47
1-2 Yen biruwɑ Yosɛfu u win mɑɑ ben nɔɔbu suɑ bɑ dɑ Egibiti sunɔn mi. Mɑ Yosɛfu u nùn sɔ̃ɔwɑ u nɛɛ, nɛn mɑɑbu kɑ nɛn tundo bɑ nɑ sɑɑ Kɑnɑnin tem di kɑ ben yɑ̃ɑnu kɑ ben kɛtɛbɑ kɑ ben ye bɑ mɔ kpuro. Wee, bɑ wɑ̃ɑ Gosɛnin temɔ.
Bɑ nùn wisɑ bɑ nɛɛ, yɑɑ sɑbenɑ sɑ rɑ kpɑre, yinni. Mɛyɑ mɑɑ bɛsɛn bɑɑbɑbɑn tii. 4 Bɑ mɑɑ nɛɛ, sɑ nɑwɑ su kɑ sinɑ tem mi, domi yɑkɑ bekusu sɑri si bɛsɛn yɑɑ sɑbenu koo di, yèn sɔ̃ gɔ̃ɔ te, tɑ Kɑnɑnin tem nɛni. Yen sɔ̃nɑ sɑ nun kɑnɑmɔ ɑ de su sinɑ Gosɛnin temɔ.
5 Yerɑ sunɔ wi, u Yosɛfu sɔ̃ɔwɑ u nɛɛ, wee, wunɛn tundo kɑ wunɛn mɑɑbu bɑ wɔmɑ wunɛn mi. 6 Egibitin tem kpuro wee wunɛn nɔmuɔ. A de bu sinɑ Gosɛniɔ, domi min temɑ mu geɑ sɑ̃ɑ. À n mɑɑ yɛ̃ gɑbɑ kpɑrɑbun hɑniɑ mɔ be sɔɔ, ɑ bu nɛn yɑɑ sɑbenu nɔmu sɔndio.
7 Yen biru Yosɛfu u kɑ win tundo Yɑkɔbu dɑ Egibiti sunɔn mi, bɑ tɔbirinɑ. Mɑ Yɑkɔbu u sunɔ wi domɑru kuɑ. 8 Yerɑ sunɔ u nùn bikiɑ u nɛɛ, wunɛn wɔ̃ɔ nyewɑ mini.
9 Yɑkɔbu u nùn wisɑ u nɛɛ, nɛn wɔ̃ɔ wunɑɑ teeru kɑ wɔkurɑ mi, mìn di nɑ hɑnduniɑ duɑ, nɑ mɑɑ sirenɛwɑ. Nɛn wɔ̃ɔ gɑ ǹ dɑbi, gɑ ǹ mɑɑ nuku dobu mɔ, mɛyɑ gɑ ǹ mɑɑ nɛn bɑɑbɑbɑguu turɑ ge bɑ kuɑ sɑnɑm mɛ bɑ wɑ̃ɑ hunde sɔɔ.
10 Mɑ Yɑkɔbu u kpɑm sunɔ domɑru kuɑ bɑ sere yɑrɑ win min di.
11 Yosɛfu u win tundo kɑ win mɑɑbu sin yeru kuɑ, u bu tem wɛ̃ Rɑmusɛsin berɑ giɑ mi n geɑ bo Egibitin tem sɔɔ, nge mɛ sunɔ u rɑɑ nùn sɔ̃ɔwɑ u ko. 12 Mɑ u win tundon yɛnugii be kpuro dĩɑnu wɛ̃ nge mɛ ben geerɑ nɛ.
Gɔ̃ɔ bɑkɑru
13 Sɑnɑm dɔɔ sɑnɑm wee, gɔ̃ɔrɑ kpɛ̃ɑ tem mɛ sɔɔ. Bɑɑ dĩɑ burɑ kun mɑɑ wɑ̃ɑ. Egibitigibu kɑ Kɑnɑnibɑ bɑ wururɑwɑ kpuro gɔ̃ɔ ten sɔ̃. 14 Bɑ kɑ ben gobi kpuro dĩɑnu dwɑ. Mɑ Yosɛfu u gobi yi mɛnnɑ u yi sunɔn yɛnuɔ. 15 Sɑnɑm mɛ gobi kpɑ Egibitiɔ kɑ Kɑnɑniɔ, Egibitigibu kpuro bɑ nɑ bɑ Yosɛfu deemɑ bɑ nɛɛ, ɑ sun dĩɑnu wɛ̃ɛmɑ. Mbɑn sɔ̃nɑ sɑ ko gbi ɑ n sun mɛɛrɑ, domi bɛsɛn gobi kpɑ.
