Mɑnnɑ kɑ kusunu
16
1 Mɑ Isirelibɑn wuu te kpuro tɑ seewɑ Elimun di tɑ dɑ gbɑburɔ te bɑ mɔ̀ Sini te tɑ wɑ̃ɑ Elimu kɑ Sinɑin bɑɑ sɔɔ. Sɑɑ dɔmɑ tèn di bɑ doonɑ Egibitin di, bɑ kuɑwɑ suru tiɑ kɑ sɔ̃ɔ wɔkurɑ nɔɔbu bɑ sere turɑ mi. 2 Mɑ be kpuro bɑ Mɔwisi kɑ Aroni wɔkisim wɔri gbɑburu mi. 3 Bɑ nɛɛ, n dɑɑ sɑnɔ bo Yinni Gusunɔ u sun go Egibitiɔ mi sɑ rɑ rɑɑ sinɛ su dĩɑnu di ni sɑ kĩ kɑ yɑɑ. Adɑmɑ wee, i kɑ sun nɑ gbɑbu teni sɔɔ gɔ̃ɔru tu kɑ sun go bɛsɛ kpuro.
4 Yen biru Yinni Gusunɔ u Mɔwisi sɔ̃ɔwɑ u nɛɛ, tɛ̃ kon de dĩɑnu nu nɛɛrɑ wɔllun di nge gurɑ bɛɛ kpuron sɔ̃, kpɑ tɔmbu bɑ n dɑ yɑri bu gure bɑɑdommɑ mɛ̀n bukɑtɑ bɑ mɔ tɔ̃ɔ te. Nge mɛyɑ kon kɑ ben lɑɑkɑri mɛɛri n wɑ bɑ̀ n koo nɛn woodɑbɑ mɛm nɔɔwɑ. 5 Sɔ̃ɔ nɔɔbɑ tiɑse, mɛ bɑ rɑ guren nɔn yiruwɑ bɑ koo gurɑ kpɑ bu yen sɔmburu ko.
6 Mɑ Mɔwisi kɑ Aroni bɑ Isirelibɑ kpuro sɔ̃ɔwɑ bɑ nɛɛ, yokɑ ye, i ko giɑ mɑ Yinni Gusunɔwɑ u bɛɛ yɑrɑmɑ Egibitin di. 7-8 Domi u koo bɛɛ yɑɑ wɛ̃ i tem yèn sɔ̃ u nuɑ i nùn wɔkisimɔ. I n yɛ̃ mɑ wiyɑ i wɔkisimɔ, n ǹ mɔ bɛsɛ. Siɑ bururu u koo mɑɑ bɛɛ dĩɑnu wɛ̃ i di i debu, kpɑ i win yiiko wɑ.
9 Mɑ Mɔwisi u Aroni sɔ̃ɔwɑ u nɛɛ, ɑ Isirelibɑn wuuru kpuro sɔ̃ɔwɔ ɑ nɛɛ, bu susimɑ Yinni Gusunɔ mi, yèn sɔ̃ u ben wɔkinu nuɑ.
10 Sɑɑ ye Aroni u kɑ Isirelibɑn wuu te gɑri mɔ̀, bɑ sĩirɑ gbɑburu giɑ bɑ wɑ wee, Yinni Gusunɔn yiikon girimɑ sɔ̃ɔsirɑ guru wii wuro te sɔɔ. 11 Mɑ Yinni Gusunɔ u Mɔwisi sɔ̃ɔwɑ u nɛɛ, 12 nɑ Isirelibɑn weeweenu nuɑ. A bu sɔ̃ɔwɔ mɑ yoki yɑm bere berebu bɑ koo yɑɑ tem kpɑ siɑ bururu bu dĩɑnu di bu debu kpɑ bu giɑ mɑ nɛnɑ nɑ Gusunɔ ben Yinni.
13 Ye n kuɑ yokɑ yerɑ kusu wuu bɑkɑrɑ nɑ tɑ tɛriɑ sɑnsɑni ye kpuro sɔɔ. Sisiru bururu mɑ tem kpuro mu kɑkoru sɑ̃ɑ. 14 Sɑɑ ye kɑko te, tɑ gberɑ gɑ̃ɑ piiminu tɛrie temɔ nge dĩɑ bimi. N sɑ̃ɑ nge guru kpenu nu tem wukiri. 15 Ye Isirelibɑ bɑ ye wɑ, bɑ sɔ̃ɔnɑ bɑ nɛɛ, mbɑ yeni. Domi bɑ ǹ ye yɛ̃.
Mɔwisi u bu sɔ̃ɔwɑ u nɛɛ, yeniwɑ dĩɑ ni Yinni Gusunɔ u bɛɛ wɛ̃ɛmɑ i di. 16 U nɛɛ, yɛnu yɛ̃ro bɑɑwure u koo gurɑwɑ mɛ̀n nɔɔ win yɛnugibu bɑ koo di sɔ̃ɔ teeru nge mɛ ben geerɑ nɛ.
17 Mɑ Isirelibɑ bɑ kuɑ mɛ. Gɑbɑ gurɑ n kpɑ̃ n kere gɑbu. 18 Yen biru bɑ ye yĩirɑ. Mɑ bɑ deemɑ wi u gurɑ n kpɑ̃ u ǹ sɑkɑ sɑre. Wi u mɑɑ gurɑ fiiko u ǹ sɑkɑ kɔmiɛ. Bɑɑwure u wɑ dee dee nge mɛ̀n nɔɔ u koo di.
