Wɑhɑlɑ nɔɔbuse,
yɑɑ sɑbenun gɔɔ
9
1 Yen biru kpɑm Yinni Gusunɔ u Mɔwisi sɔ̃ɔwɑ u nɛɛ, ɑ doo Egibiti sunɔn mi kpɑ ɑ nùn sɔ̃ ɑ nɛɛ, ɑmɛniwɑ nɛ Heberubɑn Yinni Wi u rɑ n wɑ̃ɑ nɑ geruɑ. Nɑ nɛɛ, u de nɛn tɔmbu bu doonɑ bu mɑn sɑ̃. 2 Adɑmɑ ù kun bu yɔ̃su, mɑ u yen yinɑ yinɑminu mɔ̀ kpɑm, 3 wee, kon nɛn nɔm dɑmguu doke win dumi kɑ kɛtɛkunu kɑ yooyoosu kɑ kɛtɛbɑ kɑ yɑ̃ɑnu sɔɔ, win yɑɑ sɑbenu kpuro gesi ni bɑ kpɑrɑmɔ gberɔ. Adumgbɛku bɑkɑ yɑ koo nu wɔri. 4 Sɑɑ ye sɔɔ, kon Isirelibɑn sɑbenu kɑ Egibitiginu wunɑnɑ. Ye yɑ sɑ̃ɑ Isirelibɑn sɑbenu, yen gɑɑ kun gbimɔ.
5 Mɑ Yinni Gusunɔ u tɔ̃ru yi u nɛɛ, ù kun bu yɔ̃su, siɑwɑ kon yɑbu ye ko tem mɛ sɔɔ.
6 Yen sisiru Yinni Gusunɔ u kuɑ mɛ. Egibitigibun sɑbenu gbisukɑ kpuro, ɑdɑmɑ Isirelibɑn sɑbenu sɔɔ, bɑɑ teeru tɑ ǹ gu. 7 Egibiti sunɔ u ye yɑ koorɑn lɑbɑɑri bikiɑ. U nuɑ mɑ Isirelibɑn sɑbenu sɔɔ bɑɑ teeru tɑ ǹ gu. Kɑ mɛ, win gɔ̃ru gɑ kpɑm bɔbiɑ, u ǹ wure tɔn be, bu doonɑ.
Wɑhɑlɑ nɔɔbɑ tiɑse, bwisinu
8 Yinni Gusunɔ u kpɑm Mɔwisi kɑ Aroni sɔ̃ɔwɑ u nɛɛ, i torom sɔko doowɔ i n nɛni, kpɑ Mɔwisi u mɛ yɛ̃kɑ wɔllɔ Egibiti sunɔn wuswɑɑɔ. 9 Torom mɛ, mu koo gɔsiɑ nge tuɑ, kpɑ mu Egibitin tem kpuro wukiri. Mu koo bwisinu wisi tɔmbu kɑ sɑbenu sɔɔ, kpɑ nu booboosu ko.
10 Yerɑ bɑ torom mɛ sɔkɑ bɑ dɑ Egibiti sunɔn wuswɑɑɔ. Mɑ Mɔwisi u torom mɛ yɛ̃kɑnɑ wɔllɔ, mɑ mu kuɑ bwisinu tɔmbu kɑ sɑbenun wɑsi sɔɔ. 11 Sɑɑ ye sɔɔ, sɔrobɑ kpɑnɑ bu yɑrimɑ Mɔwisin wuswɑɑɔ bwisi nin sɔ̃. Domi nu ben tii wisiwɑ nge Egibitigii be bɑ tie. 12 Egibiti sunɔ u ǹ Mɔwisi kɑ Aronin gɑri swɑɑ dɑki. Yinni Gusunɔ u derɑ win gɔ̃ru gɑ bɔbiɑ gɑ sosi nge mɛ u rɑɑ Mɔwisi sɔ̃ɔwɑ.
Wɑhɑlɑ nɔɔbɑ yiruse,
guru kpenu
13 Yerɑ Yinni Gusunɔ u kpɑm Mɔwisi sɔ̃ɔwɑ u nɛɛ, ɑ seewo buru buru yellu ɑ dɑ Egibiti sunɔn mi, kpɑ ɑ nùn sɔ̃ ɑ nɛɛ, ɑmɛniwɑ nɛ Gusunɔ Heberubɑn Yinni nɛ wi nɑ rɑ n wɑ̃ɑ nɑ geruɑ. U de nɛn tɔmbu bu doonɑ bu mɑn sɑ̃. 14 Domi tɛ̃, n ǹ mɔ win bwɑ̃ɑbu kɑ win tɔmbu tɔnɑ kon wɑhɑlɑ doke ye yɑ koo nɛn dɑm bɑkɑm sɔ̃ɔsi. Kɑ win tiiwɑ kpɑ u giɑ mɑ goo sɑri nge nɛ hɑnduniɑ sɔɔ. 15 Nɑ̀ n dɑɑ nɛn nɔm dɑmguu dɛmiɑ nɑ wi kɑ win tɔmbu bɑrɑ kɔ̃suru kpɛ̃ɛ, u ǹ ko n dɑɑ mɑɑ wɑ̃ɑ hɑnduniɑɔ. 16 Adɑmɑ nɑ derɑ u wɑ̃ɑ u kɑ nɛn dɑm wɑn sɔ̃, kpɑ nɛn yĩsiru tu kɑ nɔɔrɑ hɑnduniɑ kpuro sɔɔ. 17 Wee u kɑ nɛn tɔmbu seewɑ sere kɑ tɛ̃. U ǹ dere bu doonɑ. 18 Yen sɔ̃, siɑ ɑmɑdɑɑre kon de guru kpenu nu nɛɛrɑ kɑ dɑm nìn bweseru nu ǹ koore Egibitin temɔ sɑɑ yen toren di sere n kɑ gisɔ girɑri. 19 Ǹ n mɛn nɑ, ɑ de bu win yɑɑ sɑbenu kuku yeru kuɑ, kɑ yɑbu ye u mɔ kpuro gberɔ. Domi guru kpee ni, nu koo tɔmbu kpuro so gbeɑɔ kɑ yɑɑ sɑbenu kpuro ni nu ǹ kuku yeru wɑ, kpɑ sɑbe ni, kɑ tɔn be, bu kɑm ko.
