑ̃rɑ mɑm mɑm. 23 Sɑnɑm mɛ Yinni Gusunɔ u koo tem mɛ bukiɑnɑ u kɑ Egibitigibu go, u koo yɛm mɛ wɑ bɛɛn dii kɔnnɔsun beri berikɑɔ kɑ sin wɔllɔ, kpɑ u bɛɛn diɑ sɑrɑri. U ǹ wurɑmɔ gɔɔn gɔrɑdo u du u bɛɛ go. 24 Bɛɛ kɑ bɛɛn bibun bweseru, mɛyɑ i ko i n dɑ tɔ̃ɔ bɑkɑ te di sere kɑ bɑɑdommɑɔ. 25 Sɑnɑm mɛ i tem mɛ duɑ, mɛ Yinni Gusunɔ u koo bɛɛ wɛ̃ nge mɛ u nɔɔ mwɛɛru kuɑ, i de tɔ̃ɔ bɑkɑ te, tu ko bɛɛn wororu. 26 Bɛɛn bibu bɑ̀ n bɛɛ woro ten tubusiɑnu bikiɑ, 27 i ko bu wisi i nɛɛ, Gɔɔ sɑrɑribun yɑ̃kurɑ te sɑ kɑ Yinni Gusunɔ sɑ̃ɑmɔ, domi u bɛsɛ Isirelibɑn diɑ sɑrɑri, u ǹ sun go sɑnɑm mɛ u Egibitigibu goomɔ.
Yen biru Isirelibɑ bɑ yiirɑ bɑ Gusunɔ sɑ̃wɑ. 28 Mɑ bɑ dɑ bɑ kuɑ dee dee ye Yinni Gusunɔ u Mɔwisi kɑ Aroni sɔ̃ɔwɑ.
Bii gbiikobun gɔɔ
29 Ye n kuɑ wɔ̃kurun bɔnu, Yinni Gusunɔ u bii gbiikobu kpuro go Egibitin temɔ, sɑɑ Egibiti sunɔn tiin bii gbiikoon di wi u koo win sinɑ gɔnɑ tubi di, sere kɑ be bɑ wɑ̃ɑ pirisɔm sɔɔn bii gbiikobu, n kɑ dɑ yɑɑ sɑbenun bii gbiikinɔ. 30 Egibiti sunɔ kɑ win bwɑ̃ɑbu kɑ tɔn be bɑ tie Egibiti ye sɔɔ kpuro, bɑ seewɑ wɔ̃kuru bɑ wuri bɛkɛ kuɑ domi yɛnu gɑgu sɑri gèn mi tɔn tiɑ tiɑ kun gu. 31 Wɔ̃ku tee te sɔɔ, Egibiti sunɔ u Mɔwisi kɑ Aroni sokɑ, u nɛɛ, i seewo i doonɑ nɛn tɔmbun min di, bɛɛ kɑ bɛɛn tɔmbu Isirelibɑ. I doo i Yinni Gusunɔ sɑ̃ nge mɛ i geruɑ. 32 I kɑ bɛɛn yɑ̃ɑnu kɑ bɛɛn kɛtɛbɑ doo nge mɛ i geruɑ, kpɑ i mɑɑ mɑn domɑru kɑnɑ bɛɛn Yinnin mi.
33 Mɑ Egibitigibɑ Isirelibɑ bɑɑsi bu kɑ yɑri ben tem di fuuku, bɑ nɛɛ, domi sɑ ko gbi su kpe. 34 Mɑ Isireli be, bɑ ben pɛ̃ɛ kpii te tɑ ǹ seeyɑtiɑ mɔ suɑ gbɛ̃ɑ sɔɔ bɑ tu bekɑ wukiri bɑ sɔɔwɑ.
35 N deemɑ Isirelibɑ bɑ rɑɑ kuɑ nge mɛ Mɔwisi u geruɑ, bɑ Egibitigibu burɑ yɑ̃ɑ ni bɑ kuɑ kɑ wurɑ kɑ sii geesu kɑnɑ, kɑ mɑɑ bekɑ. 36 Yinni Gusunɔ u mɑɑ derɑ tɔn be, bɑ kĩi geeru wɑ Egibitigii ben mi. Mɑ bɑ bu wɛ̃ ye bɑ bikiɑ kpuro. Nge mɛyɑ bɑ kɑ Egibitigibun yɑ̃nu wɑ bɑ gurɑ.
