Yosɛfu u tii win mɑɑbu tusiɑ
45
1 Yosɛfu u den kpɑnɑ u tii nɛnɛ Egibitigii be bɑ wɑ̃ɑ mi kpuron wuswɑɑɔ. Yerɑ u woodɑ wɛ̃ u nɛɛ, bu yɑrio min di.
Mɑ be kpuro bɑ yɑrɑ bɑ bu deri wi kɑ win mɑɑbu u kɑ tii bu tusiɑ. 2 U wurɑ kuɑ sere Egibitigii be bɑ wɑ̃ɑ turuku mi, bɑ ye nuɑ, mɑ bɑ ye sunɔn yɛnugibu sɔ̃ɔwɑ. 3 Yosɛfu u win mɑɑbu kɑ wɔnɔ wi sɔ̃ɔwɑ u nɛɛ, nɛnɑ Yosɛfu. Bɛsɛn bɑɑbɑ u wɑ̃ɑ hunde sɔɔ?
Adɑmɑ bɑ kpɑnɑ bu nùn wisi domi bɛrum bu mwɑ win wuswɑɑɔ. 4 Mɑ u nɛɛ, i suuru koowo i susimɑ nɛn bɔkuɔ.
Ye bɑ nùn susi, yerɑ u bu sɔ̃ɔwɑ u nɛɛ, nɛnɑ bɛɛn wɔnɔ Yosɛfu wi i dɔrɑ bɑ kɑ nɑ Egibiti mini. 5 Tɛ̃, i ku nuki sɑnkirɑ, i ku mɑɑ tɑɑrɛ wɛ̃ɛnɑ ye i kɑ mɑn dɔrɑ. Domi Gusunɔwɑ u derɑ nɑ nɑ mini n kɑ bɛɛ fɑɑbɑ ko. 6 Wee, gɔ̃ɔ ten wɔ̃ɔ yirusewɑ sɑ dɔɔ mini. N mɑɑ tie wɔ̃ɔ nɔɔbu yè sɔɔ goo kun kpɛ̃ u duure u sere gɛ̃. 7 Gusunɔn sinɑrɑ nɑ kɑ nɑ tem mini n kɑ bɛɛ dĩɑnu beruɑ kpɑ n bɛɛ yɑrɑ gɔ̃ɔ ten di n bɛɛn bweseru fɑɑbɑ ko. 8 N ǹ bɛɛ i derɑ nɑ nɑ mini. Gusunɔwɑ u derɑ nɑ nɑ, mɑ u mɑn kuɑ Egibiti sunɔn yɛnu yɛ̃ro kɑ win ye u mɔ kpuron wirugii kɑ sere mɑɑ tem mɛn wirugii. 9 Yen sɔ̃, i gɔsiro fuuku bɛsɛn tundon mi, i nùn sɔ̃ i nɛɛ, ɑmɛniwɑ nɛ win bii Yosɛfu nɑ geruɑ, Gusunɔ u mɑn kuɑ Egibitin tem wirugii, u de u nɑ fuuku. 10 Ù n nɑ kon de u sinɑ Gosɛniɔ kpɑ u n wɑ̃ɑ nɛn bɔkuɔ, wi kɑ win bibu kɑ win debuminu kɑ win yɑ̃ɑnu kɑ win kɛtɛbɑ kɑ win ye u mɔ kpuro gesi. 11 Yèn bukɑtɑ u mɔ kpuro kon nùn wɛ̃, domi gɔ̃ɔrɑ mɑɑ tie wɔ̃ɔ nɔɔbu. Ù n wɑ̃ɑ nɛn bɔkuɔ, gɔ̃ɔ te, tɑ ǹ mɑɑ bu goomɔ kɑ win yɛnugibu kɑ win ye u mɔ kpuro. 12 Bɛɛ kpuro kɑ wunɛn tii Bɛnyɑmɛɛ, i wɑ kɑ nɔni mɑ nɛnɑ Yosɛfu, nɛ wi nɑ kɑ bɛɛ gɑri mɔ̀ mini. 13 Ǹ n mɛn nɑ, i doo i bɛsɛn tundo sɔ̃ nge mɛ nɛn yiiko yɑ nɛ Egibitiɔ kɑ ye i wɑ mini kpuro. I doo fuuku i nùn tɑmɑ.