16 Yosɛfu u bu sɔ̃ɔwɑ u nɛɛ, ì kun gobi mɔ, i mɑn bɛɛn yɑɑ sɑbenu wɛ̃ɛmɑ kpɑ n bɛɛ dĩɑnu wɛ̃.
17 Bɑ kɑ ben dumi kɑ yɑ̃ɑnu kɑ bonu kɑ nɛɛ kɑ kɛtɛkunu Yosɛfu nɑɑwɑ. Mɑ u kɑ ye kpuro bu dĩɑnu kɔsinɑ. Nge mɛyɑ bɑ kɑ ben sɑbenu kpuro dĩɑnu kɔsinɑ wɔ̃ɔ ge. 18 Ye wɔ̃ɔ ge, gɑ doonɑ, bɑ kpɑm nɑ Yosɛfun mi, bɑ nɛɛ, yinni, sɑ ǹ kpɛ̃ su nun gɑ̃ɑnu beruɑ. Bɛsɛn gobi kpɑ, bɛsɛn yɑɑ sɑbenu kpuro mɑɑ wɑ̃ɑ wunɛn mi. A yɛ̃ mɑ gɑ̃ɑnu kun mɑɑ sun tie mɑ n kun mɔ bɛsɛn wɑsi kɑ bɛsɛn gbeɑ. 19 Mbɑn sɔ̃nɑ kɑɑ n sun mɛɛrɑ sɑ n gbiɔ, kpɑ bɛsɛn gbeɑ yu kɑm ko. Yen sɔ̃, ɑ kɑ sun dĩɑnu kɔsinɔ kpɑ bɛsɛn gbeɑ yu ko sunɔgiɑ kpɑ su ko win yobu. A sun dĩɑ bweseru wɛ̃ɛyɔ su duure ni sɑ ko rɑ di sɑ n kɑ wɑ̃ɑ, kpɑ gbeɑ ye, yu ku ko gbee diinu.
20 Mɑ Yosɛfu u Egibitigibun gbeɑ kpuro sunɔ dwiɑ, domi gɔ̃ɔrɑ derɑ bɑ nùn ye dɔre. Yerɑ tem mɛ kpuro mu kuɑ sunɔgim. 21 Mɑ Yosɛfu u tɔmbu kpuro yɑrinɑsiɑ u bu yoo sɔmburu koosiɑ Egibitin tem kpuro sɔɔ. 22 Adɑmɑ u ǹ yɑ̃ku kowobun gbeɑ dwɑ, domi Egibiti sunɔ u woodɑ gɑɑ mɔ ye yɑ derɑ u rɑ bu dĩɑnu wɛ̃. Yen sɔ̃nɑ bɑ ǹ ben gbeɑ dɔre.
23 Mɑ Yosɛfu u tɔmbu sɔ̃ɔwɑ u nɛɛ, gisɔ nɑ bɛɛ dwɑ bɛɛ kɑ bɛɛn gbeɑ i kuɑ sunɔn yobu. Wee, nɑ bɛɛ dĩɑ bweseru wɛ̃ɛmɔ i kɑ duure gbeɑ ye sɔɔ. 24 Sɑnɑm mɛ dĩɑnu rɑ ye, i nu bɔnu koowo subɑ nɔɔbu, i sunɔ sube teeru wɛ̃ kpɑ i subɑ nnɛ tii yiiyɑ. Mi sɔɔrɑ ko i bweseru wunɑ i kɑ duure kpɑ i ye yɑ tie di, bɛɛ kɑ bɛɛn tɔmbu.
25 Mɑ bɑ nɛɛ, wunɛn durom mɛ, mu sun fɑɑbɑ kuɑ. Tɛ̃ sɑ ko ko sunɔn yobu.
26 Nge mɛyɑ Yosɛfu u kɑ woodɑ yeni yi, ye yɑ nɛɛ, bɑ n dɑ Egibitin gbeɑn dĩɑnu bɔnu ko subɑ nɔɔbu kpɑ sube teeru tu ko sunɔgiru. Woodɑ ye, yɑ wɑ̃ɑ sere kɑ gisɔ. Yɑ̃ku kowobun gbeɑ tɔnɑwɑ yɑ ǹ kue wigiɑ.
Ye Yɑkɔbu u kĩ bu nùn kuɑ
ù n gu
27 Yɑkɔbu wi bɑ mɑɑ sokumɔ Isireli kɑ wigibu bɑ sinɑ Egibitin temɔ Gosɛnin berɑ giɑ. Bɑ dukiɑ kpɑɑsinɑmɔ mi, bɑ mɑrurɑmɔ bɑ dɑbiɑmɔ. 28 Yɑkɔbu u kuɑ wɔ̃ɔ wɔkurɑ nɔɔbu kɑ yiru Egibitin temɔ. Mɑ win wɑ̃ɑrun sɑnɑm kpuro mu kuɑ wɔ̃ɔ wunɑɑ weeru kɑ nɔɔbɑ yiru.
29 Ye win gɔɔ turuku kuɑ, u win bii Yosɛfu sokɑ u nùn sɔ̃ɔwɑ u nɛɛ, nɑ̀ n wunɛn kĩi geeru wɑ, nɑ nun kɑnɑmɔ, ɑ wunɛn nɔmu dokeo nɛn tɔbuɔ ɑ kɑ bɔ̃re mɑ ɑ ǹ mɑn sikumɔ Egibitin tem mini. 30 Sɑnɑm mɛ kon kpunɑ n gbi n nɛn bɑɑbɑbɑ deemɑ, ɑ nɛn goru suo ɑ kɑ yɑri Egibitin di kpɑ ɑ tu sike ben sikɑɔ.
Yosɛfu u nùn wisɑ u nɛɛ, kon ko nge mɛ ɑ geruɑ.
31 Yɑkɔbu nɛɛ, ɑ bɔ̃ruo.
Mɑ Yosɛfu u bɔ̃ruɑ. Yen biru Yɑkɔbu u yiirɑ win kpin yerun wiru giɑ u Gusunɔ siɑrɑ.