Isirelibɑ bɑ yɑrɑ Egibitin di
37 Isirelibɑ bɑ swɑɑ wɔri kɑ nɑɑsu sɑɑ Rɑmusɛsin di bɑ dɔɔ Sukɔtuɔ. Ben geerɑ sɑ̃ɑ nɔrɔbun subɑ nɑtɑn sɑkɑ (600.000), tɔn kurɔbu kɑ bibu kɑ durɔ tɔkɔnu bɑɑsi. 38 Mɑ bɑ kɑ ben yɑɑ sɑbenu dɑ dɑbi dɑbinu, kɛtɛbɑ kɑ yɑ̃ɑnu kɑ bonu. Tɔn tuko dɑbirɑ mɑɑ bu swĩi. 39 Bɑ pɛ̃ɛ kuɑ kɑ pɛ̃ɛ kpii te bɑ ǹ seeyɑtiɑ doke, domi bɑ bu girɑwɑ Egibitin di bɑ yɑrɑ kɑ sɛndɑru. Bɑ ǹ mɑɑ fɛɛ wɑ bu dĩɑ kusenu suɑ.
40-41 Gusunɔn tɔmbu Isirelibɑ bɑ kuɑwɑ Egibitiɔ wɔ̃ɔ nɛɛru kɑ tɛnɑ (430). Dɔmɑ te wɔ̃ɔ nɛɛru kɑ tɛnɑ ye, yɑ yibɑ, yerɑ be kpuro bɑ yɑrɑ Egibitin di. 42 Wɔ̃ku te sɔɔ, Yinni Gusunɔ u Isirelibɑ kɔ̃su bɑ kɑ yɑrɑ Egibitin di. Yen sɔ̃nɑ wɔ̃ɔ kɑ wɔ̃ɔ Isirelibɑ bɑ ko n dɑ dom se wɔ̃ku te. Kpɑ bu Yinni Gusunɔ tɔ̃ɔ bɑkɑru diiyɑ, be kɑ ben bibun bweseru sere kɑ bɑɑdommɑɔ.
Gɔɔ sɑrɑribun tɔ̃ɔ bɑkɑrun
yɑɑ dibun woodɑ
43 Yinni Gusunɔ u Mɔwisi kɑ Aroni sɔ̃ɔwɑ u nɛɛ, woodɑ ye nɑ bɛɛ wɛ̃ɛmɔ Gɔɔ sɑrɑribun tɔ̃ɔ bɑkɑrun sɔ̃ wee.Sɔɔ goo u ku rɑɑ ten yɑɑ dibu di. 44 Adɑmɑ yoo tɔn tuko be i dwɑ kɑ gobi, mɑ i bu bɑngo kuɑ, bɑ koo kpĩ bu di. 45 Sɔɔ wi u sɑrɔ, ǹ kun mɛ tɔn tuko goo wi u sɔmburu mɔ̀ bɛɛn mi, u kɑ gobi wɑ, be yiru yen goo kun yɑɑ dii bi dimɔ. 46 Dirɔwɑ i ko tɔ̃ɔ bɑkɑ ten yɑɑ dibu di. I ku rɑ kɑ yen yɑɑ yɑri tɔɔwɔ.Bɑɑ yen yɑɑ kuku teeru i ku rɑ kɔrɑ. 47 Isirelibɑ kpurowɑ bɑ koo tɔ̃ɔ bɑkɑ te di. 48 Sɔɔ goo ù n tem yɑrimɑ u wɑ̃ɑ bɛɛn mi, ù n kĩ u tɔ̃ɔ bɑkɑ ten yɑɑ dibu di, i nùn bɑngo koowo kɑ win yɛnun tɔn durɔbu kpuro i sere yɑɑ dii bi di kɑ wi sɑnnu. Domi u ǹ ko n mɑɑ sɑ̃ɑ nge sɔɔ.Adɑmɑ bɑngo sɑrirugii goo kun bu dimɔ.
49 Woodɑ tiɑ ye, yɑ kɑ bɛɛ kpuro yɑ̃, bɛɛ Isirelibɑ kɑ sere sɔɔ be bɑ wɑ̃ɑ bɛɛn mi.