20 Yerɑ Egibiti sunɔn bwɑ̃ɑbu gɑbu be bɑ Yinni Gusunɔn gɑri nɑsie, bɑ derɑ ben yobu bɑ kɑ ben sɑbenu wɔmɑ yɛnuɔ fuuku fuuku. 21 Be bɑ kun mɑɑ Yinni Gusunɔn gɑri gɑrɑ, bɑ ben yobu kɑ yɑɑ sɑbenu deri gbeɑɔ.
22 Mɑ Yinni Gusunɔ u Mɔwisi sɔ̃ɔwɑ u nɛɛ, ɑ wunɛn nɔmɑ suo wɔllɔ kpɑ guru kpenu nu yɛ̃kɑmɑ Egibitin tem kpuro sɔɔ, tɔmbu kɑ sɑbenu kɑ ye yɑ kpiɑ gbeɑɔ kpuron wɔllɔ.
23 Yerɑ Mɔwisi u win dɛkɑ suɑ u tĩi wɔllɔ, mɑ Yinni Gusunɔ u derɑ guru kpenu nɛmɔ. Guru mɑɑkinu mɔ̀ nu girɑrimɔ sere temɔ. 24 Gurɑ yen bweserɑ kun nɛɛre Egibitin tem sɔɔ sɑɑ yen toren di. 25 Mɑ guru kpee ni, nu bɑɑyere kpuro so nu go ye yɑ wɑ̃ɑ gbeɑɔ Egibitin tem sɔɔ, sɑɑ tɔmbu sere kɑ sɑbenu kɑ ye yɑ kpiɑ kpuro. Mɑ dɑ̃nu kpuro nu bɛsikirɑ. 26 Gosɛnin berɑ mi Isirelibɑ bɑ wɑ̃ɑ tɔnɑwɑ guru kpee ni, nu ǹ nɑ. 27 Yerɑ Egibiti sunɔ u Mɔwisi kɑ Aroni sokusiɑ u nɛɛ, nɑ wɑ mɑ nɛnɑ nɑ torɑ. Gusunɔ wi u rɑ n wɑ̃ɑ u gem mɔ. Nɛ kɑ nɛn tɔmbu sɑ tɑɑrɛ kuɑ. 28 A Yinni Gusunɔ kɑnɔ domi guru gbɑ̃suku ni, kɑ guru kpee ni, nu den turɑ. Kon de i doonɑ, nɑ ǹ mɑɑ bɛɛ nɛnumɔ.
29 Mɑ Mɔwisi u nùn wisɑ u nɛɛ, nɑ̀ n yɑrɑ wuun di kon nɛn nɔmɑ suɑ wɔllɔ n Yinni Gusunɔ kɑnɑ, kpɑ guru gbɑ̃sukunu kɑ guru kpenu nu mɑri ɑ kɑ giɑ mɑ wiyɑ hɑnduniɑ mɔ. 30 Adɑmɑ nɑ yɛ̃ mɑ wunɛ kɑ wunɛn bwɑ̃ɑbu i ǹ Yinni Gusunɔ nɑsiɑm kpɑ.
31 Sɑɑ ye gurɑ ye, yɑ nɑ, wɛ̃su kɑ ɔɔsu kɑm kuɑ yèn sɔ̃ ɔɔsu yɑ nɔɔ kusiɑ, wɛ̃su mɑɑ wɛ̃su sɑ̃ɑ. 32 Adɑmɑ ɑlikɑmɑ yɑ ǹ kɑm kue yèn sɔ̃ yɑ ǹ sɑnɑm mɛ kpɑ̃.
33 Yen biru Mɔwisi u yɑrɑ Egibiti sunɔn min di u dɑ wuun biruɔ. Mɑ u win nɔmɑ suɑ wɔllɔ u Yinni Gusunɔ kɑnɑ, mɑ guru gbɑ̃sukunu kɑ guru kpee ni, nu mɑri. Gurɑ kun mɑɑ nɛmɔ.