14 Yen biru Yosɛfu u win wɔnɔ Bɛnyɑmɛɛ nɛnuɑ u bɔkɑsi wĩirɔ, mɑ u swĩ. Bɛnyɑmɛɛn tii u mɑɑ swĩ mi bɑ bɔkɑsinɛ. 15 Ye u Bɛnyɑmɛɛ yɔ̃su, yerɑ u win mɑɑ ben bɑɑwure bɔkɑsi u sɔ̃su u kɑ swĩisimɔ. Yen biruwɑ bɑ kɑ nùn gɑri kuɑ.
Egibiti sunɔ u Yɑkɔbu sokusiɑ
u nɑ Egibitiɔ
16 Ye Egibiti sunɔn yɛnugibɑ nuɑ mɑ Yosɛfun mɑɑbɑ tunumɑ, yerɑ yɑ sunɔn tii kɑ win tɔmbu dore. 17 Mɑ u Yosɛfu sɔ̃ɔwɑ u nɛɛ, ɑ wunɛn mɑɑ be sɔ̃ɔwɔ bu ben kɛtɛkunu sɔmunu sɔbio bu dɑ Kɑnɑnin temɔ 18 bu kɑ bɛɛn tundo kɑ bɛɛn yɛnugibu nɑ nɛn turuku. Kon bu tem gem wɛ̃ kpɑ bɑ n dĩɑ geenu mɔ bɑ n dimɔ. 19 A mɑɑ bu sɔ̃ɔwɔ bu Egibitin sɑrɛtibɑ suo bu kɑ dɑ bu bɛɛn tundo kɑ ben kurɔbu kɑ ben bibu suɑmɑ. 20 Bu ku wururɑ ben ye bɑ koo derin sɔ̃, domi gɑ̃ɑ ni nu geɑ sɑ̃ɑ Egibiti mini, niyɑ nu koo ko beginu.
21 Mɑ Isirelin bii be, bɑ kuɑ mɛ. Yosɛfu u bu sɑrɛtibɑ wɛ̃ mɑ u bu dĩɑnu kusenu kuɑ ni bɑ koo di swɑɑɔ nge mɛ sunɔ u geruɑ. 22 U ben bɑɑwure yɑbe kpɑɑru kɑ̃. Adɑmɑ yɑbe kpɑɑnu nɔɔbuwɑ u Bɛnyɑmɛɛ kɑ̃ kɑ sii geesun gobi goobɑ wunɔbu (300). 23 Mɑ u ben tundo Egibitin gɑ̃ɑ geenu mɔrisiɑ u nu kɛtɛkunu wɔkuru sɔbi. U dĩɑnu suɑ u bu wɛ̃ kɑ kuse ni bɑ koo di swɑɑɔ bɑ̀ n wee Egibitiɔ. Mɑ u mɑɑ ni kɛtɛku ninu wɔkuru sɔbi. 24 Yen biru u derɑ win mɑɑ be, bɑ swɑɑ wɔri. Mɑ u bu sɔ̃ɔwɑ u nɛɛ, i suuru koowo, i ku rɑ sɑnnɑ swɑɑɔ.
25 Mɑ bɑ doonɑmɑ sɑɑ Egibitin di bɑ nɑ ben tundo Yɑkɔbun mi Kɑnɑniɔ. 26 Ye bɑ turɑ, bɑ nùn sɔ̃ɔwɑ bɑ nɛɛ, Yosɛfu kun gu, u wɑsi. Wiyɑ u mɑm Egibitin tem kpuro kpɑre.
Ye Yɑkɔbu u nuɑ mɛ, u kpɑnɑ u bu wisi, domi u ǹ nɑɑnɛ kue ye bɑ nùn sɔ̃ɔmɔ. 27 Adɑmɑ ye bɑ nùn kpuro sɑɑriɑ ye Yosɛfu u bu sɔ̃ɔwɑ, mɑ u sɑrɛti be wɑ be u mɔrisiɑmɑ bu kɑ nùn suɑmɑ, yerɑ win bwɛ̃rɑ den yɛmiɑ mɑ win dɑm wurɑmɑ. 28 Yerɑ u nɛɛ, wee tɛ̃, nɛn bii Yosɛfu u wɑ̃ɑ hunde sɔɔ, nɛn bwɛ̃rɑ kpunɑ tɛ̃. Kon dɑ n nùn wɑ n sere gbi.