Mɔwisi u wɑhɑlɑ wɔkurusen
gɑri mɔ̀
11
1 N deemɑ Yinni Gusunɔ u rɑɑ Mɔwisi sɔ̃ɔwɑ u nɛɛ, n tie wɑhɑlɑ tiɑ ye kon Egibitigibu kɑ ben sunɔ doke. Yerɑ yɑ koo de u bɛɛ yɔ̃su. U koo mɑm bɛɛ girɑwɑ minin di kɑ dɑm. 2 A tɔn durɔ kɑ tɔn kurɔ bɑɑwure sɔ̃ɔwɔ u burɑ yɑ̃ɑ wurɑginu kɑ sii geesuginu kɑnɑ win beruse Egibitigiin mi.
3 N deemɑ Yinni Gusunɔ u derɑ Egibitigibu bɑ kɑ Isirelibɑ nɔnu geu mɛɛrɑ. Mɔwisi u mɑɑ sɑ̃ɑ tɔn boko sunɔn bwɑ̃ɑbu kɑ Egibitigii be bɑ tien nɔni sɔɔ.
4 Mɔwisi u sere doonɑ Egibiti sunɔn min di, u nùn sɔ̃ɔwɑ u nɛɛ, ɑmɛniwɑ Yinni Gusunɔ u geruɑ. Wɔ̃kurun bɔnun sɑkɑwɑ u koo Egibitin tem bukiɑnɑ. 5 Bii yerumɑbɑ kpuro bɑ koo gbi, sɑɑ wunɛn bii yerumɑn di, wi u koo wunɛn sinɑ gɔnɑ tubi di sere kɑ yoo tɔn kurɔn bii tɔn durɔ gbiikoowɔ. Yɑɑ sɑbenun bii gbiikii dwɑnu nu koo mɑɑ gbi. 6 Wuri bɛkɛ yi ko n wɑ̃ɑ Egibitin tem kpuro sɔɔ dɔmɑ te, yìn bweseru yi ǹ koore. Mɛyɑ yi ǹ koo mɑɑ wure yi ko. 7 Adɑmɑ bɛsɛ Isirelibɑn mi, bɑɑ bɔ̃ɔ gɑ ǹ sun worimɔ sere kɑ bɛsɛn yɑɑ sɑbenɔ, kpɑ i n kɑ yɛ̃ mɑ Yinni Gusunɔ u sun wunɑnɛ kɑ bɛɛ Egibitigibu. 8 Mɑ Mɔwisi u kpɑm nɛɛ, wunɛn bwɑ̃ɑbu kpuro bɑ koo nɑ bu kpunɑ nɛn wuswɑɑɔ bu mɑn sɔ̃ bu nɛɛ, n yɑrio kɑ nɛn tɔmbu kpuro be bɑ mɑn swĩi. Yen biru nɑ kon den yɑri n doonɑ.
Ye u gɑri yi geruɑ u kpɑ, mɑ u yɑrɑ Egibiti sunɔn min di kɑ mɔru bɑkɑ.
9 Yinni Gusunɔ u rɑɑ nùn sɔ̃ɔwɑ u nɛɛ, Egibiti sunɔ kun wunɛn gɑri swɑɑ dɑkimɔ. Yerɑ yɑ koo de n mɑɑ sɔm mɑɑmɑɑkiginu gɑnu ko Egibitin temɔ.
10 Mɔwisi kɑ Aroni bɑ sɔm mɑɑmɑɑkigii ni kpuro kuɑ Egibiti sunɔn wuswɑɑɔ ɑdɑmɑ Yinni Gusunɔ derɑ win gɔ̃ru gɑ bɔbiɑ mɑ u ǹ wure Isirelibɑ bu doonɑ win tem di.