7
1 Yinni Gusunɔ u Mɔwisi sɔ̃ɔwɑ u nɛɛ, wee, nɑ nun kuɑ nɛn kɔsire Egibiti sunɔn sɔ̃. Wunɛn mɔɔ Aroni u ko n mɑɑ sɑ̃ɑ wunɛn gɑri gero. 2 Wunɑ kɑɑ nùn sɔ̃ ye nɑ nun sɔ̃ɔmɔ kpuro. Wiyɑ u koo mɑɑ Egibiti sunɔ sɔ̃, kpɑ u de Isirelibɑ bu doonɑ win tem di. 3-4 Kon de Egibiti sunɔn gɔ̃ru gu bɔbiɑ sere u ǹ bɛɛ swɑɑ dɑkimɔ, bɑɑ mɛ kon yĩre nɑnumgii dɑbinu ko win temɔ. Yen sɔ̃, nɑ kon nùn nɛn dɑm sɔ̃ɔsi n win tɔmbu wɑhɑlɑ doke, kpɑ n nɛn tɔmbu Isirelibɑ yɑrɑ win tem di, bɑ n sɔkɑ sɑ̃ɑ swɛɛ swɛɛ nge tɑbu kowobu. 5 Sɑnɑm mɛ nɑ nɛn dɑm sɔ̃ɔsi tem mi, mɑ nɑ Isirelibɑ yɑrɑ min di, sɑnɑm mɛyɑ Egibitigibɑ koo giɑ mɑ nɛnɑ Yinni Gusunɔ.
6 Mɑ Mɔwisi kɑ Aroni bɑ kuɑ mɑm mɑm nge mɛ Yinni Gusunɔ u bu sɔ̃ɔwɑ. 7 Sɑnɑm mɛ bɑ kɑ Egibiti sunɔ gɑri yibɑ mɔ̀, Mɔwisi u mɔwɑ wɔ̃ɔ wɛnɛ, mɑ Aroni u mɔ wɔ̃ɔ wɛnɛ kɑ itɑ.
Egibiti sunɔ u yinɑ
u Mɔwisi kɑ Aroni swɑɑ dɑki
8 Yen biru Yinni Gusunɔ u Mɔwisi kɑ Aroni sɔ̃ɔwɑ u nɛɛ, 9 Egibiti sunɔ ù n bɛɛ sɔ̃ɔwɑ u nɛɛ, i nùn yĩreru kuo te tɑ sɔ̃ɔsi mɑ nɛnɑ nɑ bɛɛ gɔrimɑ, sɑɑ ye sɔɔrɑ wunɛ Mɔwisi kɑɑ Aroni sɔ̃ u win dɛkɑ suo u ye kɔ̃ sunɔ win wuswɑɑɔ. Yɑ koo gɔsiɑ wɑɑ.
10 Mɑ bɑ seewɑ bɑ dɑ Egibiti sunɔn mi, bɑ kuɑ ye Yinni Gusunɔ u bu sɔ̃ɔwɑ. Aroni u win dɛkɑ ye kɔ̃ sunɔ wi kɑ win bwɑ̃ɑbun wuswɑɑɔ. Mɑ yɑ gɔsiɑ wɑɑ. 11-12 Yerɑ Egibiti sunɔ u win bwisigibu kɑ win timgibu kɑ win sɔrobu sokɑ. Ben bɑɑwure u dobo dobo kuɑ, u win dɛkɑ kɔ̃ mɑ yɑ gɔsiɑ wɑɑ. Adɑmɑ Aronigiɑ yɑ begii mwɛɛki. 13 Kɑ mɛ, Egibiti sunɔn gɔ̃ru gɑ bɔbiɑ, u ǹ mɑɑ Mɔwisi kɑ Aronin gere swɑɑ dɑki, nge mɛ Yinni Gusunɔ u rɑɑ geruɑ.