Mɑnnɑn woodɑ
19 Mɔwisi u bu sɔ̃ɔwɑ u nɛɛ, bɛɛn goo u ku de yu tiɑrɑ sere sisiru bururu.
20 Adɑmɑ bɑ ǹ Mɔwisigiɑ nuɑ. Ben gɑbɑ derɑ yɑ tiɑrɑ sere sisiru bururu mɑ yɑ kɔ̃sɑ yɑ kɔkɔnu kuɑ. Yerɑ Mɔwisi u kɑ bu mɔru bɑrɑ. 21 Bururu bɑɑtere bɑ rɑ gurewɑ mɛ̀n nɔɔ bɑ koo di, ɑdɑmɑ sɔ̃ɔ ù n ye, yɑ rɑ yɑndewɑ.
22 Alusumɑn sɔ̃ɔ nɔɔbɑ tiɑse, ben sɔ̃ɔ yirun dim sɑkɑwɑ bɑ gurɑ. Ben guro gurobu kpuro bɑ nɑ bɑ Mɔwisi sɔ̃ɔwɑ bɑ nɛɛ, bɑ kuɑ mɛ. 23 Mɑ u bu sɔ̃ɔwɑ u nɛɛ, Yinni Gusunɔ u geruɑ u nɛɛ, siɑ tɔ̃ɔ wɛ̃rɑrugirɑ te sɑ rɑ nùn derie, i sɔnwɔ ye i kĩ i sɔmɛ, kpɑ i yike ye i kĩ i yike. Kpɑ i sukum yi sere siɑ bururu.
24 Bɑ ye yi sere sisiru bururu nge mɛ Mɔwisi u geruɑ. Yɑ ǹ mɑɑ kɔ̃sɑ, yu sere kɔkɔnu ko. 25 Mɔwisi u nɛɛ, i ye dio domi tɔ̃ɔ wɛ̃rɑrugirɑ te i ko Yinni Gusunɔ deriɑ. Gisɔ i ǹ ye wɑsi temɔ. 26 Sɔ̃ɔ nɔɔbɑ tiɑ i ko n dɑ ye gure. Adɑmɑ sɔ̃ɔ nɔɔbɑ yiruse, tɔ̃ɔ wɛ̃rɑrugirɑ. Te sɔɔrɑ i ǹ ko ye wɑ i gurɑ.
27 Kɑ mɛ, sɔ̃ɔ nɔɔbɑ yiruse te, tɔn ben gɑbɑ yɑrɑ bu wɑ bu kɑ gurɑ ɑdɑmɑ bɑ ǹ gɑ̃ɑnu wɑ. 28 Yerɑ Yinni Gusunɔ u Mɔwisi sɔ̃ɔwɑ u nɛɛ, sere dommɑ i ko i n nɛn gere kɑ nɛn woodɑbɑ yinɑmɔ. 29 I yɑɑyo mɑ nɛ, Yinni Gusunɔ nɑ bɛɛ tɔ̃ɔ wɛ̃rɑrugiru wɛ̃. Yen sɔ̃nɑ nɑ rɑ bɛɛ sɔ̃ɔ yirun dĩɑnu wɛ̃ sɔ̃ɔ nɔɔbɑ tiɑse. I de bɛɛn bɑɑwure u sinɑ u ku yɑri win wɑ̃ɑ yerun di u sɔmburu ko sɔ̃ɔ nɔɔbɑ yiruse te sɔɔ.
30 Mɑ tɔn be, bɑ wɛ̃rɑ tɔ̃ɔ te sɔɔ.
31 Isirelibɑ bɑ dĩɑ ni sokɑ kɑ ben bɑrum mɑnnɑ. Yen tubusiɑnɑ, mbɑ yeni. Yɑ sɑ̃ɑwɑ nge dĩɑ bimɑ kpikɑ piibu. À n dendɑ, yɑ dowɑ nge kirɑ te bɑ kuɑ kɑ tim.
32 Sɔ̃ɔ teeru Mɔwisi u nɛɛ, woodɑ wee ye Yinni Gusunɔ u bɛɛ wɛ̃ɛmɔ. I mɑnnɑ beruo, sɔ̃ɔ teerun dim sɑkɑ bɛɛn bibun bweserun sɔ̃ bu kɑ wɑ dĩɑ ni u bɛɛ wɛ̃ i di gbɑburɔ sɑnɑm mɛ u bɛɛ yɑrɑmɑ Egibitin di.
33 Mɔwisi u mɑɑ Aroni sɔ̃ɔwɑ u nɛɛ, ɑ wekeru gɑru tɑmɑ ɑ mɑnnɑ doke sɔ̃ɔ teerun dim sɑkɑ, kpɑ ɑ tu yi Yinni Gusunɔn sɑ̃ɑ yerɔ, kpɑ yɑ n beruɑ bɛɛn bibun bweserun sɔ̃.
34 Mɑ Aroni u ye suɑ u yi woodɑn kpɑkororun wuswɑɑɔ kpɑ yɑ n beruɑ nge mɛ Yinni Gusunɔ u Mɔwisi woodɑ wɛ̃ u ko.
35 Isirelibɑ bɑ mɑnnɑ ye diwɑ wɔ̃ɔ weeru, sere bɑ kɑ turɑ Kɑnɑnin tem nɔɔ burɑ yerɔ, tem mɛ̀ sɔɔ bɑ koo du bɑ n wɑ̃ɑ.
36 Mɑnnɑn sɔ̃ɔ teerun dim sɑkɑwɑ bɑ rɑ soku omɛri. Omɛri ye, yɑ sɑ̃ɑwɑ ditiri nnɛn sɑkɑ. Omɛri wɔkurun sɑkɑwɑ bɑ rɑ soku efɑ.