Yɑkɔbu kɑ win tɔmbu
bɑ dɑ Egibitiɔ
46
1 Yɑkɔbu wi bɑ mɔ̀ Isireli u seewɑ u swɑɑ wɔri kɑ ye u mɔ kpuro u turɑ Beri Sebɑɔ. Miyɑ u Gusunɔ yɑ̃kuru kuɑ nge mɛ win tundo Isɑki u rɑ rɑɑ ko. 2 Yerɑ wɔ̃kuru Gusunɔ u kɑ nùn gɑri kuɑ kɑ̃siru sɔɔ u nɛɛ, Yɑkɔbu, Yɑkɔbu.
Mɑ u wurɑ u nɛɛ, nɛ wee.
3 Mɑ Gusunɔ u nɛɛ, nɛnɑ Gusunɔ, wunɛn tundon Yinni. A ku bɛrum ko, ɑ doo Egibiti mi, domi miyɑ kon nun ko bwese bɑkɑrun nuuru. 4 Nɛn tii kon kɑ nun dɑ kpɑ n mɑɑ kɑ nun wurɑmɑ. Yosɛfun nɔmu sɔɔrɑ kɑɑ gbi.
5-6 Yɑkɔbu kɑ win tɔmbu kpuro bɑ seewɑ Beri Sebɑn di, mɑ win bibɑ nùn doke sɑrɛti sɔɔ kɑ ben tiin bibu kɑ ben kurɔbu. Sɑrɛti be, Egibiti sunɔwɑ u bu mɔrisiɑmɑ bu kɑ bu suɑ. Yen biru bɑ ben yɑɑ sɑbenu gurɑ kɑ ben dukiɑ ye bɑ wɑ Kɑnɑnin temɔ. Mɑ bɑ doonɑ Egibitiɔ, 7 wi kɑ win bii tɔn durɔbu kɑ tɔn kurɔbu kɑ mɑɑ win debuminu, win yɛnugibu kpuro gesi.
Yɑkɔbun tɔmbu
8 Be bɑ sɑ̃ɑ Yɑkɔbun bweseru be bɑ nɑ Egibitiɔ, ben yĩsɑ wee.Rubɛni, win bii gbiikoo, 9 kɑ win bibu Enɔku kɑ Pɑɑlu kɑ Hɛsironi kɑ Kɑɑmi. 10 Simɛɔ kɑ win bibu Yɛmuɛli kɑ Yɑmini kɑ Ohɑdi kɑ Yɑkini kɑ Sokɑɑ kɑ sere Sɔɔlu wìn mɛro u sɑ̃ɑ Kɑnɑnigii. 11 Lefi mɑɑ kɑ wigibu Gɛɛsɔni kɑ Kehɑti kɑ Mɛrɑri. 12 Yudɑ kɑ wigibu Eri kɑ Onɑni kɑ Selɑ kɑ Perɛsi kɑ Serɑki. Adɑmɑ Eri kɑ Onɑni bɑ gu Kɑnɑnin temɔ. Mɑ ben wɔnɔ Perɛsi wi, u Hɛsironi mɑrɑ kɑ Hɑmulu. 13 Isɑkɑri kɑ mɑɑ wigibu Tolɑ kɑ Pufɑ kɑ Yoobu kɑ Simuroni. 14 Sɑbuloni mɑɑ kɑ wigibu Serɛdi kɑ Eloni kɑ Yɑlɛɛli.
15 Beni kɑ sere win bii tɔn kurɔ Dinɑ bɑ sɑ̃ɑ Leɑn bibu be u Yɑkɔbu mɑruɑ Pɑdɑnɑrɑmuɔ. Be kɑ ben bibu bɑ sɑ̃ɑwɑ mi tɔnu tɛnɑ kɑ itɑ. 16 Gɑdi kɑ mɑɑ wigibu Sifioni kɑ Hɑgi kɑ Suni kɑ Ɛsiboni kɑ Eri kɑ Arodi kɑ Areli. 17 Asɛɛ kɑ mɑɑ wigibu Yiminɑ kɑ Yisifɑ kɑ Yisifi kɑ Beriɑ kɑ ben sesu Serɑki. Mɑ Beriɑ u Heberu mɑrɑ kɑ Mɑɑkiɛli.
18 Berɑ bɑ sɑ̃ɑ Yɑkɔbun bweseru be bɑ mɑɑ mɑrurɑ Silipɑn min di. Be kpuro bɑ sɑ̃ɑwɑ tɔnu wɔkurɑ nɔɔbu kɑ tiɑ. Silipɑ wi, u sɑ̃ɑwɑ Leɑn yoo wi Lɑbɑni win tundo u nùn wɛ̃.
