8
1 Mɑ Yinni Gusunɔ u Mɔwisi sɔ̃ɔwɑ u nɛɛ, ɑ Aroni sɔ̃ u doo u win nɔmu dɛmiɑ u dɛkɑ ye tĩi dɑɑnu kɑ yɛrusun wɔllɔ kpɑ surenu nu gɑsirimɑ nu nɑ nu n wɑ̃ɑ Egibitin tem sɔɔ.
2 Yerɑ Aroni u win nɔmɑ dɛmiɑ Egibitin dɑɑnu giɑ, mɑ surenu nu gɑsirimɑ nu Egibitin tem wukiri. 3 Adɑmɑ Egibiti sunɔn sɔro be, bɑ mɑɑ kuɑ mɛ, kɑ ben dobo dobo. Bɑ derɑ surenu nu gɑsirimɑ Egibitin temɔ. 4 Mɑ Egibiti sunɔ u Mɔwisi kɑ Aroni sokɑ u nɛɛ, i Yinni Gusunɔ kɑnɔ u sure ni doonɑsiɑ nɛ kɑ nɛn tɔmbun min di, kpɑ n de tɔn be, bu doonɑ bu nùn yɑ̃kuru kuɑ.
5 Sɑnɑm mɛyɑ Mɔwisi u Egibiti sunɔ sɔ̃ɔwɑ u nɛɛ, nɑ wunɛn gere mɑrɑ, ɑ mɑn sɔ̃ sɑɑ yerɑ̀ dim dim kon Yinni Gusunɔ kɑnɑ wunɛ kɑ wunɛn tɔmbu kɑ wunɛn bwɑ̃ɑbun sɔ̃, u kɑ de sure ni, nu tondɑ bɛɛ kɑ bɛɛn yɛnusun di, kpɑ nu kun mɑɑ tie mɑ n kun mɔ dɑɑ bɑkɑru sɔɔ.
6 U wisɑ u nɛɛ, siɑ.
Mɑ Mɔwisi u nɛɛ, n koo koorɑ mɛ, kpɑ ɑ giɑ mɑ goo sɑri wi u sɑ̃ɑ nge Gusunɔ bɛsɛn Yinni. 7 Sure ni, nu koo kɑ nun tondɑ nu gɛɛrɑ wunɛn bwɑ̃ɑbu kɑ wunɛn tɔmbu kɑ bɛɛn yɛnusun di. Dɑɑ bɑkɑru tɔnɑ sɔɔrɑ nu ko nu n tie.
8 Yen biru Mɔwisi kɑ Aroni bɑ yɑrɑ Egibiti sunɔn min di. Mɑ Mɔwisi u Yinni Gusunɔ nɔɔgiru sue u sure ni girɑ ni u Egibiti sunɔ wisi mi. 9 Mɑ Yinni Gusunɔ u kuɑ nge mɛ Mɔwisi u bikiɑ. Yerɑ sure ni, nu gbisukɑ diɑɔ kɑ yɛnu yɑɑriɔ kɑ gbeɑɔ. 10 Bɑ nu gurɑ bɑ mɛnnɑ mɛnnɑ. Mɑ nin nuburɑ yibɑ tem mɛ sɔɔ.
11 Ye Egibiti sunɔ u wɑ mɑ wɑhɑlɑ yɑ dwiiyɑ yerɑ u kpɑm win gɔ̃ru bɔbiɑsiɑ. U ǹ mɑɑ Mɔwisi kɑ Aroni swɑɑ dɑki, nge mɛ Yinni Gusunɔ u rɑɑ geruɑ.
Wɑhɑlɑ itɑse, gɑɑnikunu
12 Yen biru Yinni Gusunɔ u Mɔwisi sɔ̃ɔwɑ u nɛɛ, u Aroni sɔ̃ɔwɔ u win dɛkɑ suo u tem so, kpɑ tuɑ yu gɔsiɑ gɑɑnikunu Egibitin tem kpuro sɔɔ.
13 Mɑ bɑ kuɑ nge mɛ. Tuɑ kpuro yɑ gɔsiɑ gɑɑnikunu tem mɛ kpuro sɔɔ. Gɑɑnikuu ni, nu duɑ tɔmbu kɑ yɑɑ sɑbenu sɔɔ. 14 Mɑ sɔrobu bɑ dobo dobo kuɑ bu kɑ mɑɑ gɑɑnikunu ko. Adɑmɑ bɑ kpɑnɑ. Gɑɑnikuu ni, nu wɑ̃ɑwɑ bɑɑmɑ. 15 Yerɑ sɔro be, bɑ Egibiti sunɔ sɔ̃ɔwɑ bɑ nɛɛ, Gusunɔn tiin dɑmɑ mini.