Wɑhɑlɑ gbiikɑɑ ye Gusunɔ
u Egibitigibu doke, yɛm
14 Yinni Gusunɔ u kpɑm Mɔwisi sɔ̃ɔwɑ u nɛɛ, Egibiti sunɔn gɔ̃ru gɑ bɔbiɑ. U yinɑ tɔn be, bu doonɑ. 15 Wee u koo dɑ dɑɑrɔ buru buru yellu. A doo ɑ kɑ nùn yinnɑ dɑɑrun goorɔ kpɑ ɑ n dɛkɑ ye nɛni, ye yɑ rɑɑ gɔsiɑ wɑɑ mi. 16 Kpɑ ɑ nùn sɔ̃ ɑ nɛɛ, nɛ Gusunɔ Heberubɑn Yinniwɑ nɑ nun gɔrimɑ win mi. U de nɛn tɔmbu bu dɑ bu mɑn sɑ̃ gbɑburɔ. Nɑ wɑ mɑ sere kɑ tɛ̃ u ǹ gɑri yi swɑɑ sue. 17 Yèn sɔ̃ u nɛɛ, u ǹ mɑn yɛ̃, yen sɔ̃nɑ nɑ nɛɛ, ɑmɛniwɑ u koo kɑ mɑn giɑ, nɛ wi nɑ rɑ n wɑ̃ɑ. A dɑɑ ten nim soowo kɑ dɛkɑ ye ɑ nɛni mi, kpɑ n nim mɛ gɔsiɑ yɛm. 18 Swɛ̃ɛ yi yi wɑ̃ɑ dɑɑ te sɔɔ, kpɑ yi gbi, kpɑ dɑɑ ten nim mu sɑnkirɑ sere Egibitigibu bu kpɑnɑ bu mu nɔ.
19 Yerɑ Yinni Gusunɔ u Mɔwisi sɔ̃ɔwɑ u nɛɛ, ɑ Aroni sɔ̃ɔwɔ u win dɛkɑ suo u ye tĩi Egibitin nim kpuron wɔllɔ mɛ mu wɑ̃ɑ dɑɑnɔ kɑ yɛrusɔ kɑ sere kotosɔ kɑ wekenɔ. Mi nim mu wɑ̃ɑ kpuro gesi mu koo gɔsiɑwɑ yɛm, kpɑ yɛm mu n wɑ̃ɑ Egibitin tem kpuro sɔɔ.
20 Mɑ Mɔwisi kɑ Aroni bɑ kuɑ nge mɛ Yinni Gusunɔ u bu sɔ̃ɔwɑ. Aroni u win dɛkɑ ye suɑ, mɑ u dɑɑ ten nim so Egibiti sunɔ kɑ win bwɑ̃ɑbun wuswɑɑɔ. Mɑ mu gɔsiɑ yɛm. 21 Swɛ̃ɛ yi yi wɑ̃ɑ dɑɑ te sɔɔ, yi gu. Mɑ dɑɑ ten nim mu sɑnkirɑ. Egibitigibɑ kpɑnɑ bu mu nɔ. Mɑ nim mɛ mu wɑ̃ɑ tem mɛ kpuro sɔɔ mu kuɑ yɛm.
22 Adɑmɑ Egibitin sɔrobu bɑ mɑɑ kuɑ mɛ kɑ ben dobo dobo. Ye Egibiti sunɔ u wɑ mɛ, mɑ win gɔ̃ru gɑ bɔbiɑ, u ǹ Mɔwisi kɑ Aronin gɑri swɑɑ dɑki nge mɛ Yinni Gusunɔ u rɑɑ geruɑ. 23 Egibiti sunɔ u gɔsirɑ win yɛnuɔ. Gɑri yi, yi ǹ mɑm nùn nɑnde. 24 Mɑ Egibitigibu kpuro bɑ tem gbɑ gbɑ dɑɑ ten goorɔ bu kɑ nim wɑ bu nɔ, domi bɑ ǹ kpɛ̃ bu dɑɑ ten nim nɔ.
25 Mɑ dɑɑ ten nim mɛ, mu gɔsire yɛm n kɑ kuɑ sɔ̃ɔ nɔɔbɑ yiru sɑɑ dɔmɑ tèn di Yinni Gusunɔ u derɑ bɑ mu so.
Wɑhɑlɑ yiruse, surenu
26 Yen biru Yinni Gusunɔ u kpɑm Mɔwisi sɔ̃ɔwɑ u nɛɛ, ɑ doo Egibiti sunɔn mi, ɑ nùn sɔ̃ ɑ nɛɛ, nɛ Yinni Gusunɔ nɑ nɛɛ, u de nɛn tɔmbu bu dɑ bu mɑn sɑ̃. 27 Ù n mɑɑ yinɑ u bu kɑrɑ bu doonɑ, kon de surenu yibu nu wɑhɑlɑ doke win tem sɔɔ kpuro. 28 Surenu koo mɑrurɑ dɑɑ bɑkɑ ten di, kpɑ nu gɑsirimɑ sere win yɛnuɔ kɑ win dii sɔɔwɔ kɑ win kpinu wɔllɔ n kɑ dɑ win bwɑ̃ɑbu kɑ win tɔmbun diɑɔ. Nu koo mɑm du sere doo koo yenɔ kɑ sonɔ. 29 Sure ni, nu ko nu n kɑbirimɔ kpɑ nu win tii kɑ win tɔmbu kɑ win bwɑ̃ɑbu mɑkiri.