19 Yosɛfu kɑ Bɛnyɑmɛɛwɑ bɑ sɑ̃ɑ Rɑsɛlin bibu. 20 Yosɛfu u wɑ̃ɑwɑ Egibitiɔ u kɑ Mɑnɑse kɑ Efɑrɑimu mɑrɑ. Bii ben mɛron yĩsirɑ Asinɑti. U sɑ̃ɑwɑ Potiferɑ, Onin yɑ̃ku kowon bii. 21 Mɑ Bɛnyɑmɛɛ u seewɑ u Belɑ mɑrɑ kɑ Bekɛɛ kɑ Asibɛli kɑ Gerɑ kɑ Nɑmɑni kɑ Ehi kɑ Rɔsi kɑ Mupimu kɑ Hupimu kɑ Aɑdu. 22 Be bɑ sɑ̃ɑ Yɑkɔbun bweseru be bɑ mɑɑ mɑrurɑ Rɑsɛlin min di, berɑ mi. Be kpuro bɑ kuɑwɑ tɔnu wɔkurɑ nnɛ. 23 Bilihɑ u bibu yiru mɑrɑ, beyɑ Dɑnu kɑ Nɛfitɑli. Dɑnu u seewɑ u Husimu mɑrɑ. 24 Nɛfitɑli u mɑɑ seewɑ u Yɑsɛɛli kɑ Guni kɑ Yesɛɛ kɑ Silɛmu mɑrɑ.
25 Berɑ bɑ sɑ̃ɑ Yɑkɔbun bweseru be bɑ mɑɑ mɑrurɑ Bilihɑn min di. Be kpuro bɑ sɑ̃ɑwɑ mi tɔmbu nɔɔbɑ yiru. Bilihɑ wi, u sɑ̃ɑwɑ Rɑsɛlin yoo wi Lɑbɑni win tundo u nùn wɛ̃.
26 Tɔn be bɑ kɑ Yɑkɔbu dɑ Egibitiɔ be bɑ sɑ̃ɑ win tiin yɛm, bɑ sɑ̃ɑwɑ tɔnu wɑtɑ kɑ nɔɔbɑ tiɑ, win bibun kurɔbu bɑɑsi. 27 N deemɑ Yosɛfu u mɑɑ bibu yiru mɑrɑ Egibiti mi. Mɑ Yɑkɔbun tɔmbu be bɑ sɑ̃ɑ win yɛm bɑ kɑ wɑ̃ɑ Egibitiɔ, ben geerɑ kuɑ tɔnu wɑtɑ kɑ wɔkuru.
Yɑkɔbu kɑ win tɔmbu Egibitiɔ
28 Ye bɑ sisi mi, yerɑ Yɑkɔbu u Yudɑ gɔrɑ u dɑ u Yosɛfu sɔ̃ mɑ u dɔɔ Gosɛni giɑ. 29 Mɑ Yosɛfu u win kɛkɛ ye dumi gɑwe duɑ u kɑ dɑ Gosɛniɔ u kɑ win tundo Isireli yinnɑ. Ye bɑ yinnɑ u nùn gɑbɑ wĩirɔ u bɔkɑsi mɑ u swĩisi n kɑ tɛ. 30 Mɑ Yɑkɔbu wi bɑ mɑɑ sokumɔ Isireli, u Yosɛfu sɔ̃ɔwɑ u nɛɛ, bɑɑ nɑ̀ n gu gisɔ, yɑ ǹ tɑɑrɛ, domi nɑ wunɛn wuswɑɑ wɑ, nɑ mɑɑ wɑ mɑ ɑ wɑ̃ɑ hunde sɔɔ.
31 Yerɑ Yosɛfu u win mɑɑbu kɑ sere mɑɑ win tundon yɛnugii be bɑ tie sɔ̃ɔwɑ u nɛɛ, nɑ kon dɑ n sunɔ nɔɔsiɑ mɑ bɛɛ nɛn tundon yɛnugibu i tunumɑ, bɛɛ be i rɑɑ wɑ̃ɑ Kɑnɑnin temɔ. 32 Kon nùn sɔ̃ mɑ yɑɑ sɑbenun sɔmburɑ i rɑ ko. I mɑɑ kɑ bɛɛn yɑ̃ɑnu kɑ bɛɛn kɛtɛbɑ nɑ, kɑ sere bɛɛn ye i mɔ kpuro. 33 Yen sɔ̃, ù n dɑ bɛɛ bikiɑ u nɛɛ, 34 sɔmbu terɑ̀ i rɑ ko, i nùn wisio i nɛɛ, yɑɑ sɑbenun nɔɔribɑ bu sɑ̃ɑ bɛɛn sɔmburu sɑɑ bɛɛn birun di sere kɑ gisɔ, bɛɛ kɑ bɛɛn bɑɑbɑbɑ. Nge mɛyɑ i ko wɑ i kɑ sinɑ Gosɛnin temɔ, domi Egibitigibɑ ku rɑ sɑbe kpɑrobu kɑ̃.