Adɑmɑ kɑ mɛ, Egibiti sunɔn gɔ̃ru gɑ bɔɔbu. U ǹ Mɔwisi kɑ Aronin gɑri swɑɑ dɑki nge mɛ Yinni Gusunɔ u rɑɑ geruɑ.
Wɑhɑlɑ nnɛse, gbɑbu swɛ̃ɛ
16 Yen biru Yinni Gusunɔ u mɑɑ Mɔwisi sɔ̃ɔwɑ u nɛɛ, ɑ seewo buru buru yellu ɑ dɑ ɑ kɑ Egibiti sunɔ yinnɑ sɑnɑm mɛ u dɔɔ dɑɑrɔ, kpɑ ɑ nùn sɔ̃ ɑ nɛɛ, ɑmɛniwɑ nɛ Yinni Gusunɔ nɑ geruɑ. U de nɛn tɔmbu bu dɑ bu mɑn sɑ̃. 17 Ù n mɑɑ yinɑ nɛn tɔmbu bu doonɑ kon nùn gbɑbu swɛ̃ɛ suremɑ yi yi koo wi kɑ win bwɑ̃ɑbu kɑ win tɔmbu kuni. Egibitigibun yɛnusu kpurowɑ su ko n gbɑbu swɛ̃ɛ yibɑ kpɑ yi tem wukiri. 18 Adɑmɑ dɔmɑ te, nɑ ǹ derimɔ gbɑbu swɛ̃ɛ yi dɑ Gosɛniɔ mi nɛn tɔmbɑ wɑ̃ɑ, kpɑ u giɑ mɑ nɛ, Yinni Gusunɔ nɑ wɑ̃ɑ tem mɛ sɔɔ. 19 Kon nɛn tɔmbu kɑ win tɔmbu wunɑnɑ. Siɑwɑ yĩre te, tɑ koo sɔ̃ɔsirɑ.
20 Yinni Gusunɔ u kuɑ nge mɛ. Gbɑbu swɛ̃ɛ wuuru tɑ Egibiti sunɔ kɑ win bwɑ̃ɑbun yɛnusu wɔri. Mɑ Egibitin tem kpuro mu sɑnkirɑ gbɑbu swɛ̃ɛ yin sɑɑbu. 21 Yerɑ Egibiti sunɔ u Mɔwisi kɑ Aroni sokusiɑ u nɛɛ, i doo i bɛɛn Yinni yɑ̃ku te kuɑ tem mɛ sɔɔ, i ku yɑri.
22 Adɑmɑ Mɔwisi u wisɑ u nɛɛ, n ǹ koorɔ mɛ domi bɛsɛn yɑ̃kunu ko n sɑ̃ɑ tɑɑrɛ Egibitigibun nɔni sɔɔ. Sɑ̀ n mɑɑ yɑ̃ku tɑɑrɛginu kuɑ ben nɔni biru, bɑ ǹ koo sun kpenu kɑsuku? 23 Yen sɔ̃, sɑ ko dɑwɑ gbɑburɔ mi n tomɑ nge sɔ̃ɔ itɑn sɑnum sɑkɑ su kɑ Gusunɔ bɛsɛn Yinni yɑ̃kuru kuɑ, nge mɛ u sun sɔ̃ɔwɑ su ko.
24 Egibiti sunɔ u nɛɛ, kon de i dɑ i Gusunɔ bɛɛn Yinni yɑ̃kuru kuɑ gbɑburɔ, ɑdɑmɑ i ku tondɑ. Yen sɔ̃, i kɑnɑru koowo nɛn sɔ̃.
25 Mɑ Mɔwisi u nùn wisɑ u nɛɛ, wee, nɑ doonɔ wunɛn min di, n kɑ Yinni Gusunɔ kɑnɑ wunɛn sɔ̃. Siɑ gbɑbu swɛ̃ɛ yi, yi koo doonɑ wunɛ kɑ wunɛn bwɑ̃ɑbu kɑ wunɛn tɔmbun min di. Adɑmɑ ɑ ku mɑɑ sun yɑɑkoru ko ɑ yinɑ su dɑ su Gusunɔ bɛsɛn Yinni yɑ̃kuru kuɑ.
26 Yerɑ Mɔwisi u yɑrɑ Egibiti sunɔn min di, u dɑ u Yinni Gusunɔ suuru kɑnɑ. 27 Mɑ Yinni Gusunɔ u kuɑ nge mɛ Mɔwisi u nùn bikiɑ. Gbɑbu swɛ̃ɛ yi, yi tondɑ Egibiti sunɔ kɑ win bwɑ̃ɑbu kɑ win tɔmbun min di. Yi ǹ mɑɑ tie mi, bɑɑ tiɑ. 28 Adɑmɑ kɑ mɛ kpuro, Egibiti sunɔn gɔ̃ru gɑ bɔbiɑ kpɑm mɑɑ, mɑ u yinɑ tɔn be, bu doonɑ.